Изгнание Адамово. Бдение обычное.

В субботу вечера во светильничное, по предначинательном псалме, стихословим: Блажен муж: кафисму всю. На Господи воззвах, поставим стихов 10. И поем Осмогласника воскресны 3, и анатолиевы 3, и Триоди 4, глас 6.
Подобен: Всю отложивше:

Создатель мой Господь, персть от земли прием мя, живоносным дуновением вдушив оживи, и почте на земли начальствующа видимыми всеми, и ангелом купножителя. Сатана же льстивый, сосуд змия употребив, снедию прельсти, и Божия славы разлучи, и преисподнейшей смерти предаде в землю: но яко Владыка и Благоутробен, паки воззови.

Одежды боготканныя совлекохся окаянный, Твое Божественное повеление преслушав Господи, советом врага, и смоковным листвием, и кожными ризами ныне облекохся: потом бо осужден бых хлеб трудный снести: терние же и волчец мне принести, земля проклята бысть. Но в последняя лета воплотивыйся от Девы, воззвав мя введи паки в рай.

Раю всечестный, краснейшая доброто, богозданное селение, веселие некончаемое и наслаждение, славо праведных, пророков красото, и святых жилище, шумом листвий твоих Содетеля всех моли, врата отверсти ми, яже преступлением затворих, и сподобитися древа животнаго прияти, и радости, еяже прежде в тебе насладихся.

Адам изгнан бысть из рая преслушанием, и сладости извержен, женскими глаголы прельщенный, и наг седит, села, увы мне, прямо рыдая. Темже потщимся вси время подъяти поста, послушающе Евангельских преданий: да сими благоугодни бывше Христу, рая жилище паки восприимем.

Слава, глас 6: Седе Адам прямо рая, и свою наготу рыдая плакаше: увы мне, прелестию лукавою увещанну бывшу и окрадену и славы удалену! Увы мне, простотою нагу, ныне же недоуменну! Но о раю, ктому твоея сладости не наслаждуся: ктому не узрю Господа и Бога моего и Создателя: в землю бо пойду, от неяже и взят бых. Милостиве щедрый, вопию Ти: помилуй мя падшаго.

И ныне, Богородичен 1-й, гласа.

Свете тихий: Вход. Прокимен: Господь воцарися:

На литии, яко обычно, самогласен святаго обители.

Слава, глас 6:

Солнце лучи скры, луна со звездами в кровь преложися, горы ужасошася, холми вострепеташа, егда рай заключися. Исходя Адам рукама бия в лице, глаголаше: Милостиве, помилуй мя падшаго.

И ныне, Богородичен. Подобен:

Таинственно воспеваем Тя Богородице Марие, явилася бо еси престол великаго Царя, сень всесвятая, небес ширшая, херувимская колесница, вышшая же серафимов, чертог славы: из Тебе бо пройде воплотивыйся всех Бог. Того моли спастися душам нашим.

На стиховне, Осмогласника.

Слава, глас 6: Изгнан бысть Адам из рая снедию, темже и седя прямо сего рыдаше, стеня умилительным гласом, и глаголаше: увы мне, что пострадах окаянный аз: едину заповедь преступих Владычню, и благих всяческих лишихся! Раю святейший, мене ради насажденный быв, и Евы ради затворенный, моли тебе сотворшаго, и мене создавшаго, яко да твоих цветов исполнюся! Темже и к нему Спас: Моему созданию не хощу погибнути, но хощу сему спастися, и в познание истины приити, яко грядущаго ко Мне не изгоняю вон.

И ныне, Богородичен. Подобен: Творец и Избавитель:

Ныне отпущаеши: По Трисвятом отпустительный, Богородице Дево: трижды. И прочее последование бдения: рядовому же святому поем на Повечерии.

 

 

 

На Утрени,

на Бог Господь, тропарь воскресен дважды, и Богородичен: обычное стихословие. И полиелей, якоже указася в Неделю о блудном сыне. И Благословен еси Господи: Начинаем же чести первую книгу Шестодневца Златоустаго, и степенны гласа.

Всякое дыхание: и утреннее Евангелие. Воскресение Христово: и псалом 50. Слава, глас 8: Покаяния отверзи ми двери: И ныне, подобен, На спасения стези: Таже, глас 6: Помилуй мя Боже: Таже, Множества содеянных мною лютых:

Каноны Осмогласника: воскресен, крестовоскресен, и Богородицы, на 8, и Триоди на 6. Творение Христофора Протосигкрита. Глас 6.

Песнь 1: Яко по суху:

Гряди душе моя страстная, плачи твоя деяния днесь, поминающи первое обнажение во Едеме, имже изгнана еси от сладости, и непрестанныя радости.

От многаго благоутробия и щедрот, Создателю твари, и Творче всех, от персти оживив мя прежде, заповедал еси пети Тя со ангелы Твоими.

Ради богатства благости, Ты садиши Создателю и Господи, райскую сладость во Едеме, повелевая ми наслаждатися красных и сладких, и немимотекущих плодов.

Слава: Увы мне душе моя окаянная, сущих во Едеме наслаждатися прияла еси власть от Бога, не ясти же ведения плода повелена была еси: вскую преступила еси закон Божий?

И ныне, Богородичен: Богородительнице Дево, яко Адамова дщи по роду, по благодати же Христу Богу родительница, мене изгнаннаго от Едема, ныне воззови.

Катавасию же поем ирмосы настоящаго канона:

Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.

Песнь 3: Несть свят якоже Ты Господи:

Змий льстивый некогда чести моей позавидев, пошепта лестию Еве во уши, от неяже аз прельстився изгнан бых, увы мне, от лика жизни.

Руку простер дерзостно, вкусих древа разумнаго, егоже повеле мне Бог никакоже причаститися, и Божественныя славы отвержен бых горце.

Слава: Увы мне страстная моя душе, како не познала еси прелести? Како не ощутила еси льщения, и зависти вражия? Но помрачилася еси умом, и преступила еси заповедь Создателя твоего.

Богородичен: Упование и покров мой Чистая, обнажение древле покрывшая, едина, падшаго Адама, Рождеством Твоим Чистая, в нетление паки облецы мя.

Катавасиа: Несть свят якоже Ты Господи Боже мой, вознесый рог верных Твоих Блаже, и утвердивый нас на камени исповедания Твоего.

Седален, глас 4.
Подобен: Удивися Иосиф:

Изгнан бысть Адам от райския сладости, снедию горькою в невоздержании заповеди не сохрани Владычни, и осудися делати землю, от неяже взят бысть сам: потом же многим ясти хлеб свой. Темже мы возлюбим воздержание, да не вне рая возрыдаим, якоже он, но в него внидем.

Слава, иный, глас 4.
Подобен: Вознесыйся:

Ныне время добродетелей явися, и при дверех Судия, не скорбим: но приидите постящеся принесем слезы, умиление и милостыню, зовуще: согрешихом паче песка морскаго: но ослаби всем всех Свободителю, да восприимем нетленный венец.

И ныне, Богородичен. Подобен:

Не умолчим никогда Богородице, силы Твоя глаголати недостойнии: аще бо Ты не бы предстояла молящи, кто бы нас избавил от толиких бед, кто же бы сохранил до ныне свободны? Не отступим Владычице, от Тебе: Твоя бо рабы спасаеши присно от всяких лютых.

Таже чтение Богослова в язву града, егоже начало: Что решите чин похваляемый? И творим даяния два.

Песнь 4: Христос моя сила:

Чести сподобихся аз страстный, от Тебе Владыки во Едеме: увы мне, како прельстився, и диаволом позавидевся отвержен бых от лица Твоего?

Мене рыдайте ангельстии чинове, рая доброты, и садов тамошнее благолепие, прельстившагося злополучно, и Бога отвергшагося.

Луже блаженный, садове богосажденнии, рая красото, ныне о мне слезы проливайте, от листов, якоже от очию, обнаженнем и страннем славы Божия.

Слава: Не ктому вижу тебе, ни наслаждаюся пресладкия твоея и божественныя светлости, всечестный раю: наг бо повергохся в землю, прогневая Сотворшаго.

Богородичен: Святая Владычице, отверзшая рая врата всем верным, яже Адам заключи преступлением иногда, врата милости мне отверзи.

Катавасиа: Христос моя сила, Бог и Господь, честная Церковь боголепно поет взывающи, от смысла чиста, о Господе празднующи.

Песнь 5: Божиим светом:

Позавидев древле мне враг, в раи благополучна жития человеконенавистник, в видении змия мне запят, и славы присносущныя странна мя показа.

Рыдаю и плачу душею, и очесем ищу множества слез прилагати, егда воззрю и познаю мою наготу, юже имех от преступления.

Слава: От земли создан бых рукою Божиею, паки же возвратитися в землю аз страстный слышах: кто мене не восплачет, отриновеннаго от Бога, и Едемом ад изменившаго?

Богородичен: Чертог славы Тя тайный вси возвещаем вернии, Богородительнице Всенепорочная. Темже молю Тя Чистая: испадшаго мя чертога райска, свойственна сотвори.

Катавасиа: Божиим светом Твоим Блаже, утренюющих Ти души лювовию озари, молюся, Тя ведети Слове Божий, истиннаго Бога, от мрака греховнаго взывающа.

Песнь 6: Житейское море:

Одеждею мя облекл еси боготканною Спасе, во Едеме, яко благоутробен: аз же Твою преступих заповедь, веровав льстивому, и наг видехся окаянный.

Душе всестрастная моя, удалилася еси от Бога, невниманием твоим райскаго лишилася еси наслаждения, от ангел разлучилася еси, во тлю ввелася еси: о падения!

Слава: Помилуй, ущедри Вседержителю Боже, Твоею руку творение, не презри мене, молюся, Блаже, отлучившаго себе самаго от лика ангел Твоих.

Богородичен: Марие Богозванная, Госпоже всяческих, яко рождшая Господа Царя всех и Избавителя, пленена мя суща от райския славы, воззови.

Катавасиа: Житейское море воздвизаемое зря напастей бурею, к тихому пристанищу Твоему притек вопию Ти: возведи от тли живот мой, Многомилостиве.

Кондак, глас 6:

Премудрости наставниче, смысла подателю, немудрых наказателю, и нищих защитителю, утверди, вразуми сердце мое Владыко: Ты даждь ми слово, Отчее Слово, се бо устне мои не возбраню, во еже звати Тебе: Милостиве, помилуй мя падшаго.

Икос: Седе Адам тогда и плакася, прямо сладости рая, рукама бия лице, и глаголаше: Милостиве, помилуй мя падшаго.

Видев Адам ангела изринувша, и затворивша божественнаго сада дверь, воздохнув вельми, и глагола: Милостиве, помилуй мя падшаго.

Споболи раю стяжателю обнищавшему, и шумом твоих листвий умоли Содетеля, да не затворит тя: Милостиве, помилуй мя падшаго.

Раю вседобродетельный, всесвятый, всебогатый, Адама ради насажденный, и ради Евы заключенный, умоли Бога о падшем: Милостиве, помилуй мя падшаго.

Синаксарь.

Стихи: Мир с родоначальники горько да восплачет:

Снедию сладкою падший с падшими.

В сей день воспоминание творим от райския пищи испадения первозданнаго Адама, еже божественнии святии отцы наши прежде святыя Четыредесятницы вчиниша: якоже теми показующе вещьми, елика постная лечьба человеческому естеству полезная, и елико паки еже от лакомства и непослушания гнусно. Оставльше убо отцы, яже по части в мире, сими бывшая повествовати безчисленна суща, первозданнаго Адама предлагают, елико зло пострада, от еже ни вмале поститися, отонуду и нашему приведе естеству, яве предпоказующе. И якоже первое в человецех Божие заповедание поста доброе, еже не сохранив он: но чреву покорься, паче же прелестнику змию Евою, не токмо бог не бысть, но и смерть привлече, и пагубу всему роду подаде. Пищи убо ради перваго Адама, Господь дней постися четыредесять, и послушлив бысть: егоже ради и настоящая святая Четыредесятница святыми апостолы умыслися, да еже не сохранив он пострада, погубив нетление, сохранивше мы восприимем постом. Инако же, якоже и предрекохом, намерение святых сие есть, да яже из начала даже до конца дела бывшая Богом, вкратце обымут. Елма же всех по нам виновно преступление и от пищи испадение Адамово: по сему слову сие ныне предлагают, память нам творящим, онаго да убежим, паче же невоздержанию во всем да не ревнуем. В шестый убо день Адам создася рукою Божиею, почтен быв и образом, вдуновлением. И взем заповедь, абие даже до шестаго часа в раи поживе: таже преступив сию, оттуду изгнася. Евреин убо Филон сто, рече, лет Адаму в раи сотворити: друзии же, седмь дней или лет глаголют, чести ради седмаго числа. И яко в шестый час руце простер, и плода коснуся: яви и Новый Адам Христос, в шестый час и день длани простер на Кресте, онаго исцеляя пагубу. Посреде же тли и нетления создан бысть, да еже изберет произволением, оно и притяжет. Бе же убо мощно Богу и безгрешна сего сотворити: но да будет и того произволение исправление. Сего ради закон дает, всех убо касатися садов, сего же ни: негли от всех созданий Божественныя силы бываемое познание помышляти: а еже о естестве Божии, никакоже. Еже убо и Богослов Григорий, любопремудрствуяй, древесем быти, мысли Божественней: садом же, Боговидению. Сиречь, повеле [глаголет] Бог Адаму о всех убо иных стихиах и качествах пещися, и помышляти умом, и прославляти Бога оттуду: сия бо истинно пища, негли же и о Своем естестве, о Бозе убо, Кто же естеством, и Господе, и како все от не сущаго приведе, никакоже искати. Он же другая убо оставль, яже о Бозе наипаче испытуяй бяше, и Онаго естество опасне изведоваяй: яко убо еще несовершен сый, и препрост, и младенец, в сицевая испаде, сатане Евою мечтание ему вложившу обожения. Великий же и божественный Златоуст, сугубу некую силу древу оному имети глаголет: и на земли глаголет раю быти, и умну ему, и чувственну любопремудрствует, якоже бе Адам: и ова посреде тли и нетления: вкупе и писание соблюдая: и ниже паки пребываяй при писмени. Глаголют же нецыи, древу оному преслушания быти смоковнице: зане познавше абие наготу, листвие оныя употребивше покрышася. Сего ради Христос, яко вину бывшу сию преслушания, прокля: имать бо некое и ко греху уподобление. Первое убо, еже услаждающее таже еже от листвия жестокое, и прилепляющееся млеком. Суть же, иже и древо оно со Евою Адама беседу и разум, умыслиша не добре. Преступив убо и смертною облекся плотию, и клятву взем изгнан бысть рая: и пламенному оружию сего врата повелено бысть хранити. Сей же прямо седя плакаше, коликих благ лишися, за еже не поститися ко времени: и из онаго весь род оному равных приобщися, дондеже Создавый нас, наше помиловав естество, погибаемое сатаною, от Девы Святыя рождся и изрядне пожив, путь нам показав, сопротивными оному, рекше, постом и смирением, и победив хитро нас прельстившаго, и паки в древнее достояние приведе. Вся убо сия богоноснии отцы представити хотяще, всею Триодию прежде убо ветхая предлагают: ихже первое создание: и от пищи испадение Адамово, егоже ныне память творим: таже и прочими Моисейскими и пророческими, и вящши Давидскими словесы, и некая тогда от благодати прилагающе. Таже по чину и яже Новаго Завета: ихже первое есть Благовещение, смотрением Божиим неизглаголанным во святей Четыредесятнице присно обретаемо: Лазарем же и цветоносием, и святою Великою седмицею священным прочитаемым Евангелием: самым же святым и спасительным страстем Христовым по тонку певаемым. Таже и Воскресением, и прочими даже и до сошествия Святаго Духа священным Деянием прочитаемым, како проповедь бысть, и святых всех собра: Деяния бо Воскресение извествуют чудес ради. Понеже убо за еже ни единою Адаму поститися, толика пострадахом, предлагается ныне сего воспоминание, во входе святыя Четыредесятницы: да поминающе елико зло, еже не поститися введе, потщимся пост радостне подъяти и сохранити. Якоже убо егоже погреши Адам [сиречь обожения], мы тем получим, рыдающе и постящеся и смиряющеся, дондеже нас Бог посетит: сих бо кроме неудобь прияти еже погубихом. Ведомо же буди, яко десятина есть, сия святая и великая Четыредесятница, всего лета. Понеже бо от лености присно поститися, и от злых упразднитися не хощем, яко некую жатву душам сию апостоли, и божественнии отцы предаша: яко елика убо всем летом безместная содеяхом: ныне сокрушаеми, и постом смиряеми очистим: юже и хранити должни есмы опаснейше. Но убо и прочия три святых апостол глаголю, Богородицы, и Рождества Христова: к четырем бо лета временом, и Четыредесятницу божественнии апостоли издаша, сию вящше почетше святых ради страстей, и яко Христос сию постися и прославися. И Моисей четыредесять дней постився закон прият: и Илиа сам: и Даниил, и елицы искуснии у Бога. И яко добро есть пост, показует от сопротивнаго Адам. За сию убо вину Адамово изгнание зде святыми отцы умыслися. Неизреченным Твоим благоутробием Христе Боже наш, пищи райския нас сподоби, и помилуй, яко един Человеколюбец, аминь.

Песнь 7: Росодательну убо пещь:

Владычествуяй всеми веки Господи, создавый мя волею Твоею, завидена мя льстивым змием иногда, и Тебе прогневавшаго Спасе, не презри Боже, но воззови мя.

Студными одеян одеждами, увы мне, вместо одеяния светозарнаго, плачу моея погибели, Спасе, и верою вопию Ти Благий: не презри Боже, но воззови мя.

Слава: Уязви змий вселукавый всю мою душу лукавно, райския же сладости изгнана сотвори: но о благосерде Спасе, не презри яко Бог, но воззови мя.

Богородичен: Молебное мое моление Всенепорочная приими милостию Твоею, и прощение прегрешений даждь ми Чистая, рыданьми вопиющему прилежно: не презри Благая, но воззови мя.

Катавасиа: Росодательну убо пещь содела ангел преподобным отроком, халдеи же опаляющее веление Божие мучителя увеща вопити: благословен еси Боже отец наших.

Песнь 8: Из пламене преподобным:

Дарми многообразными древле, почел еси руку Твоею дело, едине Человеколюбче: змий же лютый свистанием прельсти, увы мне, настоящих благ обнажив.

Вскую совета горькаго послушала еси, и Божественнаго повеления была еси преслушна? Увы мне смиренная душе, Бога оскорбившая: Егоже присно славити учинена еси со ангелы!

Благословим Отца, и Сына, и Святаго Духа, Господа.

Гадом и зверем владычица бывши, гаду душетленному како собеседовала еси, советника приимши яко праваго, льстиваго? О твоего прельщения, душе моя всестрастная!

Богородичен: Светоносное селение Тя Божия воплощения, воспеваем Марие Богоблагодатная: темже мя люте омраченна страстьми, просвети светом милости, надежде ненадежных.

Хвалим, благословим, покланяемся Господеви:

Катавасиа: Из пламене преподобным росу источил еси, и праведнаго жертву водою попалил еси: вся бо твориши Христе токмо еже хотети, Тя превозносим во вся веки.

Песнь 9: Бога человеком:

Сладок вкус плод разума во Едеме яви ми ся насыщшемуся снеди, в желчь же бысть конец его. Увы мне душе страстная, како невоздержание тя райскаго ядения странна сотвори?

Боже всех, милости Господи, на мое смирение благоутробне призри, и не далече посли мя Божественнаго Едема, яко да зря доброты, отонудуже испадох, потщуся паки рыданьми восприяти яже погубих.

Рыдаю, стеню и плачу, херувимы с пламенным оружием зря, Едема вход стрещи повеленныя, всем претупником, увы! неприступный, аще не Ты невозбранен Спасе той сотвориши ми.

Слава: Дерзаю множеству милости Твоея Христе Спасе, и Божественных ребр Твоих крови, еюже освятил еси естество человеческое, отверзл же еси врата Тебе служащим райская Блаже, прежде заключеная Адаму.

Богородичен: Жизни двере непроходимая, умная, Дево Богородице Безневестная, райская врата заключеная ми прежде отверзи Твоими молитвами, яко да славлю Тя по Бозе мою помощницу, и державное прибежище.

Катавасиа: Бога человеком невозможно видети на Негоже не смеют чини ангельстии взирати: Тобою же Всечистая, явися человеком Слово воплощенно: Егоже величающе, с небесными вои Тя ублажаем.

Ексапостиларий воскресный.
Слава, настоящий.
Подобен: Жены услышите:

Заповедь Твою, Господи, преслушав окаянный, и обнажен Твоея славы, студа исполнихся, увы мне! и сладости изриновен есмь райския благоутробне. Милостиве, помилуй лишившася праведно благости Твоея.

И ныне, иный.
Подобен: Со ученики идем:

Изгнана бывша Господи рая первее снедию древа, ввел еси паки Крестом и страстию Твоею Спасе и Боже мой, имже нас утверди пост совершити чистолепно, и Божественному востанию поклонитися, Пасце спасительней, Тя рождшия молитвами.

На хвалитех стихиры Осмогласника воскресны 4, и анатолиев един, и Триоди сия самогласны.

Глас 5: Увы мне, Адам рыданием возопи, яко змий и жена Божественнаго дерзновения изринуша мя: и райския сладости, древа снедь отчужди. Увы мне, не терплю прочее поношения: иногда царь сый земных всех созданий Божиих, ныне пленник явихся от единаго беззаконнаго совета: и иногда славою безсмертия облечен сый, умерщвления кожу яко смертный окаянно обношу. Увы мне, кого рыданий содейственника сотворю? Но Ты Человеколюбче, от земли создавый мя, во благоутробие оболкийся, работы вражия свободи, и спаси мя.

Стих: Исповемся Тебе Господи всем сердцем моим.

Поприще добродетелей отверзеся, хотящии страдальчествовати внидите, препоясавшеся добрым поста подвигом: законно бо страдальчествующии, праведно венчаются. И восприимше всеоружие Креста, врагу сопротивимся, яко стену нерушимую имуще веру, и яко щит молитву, и шлем милостыню, вместо меча пост, иже отсекает от сердца всю злобу. Творяй сия, истинный приимет венец от Всецаря Христа в день судный.

Стих: Возвеселюся и возрадуюся о Тебе.

Глас 6: Адам из рая отгонится, пищи причастився, яко преслушник: Моисей Боговидец бысть, постом очи душевныя очистив. Темже рая жителие быти возжелевше, изменимся от неполезныя пищи, и Бога зрети желающе, Моисейскую четверицу десятиц постимся, молитвою и молением чисто терпяще: утолим душевныя страсти, отженем плотския сласти, легцы к горнему шествию прейдем, идеже ангельстии лицы немолчными гласы нераздельную воспевают Троицу, зрети недоуменную доброту и Владычню. Тамо сподоби нас Сыне Божий Жизнодавче на Тя надеющихся, ликовати со ангельскими воинствы, рождшия Тя Матере Христе молитвами, и апостол, и мученик, и преподобных.

Стих: Воскресни Господи Боже мой, да вознесется рука Твоя:

Приспе время, духовных подвигов начало, на демоны победа, всеоружное воздержание, ангельское благолепие, к Богу дерзновение: тем бо Моисей бысть Зиждителю собеседник, и глас невидимо в слух прият. Господи, тем сподоби и нас поклонитися Твоим страстем, и святому Воскреснию, яко Человеколюбец.

Слава, тойже. И ныне: Преблагословена еси Богородице Дево:

Славословие великое. И обычная литиа в паперти, в нейже поем, Слава, и ныне: стихиру евангельскую. Совокупляем же и час 1-й. И чтутся оглашения преподобнаго отца нашего Феодора Студита, и отпуст.

 

 

На Литургии

изобразительная. Блаженны гласа на 6, и канона Триоди песнь 6-я, на 4.

Прокимен, глас 8: Помолитеся, и воздадите Господеви Богу нашему. Стих: Ведом во Иудеи Бог, во Израили велие имя Его.

Апостол к Римляном, зачало 112. [Рим. 13, 11 – 14, 4.]

Братие, ныне ближайшее нам спасение, нежели егда веровахом.	Братья, ныне ближе к нам спасение, нежели когда мы уверовали.
Нощь (убо) прейде, а день приближися: отложим убо дела темная, и облечемся во оружие света.	Ночь прошла, а день приблизился: итак отвергнем дела тьмы и облечемся в оружия света.
Яко во дни, благообразно да ходим, не козлогласовании и пиянствы, не любодеянии и студодеянии, не рвением и завистию:	Как днем, будем вести себя благочинно, не предаваясь ни пированиям и пьянству, ни сладострастию и распутству, ни ссорам и зависти;
Но облецытеся Господем нашим Иисус Христом, и плоти угодия не творите в похоти.	Но облекитесь в Господа нашего Иисуса Христа, и попечения о плоти не превращайте в похоти.
Изнемогающаго же в вере приемлите, не в сомнение помышлении.	Немощного в вере принимайте без споров о мнениях.
Ов бо верует ясти вся, а изнемогаяй зелия (да) яст.	Ибо иной уверен, что можно есть все, а немощный ест овощи.
Ядый не ядущаго да не укоряет: и не ядый ядущаго да не осуждает: Бог бо его прият.	Кто ест, не уничижай того, кто не ест; и кто не ест, не осуждай того, кто ест, потому что Бог принял его.
Ты кто еси судяй чуждему рабу? Своему Господеви стоит, или падает. Станет же, силен бо есть Бог поставити его.	Кто ты, осуждающий чужого раба? Перед своим Господом стои'т он, или падает. И будет восставлен, ибо силен Бог восставить его.

Аллилуиа, глас 6: Благо есть исповедатися Господеви, и пети имени Твоему Вышний.

Евангелие от Матфеа, зачало 17. [Мф. 6, 14 – 21.]

Рече Господь Своим учеником: аще отпущаете человеком согрешения их, отпустит и вам Отец ваш Небесный:	Сказал Господь Своим ученикам: если вы будете прощать людям согрешения их, то простит и вам Отец ваш Небесный,
Аще ли не отпущаете человеком согрешения их, ни Отец ваш отпустит вам согрешений ваших.	А если не будете прощать людям согрешения их, то и Отец ваш не простит вам согрешений ваших.
Егда же поститеся, не будите якоже лицемери сетующе: помрачают бо лица своя, яко да явятся человеком постящеся. Аминь глаголю вам, яко восприемлют мзду свою.	Также, когда поститесь, не будьте унылы, как лицемеры, ибо они принимают на себя мрачные лица, чтобы показаться людям постящимися. Истинно говорю вам, что они уже получают награду свою.
Ты же постяся помажи главу твою, и лице твое умый,	А ты, когда постишься, помажь голову твою и умой лице твое,
Яко да не явишися человеком постяся, но Отцу твоему, Иже в тайне: и Отец твой, видяй в тайне, воздаст тебе яве.	Чтобы явиться постящимся не пред людьми, но пред Отцом твоим, Который втайне; и Отец твой, видящий тайное, воздаст тебе явно.
Не скрывайте себе сокровищ на земли, идеже червь и тля тлит, и идеже татие подкопывают и крадут:	Не собирайте себе сокровищ на земле, где моль и ржа истребляют и где воры подкапывают и крадут,
Скрывайте же себе сокровище на небеси, идеже ни червь, ни тля тлит, и идеже татие не подкопывают, ни крадут:	Но собирайте себе сокровища на небе, где ни моль, ни ржа не истребляют и где воры не подкапывают и не крадут,
Идеже бо есть сокровище ваше, ту будет и сердце ваше.	Ибо где сокровище ваше, там будет и сердце ваше.

И Божественная Литургиа Златоустаго:

Киноник: Хвалите Господа с Небес:

Подобает ведати, яко от сея Недели даже до Воздвижения Честнаго Креста, упраждняется полиелей: поется же токмо во бдениих Владычних праздников и великих святых.