Днесь восхваляем тя, преподобная мати,/ великая княгине инокине Анно:/ яко бо лоза плодовита посреде терния,/ процвела еси во граде Кашине твоими добродетельми,/ всех удивила еси чудным твоим житием,/ темже Христу Богу угодила еси,/ и ныне, радующися и веселящися,/ пребывавши с лики преподобных жен,/ наслаждающися райския красоты и веселия./ Молим убо тя:/ моли о нас Человеколюбца, Христа Бога нашего,/ даровати нам мир и велию милость.

Просветившися Божественною благодатию, преподобная,/ и правостию умною душу твою привязавши в любовь Христову,/ тленныя, и красныя, и временный нивочтоже вменила еси./ Крестным знамением на мысленный враги мужески вооружившися,/ постническими подвиги, постом и молитвами/ углие страстей угасила еси, достославная Анно,/ и по смерти источавши благодать притекающим к мощем твоим./ И ныне, в Небеснем чертозе с мудрыми девами предстоящи Христу,/ моли о нас, почитающих святую память твою.

Яко пресветлая звезда,/ явилася еси в Российстей земли, во граде Кашине,/ преподобная мати Анно,/ во всех благочестивых и верных женах,/ аки крин, процвела еси чистым и непорочным твоим житием,/ во инокинях же совершенными твоими труды и подвиги,/ и возшла еси к Вышнему граду, радующися и веселящися,/ яко добре совершивши твое течение,/ и ныне честныя твоя мощи,/ аки бисерие драгое, явишася,/ на исцеление всем, приходящим с верою./ Тем и вопием ти:/ радуйся, всекрасная душею,/ и моли Христа Бога/ о спасении душ наших.

Скоропослушную помощницу, вси, сущии в бедах,/ благочестно воспоем, Анну святую,/ днесь любовию сошедшеся во обретение честных мощей ея./ Воспоем песнь Единому в Троице Богу, радующеся,/ сподобльшему нас видети пречистое сокровище честных мощей ея:/ от мног бо лет сокровены быта,/ напоследок же нам явлены/ и источают многа и различна исцеления./ Яко да молитвами ея к Богу/ от всяких находящих зол избавимся,/ радостною душею и веселием сердца благодарная воспоем, глаголюще:/ радуйся, утверждение граду нашему.