В пяток вечера,

стихословим кафисму 18. По обычном же стихословии, на Господи воззвах, поставим стихов 10, и поем самогласен, глас 6, дважды:

Яко от Иерусалима Твоих Божественных заповедей исходя, и к страстем Иерихонским достиг, славою безчестия житейских попечений привлечен, в разбойническия впадох помыслы, сыноположения благодати ризы от них совлекохся, и ранами яко бездушен лежу. Священник же пришед язву видев не внят: и левит, и той возгнушався мимо иде. Ты же Господи, от Девы неизреченно воплощься, излиянием от спасительнаго ребра Твоего, вольне излиявшияся крове и воды, якоже елей искапав Христе Боже, струпы язв моих мягкостию стягни, и к небесному совокупи лику, яко Милосерд.

Мученичен: Мученицы Твои Господи, не отвергошася Тебе, ни отступиша от заповедей Твоих: тех молитвами помилуй нас.

Таже поем стихиры подобны, Пресвятыя Богородицы 3, творяще я 7, глас 6.
Подобен: Всю отложивше:

Совет превечный открывая Тебе Отроковице, Гавриил предста, Тебе лобзая и вещая: радуйся, земле ненасеянная. Радуйся, купино неопалимая. Радуйся, глубино неудобозримая. Радуйся, мосте к небесем преводяй, и лествице высокая, юже Иаков виде. Радуйся, Божественная ручко манны. Радуйся, разрешение клятвы. Радуйся, Адамово воззвание, с Тобою Господь.

Являеши Ми ся яко человек, глаголет нетленная Отроковица ко архистратигу: и како вещаеши глаголы паче человека? Со Мною бо рекл еси Богу быти, и вселитися во утробу Мою. И како буду, глаголи Ми, село пространное, и место священия, херувимы Превосходящаго? Да не прельстиши Мене лестию, не познах бо сласти, браку есмь непричастна: како убо Отроча рожду?

Бог идеже хощет, побеждается естества чин, глаголет безплотный: и яже паче человека содеваются, моим веруй истинным глаголом, Всесвятая Пренепорочная. Она же возопи: буди Мне ныне по глаголу твоему, и рожду Безплотнаго, плоть от Мене заимствовавшаго, яко да возведет человека, яко един силен, в первое достояние, с растворением.

Слава, и ныне, глас 2:

Еже от века таинство открывается днесь, и Сын Божий, Сын Человечь бывает: да хуждшее восприим, подаст ми лучшее. Солгася древле Адам, и бог вожделев [быти], не бысть, Человек бывает Бог, да бога Адама соделает. Да веселится тварь, да ликовствует естество, яко архангел Деве со страхом предстоит, и еже радуйся, приносит печали сопротивное. За милосердие милости вочеловечивыйся Боже наш, слава Тебе.

Аще ли не совершается последование Преждесвященных, поем стихиры Богородицы на 8. На стиховне самогласен дне, дважды, и мученичен. Слава, и ныне: Языка егоже не ведяше: писан на хвалитех в субботу.

Вход. Свете тихий:

Прокимен, псалом 102, глас 4: Щедр и милостив Господь, долготерпелив и многомилостив. Стих: Благослови душе моя Господа, и вся внутренняя моя, имя святое Его.

Бытия чтение. [Глава 22, ст. 1 – 18.]

Бысть по глаголех сих, Бог искушаше Авраама, и рече ему: Аврааме, Аврааме. и рече: се аз. И рече: пойми сына твоего возлюбленнаго, егоже возлюбил еси, Исаака, и иди на землю высоку, и вознеси его тамо во всесожжение, на едину от гор, ихже ти рех. Востав же Авраам утро, оседла осля свое. поят же с собою два отрочища, и Исаака сына своего, и растнив дрова во всесожжение, востав иде, и прииде на место, еже рече ему Бог, в третий день. И воззрев Авраам очима своима, виде место издалече. И рече Авраам отроком своим: сядите зде со ослятем: аз же и детищ пойдем до онде, и поклонившеся, возвратимся к вам. Взя же Авраам дрова всесожжения, и возложи на Исаака сына своего: взя же в руки и огнь, и нож, и идоста оба вкупе. Рече же Исаак ко Аврааму отцу своему: отче. он же рече: что есть чадо? рече же: се огнь и дрова, где есть овча еже во всесожжение? Рече же Авраам: Бог узрит Себе овча во всесожжение чадо. шедше же оба вкупе, Приидоста на место, еже рече ему Бог: и созда тамо Авраам жертвенник, и возложи дрова: и связав Исаака сына своего, возложи его на жертвенник верху дров. И простре Авраам руку свою, взяти нож заклати сына своего. И воззва и ангел Господень с небесе, и рече: Аврааме, Аврааме. он же рече: се аз. И рече: да не возложиши руки твоея на отрочища, ниже да сотвориши ему что: ныне бо познах, яко боишися ты Бога, и не пощадел еси сына твоего возлюбленнаго Мене ради. И воззрев Авраам очима своима виде, и се овен един держимый рогама в саде савек: и иде Авраам, и взя овна, и вознесе его во всесожжение вместо Исаака сына своего. И нарече Авраам имя месту тому, Господь виде: да рекут днесь, на горе Господь явися. И воззва ангел Господень Авраама вторицею с небесе, Глаголя: Мною Самем кляхся, глаголет Господь, егоже ради сотворил еси глагол сей, и не пощадел еси сына твоего возлюбленнаго Мене ради. Воистинну благословя благословлю тя, и умножая умножу семя твое, яко звезды небесныя, и яко песок вскрай моря, и наследит семя твое грады супостатов. И благословятся о семени твоем вси языцы земнии, занеже послушал еси гласа Моего.

Прокимен, псалом 103, глас 4: Яко возвеличишася дела Твоя Господи, вся премудростию сотворил еси. Стих: Благослови душе моя Господа, Господи Боже мой, возвеличился еси зело.

Притчей чтение. [Глава 17, ст. 17 – 28: глава 18, ст. 1 – 5.]

Братия в нуждах полезни да будут: сего бо ради раждаются. Муж безумен плещет и радуется себе, якоже поручаяйся испоручит друга своего, на своих же устнах огнь сокровищствует. Грехолюбец радуется сваром: а жестокосердый не усрящет благих. Муж удобопреложный языком, впадет в злая: сердце же безумнаго болезнь стяжавшему е: Не веселится отец о сыне ненаказаннем: сын же мудр веселит матерь свою. Сердце веселящееся благоиметися творит: мужу же печальну засышут кости. Приемлющему дары неправедно в недра не предуспевают путие: нечестивый же уклоняет пути правды. Лице разумно мужа премудра, очи же безумнаго на концах земли. Гнев отцу сын безумен, и болезнь рождшей его. Тщеты творити мужу праведну не добро: ниже преподобно наветовати властем праведным. Иже щадит глагол произнести жесток, разумен: долготерпеливый же муж премудр, лучше ищущаго науки. Несмысленному вопросившу о мудрости, мудрость вменится: нема же кто себе творит, возмнится разумен быти. Вины ищет муж хотя отлучитися от другов, на всякое же время поносимь будет. Не требует премудрости муж скудоумен, зане паче водится безумием. Егда приидет нечестивый во глубину зол, нерадит: находит же ему безчестие и поношение. Вода глубока слово в сердце мужа: река же изскачущая и источник жизни. Чудитися лицу нечестиваго не добро, ниже преподобно уклоняти праведное на суде.

И прочее последование Преждесвященных. На трапезе пием вино, труда ради бденнаго хотящаго быти. Повечерие же Малое, и Полунощницу, поем в келлиах. Канон мертвен гласа поем во гробнице.

В субботу пятыя седмицы, на Утрени,

знаменает в час четвертый нощи, молебнаго ради последования акафиста. И собравшеся в церковь: благословившу иерею, начинаем Утреню, якоже предписася начало Утрени в четверток Великаго канона. По шестопсалмии, Бог Господь: во глас 8, и поем трижды тропарь косно.

Глас 8:

Повеленное тайно прием в разуме, в крове Иосифове тщанием предста безплотный, глаголя Неискусобрачней: Приклонивый схождением небеса, вмещается неизменно весь в Тя. Егоже и видя в ложеснах Твоих приемша рабий зрак, ужасаюся звати Тебе: радуйся Невесто Неневестная.

Таже стихословим кафисму псалтира 16: Рече Господь Господеви моему: И по исполнении сея, ектениа малая, и поем кондак на среде, со сладкопением, косно. Глас 8:

Взбранной Воеводе победительная, яко избавльшеся от злых, благодарственная восписуем Ти раби Твои Богородице: но яко имущая державу непобедимую, от всяких нас бед свободи, да зовем Ти: Радуйся Невесто Неневестная.

На немже кадит диакон святыя иконы, и братию, по чину. На прочих же точию настоятеля и лики. И чтем икосов и кондаков 6. Стоим на чтении. Тии же икосы суть по алфавиту: сиесть, 24, и глаголются от иереа во святом олтаре.

{Α} Икос 1: Ангел предстатель с небесе послан бысть, рещи Богородице: радуйся! и со безплотным гласом воплощаема Тя зря Господи, ужасашеся и стояше, зовый к Ней таковая: радуйся, Еюже радость возсияет: радуйся, Еюже клятва исчезнет. Радуйся, падшаго Адама воззвание: радуйся, слез Евиных избавление. Радуйся, высото неудобовосходимая человеческими помыслы: радуйся, глубино неудобозримая и ангельскима очима. Радуйся, яко еси Царево седалище: радуйся, яко носиши Носящаго вся. Радуйся, звездо являющая Солнце: радуйся, утробо Божественнаго воплощения. Радуйся, Еюже обновляется тварь: радуйся, Еюже покланяемся Творцу. Радуйся Невесто Неневестная.

{Β} Кондак 2: Видящи святая Себе в чистоте, глаголет Гавриилу дерзостно: преславное твоего гласа неудобоприятельно души Моей является: безсеменнаго бо зачатия рождество како глаголеши, зовый: Аллилуиа.

{Γ} Икос 2: Разум недоразумеваемый, разумети Дева ищущи, возопи к служащему: из боку чисту, сыну како есть родитися мощно, рцы Ми? К Нейже он рече со страхом, обаче зовый сице: радуйся, совета неизреченнаго таиннице: радуйся, молчания просящих веро. Радуйся, чудес Христовых начало: радуйся, велений Его главизно. Радуйся, лествице небесная, еюже сниде Бог: радуйся, мосте преводяй сущих от земли на небо. Радуйся, ангелов многословущее чудо: радуйся бесов многоплачевный струпе. Радуйся, Свет неизреченно родившая: радуйся, еже како, ни единагоже научившая. Радуйся, премудрых превосходящая разум: радуйся, верных озаряющая смыслы. Радуйся Невесто Неневестная.

{Δ} Кондак 3: Сила Вышняго осени тогда к зачатию браконеискусную, и благоплодная Тоя ложесна, яко село показа сладкое, всем хотящим жати спасение, внегда пети сице: Аллилуиа.

{Ε} Икос 3: Имущи Богоприятную Дева утробу, востече ко Елисавети: младенец же оноя абие познав Сея целование, радовашеся, и играньми яко песньми вопияше к Богородице: радуйся, отрасли неувядаемыя розго: радуйся, плода безсмертнаго стяжание. Радуйся, Делателя делающая Человеколюбца: радуйся, Садителя жизни нашея рождшая. Радуйся, ниво, растящая гобзование щедрот: радуйся, трапезо, носящая обилие очищений. Радуйся, яко рай пищный процветаеши: радуйся, яко пристанище душам готовиши. Радуйся, приятное молитвы кадило: радуйся, всего мира очищение. Радуйся, Божие к смертным благоволение: радуйся, смертных к Богу дерзновение. Радуйся Невесто Неневестная.

{Ζ} Кондак 4: Бурю внутрь имея помышлений сумнительных, целомудренный Иосиф смятеся, к Тебе зря небрачней, и бракоокрадованную помышляя, Непорочная: уведев же Твое зачатие от Духа Свята, рече: Аллилуиа.

И паки кондак: Взбранной Воеводе: Чтем от слова акафиста, на даяния два. Таже стихословим Непорочны, и ектениа.

И паки глаголем кондак: Взбранной Воеводе: И другия икосы и кондаки, 6:

{Η} Икос 4: Слышаша пастырие ангелов поющих плотское Христово пришествие, и текше яко к Пастырю, видят Сего яко Агнца непорочна, во чреве Мариине упасшася, Юже поюще реша: радуйся, Агнца и Пастыря Мати: радуйся, дворе словесных овец. Радуйся, невидимых врагов мучение: радуйся, райских дверей отверзение. Радуйся, яко небесная срадуются земным: радуйся, яко земная сликовствуют небесным. Радуйся, апостолов немолчная уста: радуйся, страстотерпцев непобедимая дерзосте. Радуйся, твердое веры утверждение: радуйся, светлое благодати познание. Радуйся, Еюже обнажися ад: радуйся, Еюже облекохомся славою. Радуйся Невесто Неневестная.

{Θ} Кондак 5: Боготечную звезду узревше волсви, тоя последоваша зари: и яко светильник держаще ю, тою испытаху крепкаго Царя: и достигше Непостижимаго, возрадовашася Ему вопиюще: Аллилуиа.

{Ι} Икос 5: Видеша отроцы халдейстии на руку Девичу, Создавшаго рукама человеки, и Владыку разумевающе Его, аще и рабий прият зрак, потщашася дарми послужити Ему, и возопити Благословенней: радуйся, звезды незаходимыя Мати: радуйся, заре таинственнаго дне. Радуйся, прелести пещь угасившая: радуйся, Троицы таинники просвещающая. Радуйся, мучителя безчеловечнаго изметающая от начальства: радуйся, Господа Человеколюбца показавшая Христа. Радуйся, варварскаго избавляющая служения: радуйся, тимения изымающая дел. Радуйся, огня поклонение угасившая: радуйся, пламене страстей изменяющая. Радуйся, верных наставнице целомудрия: радуйся, всех родов веселие. Радуйся Невесто Неневестная.

{Κ} Кондак 6: Проповедницы богоноснии бывше волсви, возвратишася в Вавилон, скончавше Твое пророчество: и проповедавше Тя Христа всем, оставиша Ирода яко буесловяща, не ведуща пети: Аллилуиа.

{Λ} Икос 6: Возсиявый во Египте просвещение истины, отгнал еси лжи тьму: идоли бо его Спасе, не терпяще Твоея крепости, падоша. Сих же избавльшиися вопияху к Богородице: радуйся, исправление человеков: радуйся, низпадение бесов. Радуйся, прелести державу поправшая: радуйся, идольскую лесть обличившая. Радуйся море, потопившее фараона мысленнаго: радуйся, каменю, напоивший жаждущия жизни. Радуйся, огненный столпе, наставляяй сущия во тьме: радуйся, покрове миру, ширший облака. Радуйся пище, манны приемнице: радуйся, сладости святыя служительнице. Радуйся, земле обетования: радуйся, из неяже течет мед и млеко. Радуйся Невесто Неневестная.

{Μ} Кондак 7: Хотящу Симеону от нынешняго века претавитися прелестнаго, вдался еси яко Младенец тому: но познался еси ему и Бог совершенный. Темже удивися Твоей неизреченней премудрости, зовый: Аллилуиа.

И паки кондак: Взбранной Воеводе: Таже чтем прочее слова акафиста. Псалом 50. И каноны: святаго обители со ирмосом на 6: и Пресвятыя Богородицы на 6.

Творение господина Иосифа, егоже краестрочие: Радости приятелище, Тебе подобает радоватися единей. [Аще ли храм Богородицы, поем канон праздника Богородицы со ирмосом на 12. Ирмосы по дважды: тропари на 10.] Глас 4.

Песнь 1.

Ирмос: Отверзу уста моя:

{Χ} Христову книгу одушевленную, запечатленную Тя Духом, великий архангел Чистая, зря возглашаше Ти: радуйся, радости приятелище, Еюже праматерняя клятва разрешится.

{Α} Адамово исправление, радуйся Дево Богоневесто, адово умерщвление. Радуйся Всенепорочная, палато всех Царя: радуйся, престоле огненный Вседержителя.

{Ρ} Цвете неувядаемый, радуйся едина прозябшая яблоко благовонное. Радуйся рождшая благоухание единаго Царя. Радуйся Неискуобрачная, мирови спасение.

{Α} Чистоты сокровище, радуйся, Еюже от падения нашего востахом. Радуйся, сладкоуханный крине Владычице, верных благоухаяй, кадило благовонное, и миро многоценное.

Катавасиа: Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чудеса.

Песнь 3.

Ирмос: Твоя песнословцы Богородице:

{Σ} Клас прозябшая Божественный, яко нива неоранная яве, радуйся одушевленная трапезо, хлеб животный вмещшая. Радуйся, животныя воды источниче неистощаемый Владычице.

{Δ} Юнице Юнца рождшая непорочнаго, радуйся верным. Радуйся Агнице, рождшая Божияго Агнца, вземлющаго мира всего прегрешения. Радуйся теплое очистилище.

{Ο} Утро светлейшее, радуйся едина Солнца носящая Христа, света жилище. Радуйся, тьму разрушившая, и мрачныя бесы отнюд отгнавшая.

{Χ} Радуйся, двере едина, Еюже Слово пройде едино, вереи и врата адова, Владычице, Рождеством Твоим сокрушившая. Радуйся Божественный входе спасаемых, Богоневесто.

Катавасиа: Твоя песнословцы Богородице, живый и независтный источниче, лик себе совокупльшия духовно утверди, в божественней Твоей славе венцев славы сподоби.

Ектениа малая. И по возгласе, кондак: Взбранной Воеводе: И чтем другия шесть икосов и кондаков.

{Ν} Икос 7: Новую показа тварь явлься Зиждитель, нам от Него бывшим, из безсеменныя прозяб утробы, и сохранив Ю, якоже бе, нетленну. Да чудо видяще воспоим Ю, вопиюще: радуйся, цвете нетления: радуйся, венче воздержания. Радуйся, Воскресения образ облистающая: радуйся, ангельское житие являющая. Радуйся древо светлоплодовитое, от негоже питаются вернии: радуйся древо благосеннолиственное, имже покрываются мнози. Радуйся, во чреве носящая Избавителя плененным: радуйся, рождшая Наставника заблуждшим. Радуйся, Судии праведнаго умоление: радуйся, многих согрешений прощение. Радуйся, одеждо нагих дерзновения: радуйся, любы всякое желание побеждающая. Радуйся Невесто Неневестная.

{Ξ} Кондак 8: Странное рождество видевше, устранимся мира, ум на небеса преложше: сего бо ради высокий Бог, на земли явися смиренный Человек, хотяй привлещи к высоте, Тому вопиющия: Аллилуиа.

{Ο} Икос 8: Весь бе в нижних, и вышних никакоже отступи неописанное Слово: снизхождение бо Божественное, не прехождение же местное бысть, и рождество от Девы Богоприятныя, слышащия сия: радуйся, Бога невместимаго вместилище: радуйся, честнаго таинства двери. Радуйся, неверных сумнительное слышание: радуйся, верных известная похвало. Радуйся, колеснице пресвятая, Сущаго на херувимех: радуйся, селение преславное, Сущаго на серафимех. Радуйся, противная в тожде собравшая: радуйся, девство и рождество сочетавшая. Радуйся, Еюже разрешися преступление: радуйся, Еюже отверзеся рай. Радуйся, ключу Царствия Христова: радуйся, надеждо благ вечных. Радуйся Невесто Неневестная.

{Π} Кондак 9: Всякое естество ангельское удивися, великому Твоего вочеловечения делу: неприступнаго бо яко Бога, зряше всем приступнаго Человека, нам убо спребывающа, слышаща же от всех: Аллилуиа.

{Ρ} Икос 9: Ветия многовещанныя, яко рыбы безгласныя, видим о Тебе Богородице: недоумевают бо глаголати, еже како, и Дева пребываеши, и родити возмогла еси? Мы же таинству дивящеся, верно вопием: радуйся, премудрости Божия приятелище: радуйся, промышления Его сокровище. Радуйся, любомудрыя немудрыя являющая: радуйся, хитрословесныя безсловесныя обличающая: радуйся, яко обуяша лютии взыскателе: радуйся, яко увядоша баснотворцы. Радуйся, афинейская плетения растерзающая: радуйся, рыбарския мрежи исполняющая. Радуйся, из глубины неведения извлачающая: радуйся, многи в разуме просвещающая. Радуйся, кораблю хотящих спастися: радуйся, пристанище житейских плаваний. Радуйся Невесто Неневестная.

{Σ} Кондак 10: Спасти хотя мир, Иже всех Украситель, к сему самообетован прииде, и Пастырь сый яко Бог, нас ради явися по нам Человек: подобным бо подобное призвав, яко Бог слышит: Аллилуиа.

И паки кондак: Взбранной Воеводе:

Седален, глас 1.
Подобен: Гроб Твой:

Великий воин невещественных ангелов, во град Назарет, представ Царя возвещает Твоего Чистая, и веков Господа: радуйся, глаголя Тебе, благословенная Марие, непостижимая и несказанная глубино, человеков воззвание.

Слава, и ныне, тойже. И паки чтение.

Песнь 4.

Ирмос: Седяй в славе, на престоле Божества:

{Ε} Во гласех пений, Дево Тебе вопием Всепетая: радуйся, тучная горо и усыренная Духом. Радуйся свещниче, и стамно манну носящая, услаждающая всех благочестивых чувства.

{Ι} Очистилище миру, радуйся, Пречистая Владычице. Радуйся лествице, от земли всех возвысившая благодатию. Радуйся мосте, воистинну преводяй всех от смерти к животу поющих Тя.

{Ο} Небес превышшая, радуйся, земли основание, в Твоих ложеснах Пречистая, нетрудно носившая. Радуйся червленице, багряницу Божественную омочившая, от кровей Твоих, Цареви силам.

{Ν} Законодавца рождшая истиннаго, радуйся Владычице, беззакония всех туне очищающаго. Недоведомая глубино, высото неизреченная, браконеискусная, Еюже мы обожихомся.

{Σ} Тя исплетшую мирови нерукоплетенный венец песнословим, радуйся, Тебе Дево зовуще: хранилище всех и ограждение, и утверждение, и священное прибежище.

Катавасиа: Седяй в славе, на престоле Божества, во облаце легце, прииде Иисус Пребожественный, нетленною дланию, и спасе зовущия: слава Христе силе Твоей.

Песнь 5.

Ирмос: Ужасошася всяческая:

{Ο} Путь рождшая жизни, радуйся Пренепорочная, от потопа греховнаго мир спасшая: радуйся Богоневесто, слышание и глаголание страшное: радуйся пребывание Владыки твари.

{Ι} Крепость и утверждение человеков, радуйся Пречистая, место освящения славы, умерщвление адово, чертоже всесветлый. Радуйся ангелов радосте: радуйся помоще верно молящихся Тебе.

{Π} Огнеобразная колеснице Слова, радуйся Владычице, одушевленный раю, древо посреде имущи жизни Господа, егоже сладость оживотворяет верою причащающихся, и тли подклонившихся.

{Ρ} Укрепляеми силою Твоею, верно вопием Ти: радуйся, граде всех Царя, преславная и достослышанная о Нейже глаголана быша яве, горо несекомая: радуйся глубино неизмеримая.

{Ε} Пространное селение Слова, радуйся Пречистая, сосуде, Божественный бисер произведшая. Радуйся, всечудное всех к Богу примирение, блажащих Тя Богородице всегда.

Катавасиа: Ужасошася всяческая о Божественней славе Твоей: Ты бо Неискусобрачная Дево, имела еси во утробе над всеми Бога, и родила еси Безлетнаго Сына, всем воспевающим Тя мир подавающая.

Зде престает канон святаго обители.

Песнь 6.

Ирмос: Божественное сие и всечестное:

{Π} Чертоже Слова нескверный, вина всех обожения, радуйся Пречистая, пророков оглашение: радуйся, апостолов удобрение.

{Ε} От тебе роса укану, пламень многобожия угасившая. Тем вопием Ти: радуйся, руно одушевленное, еже Гедеон, Дево, предвиде.

{Ι} Се Тебе [Дево] радуйся, зовем: пристанище нам буди влающимся, и отишие в пучине скорбей, и соблазнов всех борителя.

{Χ} Радости вина, облагодати наш помысл, еже звати Тебе: радуйся неопалимая купино, облаче всесветлый, верныя непрестанно осеняющий.

Таже четверопеснец, егоже краестрочие: Сия песнь Иосифова. Глас 6.

Песнь 6.

Ирмос: Житейское море воздвизаемое:

Пострадавше мученицы, и яко камение избранное по земли валяющеся, зиждительство всякое врага совершенно превратиша, и храми Бога Живаго явишася.

Вас молим течение доброе совершивших мученицы, поста течение тещи нас добре укрепите, добродетелей совершением просиявших.

Рабы Твоя Владыко, преставльшияся от земли к Тебе преблагому, Твоего Царствия сотвори общники, божественных мученик Твоих священными ходатайствы, Многомилостиве.

Богородичен: Едина всепетая, поющим Тя верно, грехов оставление, и дарований Божественных часть датися, Всесвятому Слову молися, Мати Дево.

Иный, глас 5.

Ирмос: От кита пророка:

Память совершающе мученик, Господеви возслем песни, днесь божественно веселящеся.

Мечев и огня не убоявшеся, дерзающе в вере страстотерпцы, мучители в сем уязвисте.

Троичен: Троицу Лицы воспеваю Тя, Единице по Существу покланяюся, Тебе Отче, Сыне и Душе Святый.

Богородичен: Ангел и человек благохваление еси, яко родила еси Дево Христа, Спаса душам нашим.

Стих: Дивен Бог во святых Своих, Бог Израилев.

Смертию живот пременивше, радуетеся, на небесех живуще, страстотерпцы преславнии Христа Бога.

Стих: Души их во благих водворятся.

Смертию и животом обладаяй, верою преставльшияся от жития Христе, со святыми Твоими упокой.

Ирмос: От кита пророка избавил еси, мене же из глубины грехов возведи Господи, и спаси мя.

Ектениа малая.

И паки поем кондак: Взбранной Воеводе:

И чтем оставльшияся шесть икосов и кондаков.

{Τ} Икос 10: Стена еси девам Богородице Дево, и всем к Тебе прибегающим: ибо небесе и земли Творец устрои Тя Пречистая, вселься во утробе Твоей, и вся приглашати Тебе научив: радуйся, столпе девства: радуйся, дверь спасения: радуйся, начальнице мысленнаго наздания: радуйся, подательнице Божественныя благости. Радуйся, Ты бо обновила еси зачатыя студно: радуйся, Ты бо наказала еси окраденныя умом. Радуйся, тлителя смыслов упражняющая: радуйся, сеятеля чистоты рождшая. Радуйся, чертоже безсеменнаго уневещения: радуйся, верных Господеви сочетавшая. Радуйся, добрая младопитательнице девам: радуйся, невестокрасительнице душ святых. Радуйся Невесто Неневестная.

{Υ} Кондак 11: Пение всякое побеждается, спростретися тщащееся ко множеству многих щедрот Твоих: равночисленныя бо песка песни аще приносим Ти Царю Святый, ничтоже совершаем достойно, яже дал еси нам Тебе вопиющим: Аллилуиа.

{Φ} Икос 11: Светоприемную свещу, сущим во тьме явльшуюся, зрим святую Деву: невещественный бо вжигающи огнь, наставляет к разуму Божественному вся, зарею ум просвещающая, званием же почитаемая, сими. Радуйся, луче умнаго солнца: радуйся, светило незаходимаго света. Радуйся, молние души просвещающая: радуйся, яко гром, враги устрашающая. Радуйся, яко многосветлое возсияваеши просвещение: радуйся, яко многотекущую источаеши реку. Радуйся, купели живописующая образ: радуйся, греховную отъемлющая скверну. Радуйся, бане, омывающая совесть: радуйся чаше, черплющая радость. Радуйся, обоняние Христова благоухания: радуйся, животе тайнаго веселия, радуйся Невесто Неневестная.

{Χ} Кондак 12: Благодать дати восхотев долгов древних, всех долгов решитель человеком, прииде Собою ко отшедшим Того благодати: и раздрав рукописание, слышит от всех сице: Аллилуиа.

{Ψ} Икос 12: Поюще Твое Рождество, хвалим Тя вси, яко одушевленный храм Богородице: во Твоей бо вселився утробе, содержай вся рукою Господь, освяти, прослави, научи вопити Тебе всех: радуйся, селение Бога и Слова: радуйся, святая святых большая. Радуйся, ковчеже позлащенный Духом: радуйся, сокровище живота неистощимое. Радуйся, честный венче царей благочестивых: радуйся, честная похвало иереев благоговейных. Радуйся, Церкве непоколебимый столпе: радуйся, царствия нерушимая стено. Радуйся, Еюже воздвижутся победы: радуйся, Еюже низпадают врази. Радуйся, тела моего врачевание: радуйся, души моея спасение. Радуйся Невесто Неневестная.

{Ω} Кондак 13: О всепетая Мати, рождшая всех святых Святейшее Слово, нынешнее приемши приношение, от всякия избави напасти всех, и будущия изми муки, Тебе вопиющих: Аллилуиа.

Сей кондак глаголи трижды.

И паки чтется 1-й икос: Ангел предстатель: И паки кондак: Взбранной Воеводе:

Таже чтутся Синаксарий: первее Минеи: таже настоящий.

Стихи: Песньми неусыпными благодарственно,

Град во бранех бодрую поет предстательницу.

В сей день неседальную песнь празднуем Пресвятыя Владычицы нашея Богородицы, вины ради сицевы: Ираклию самодержавное Греческое начальство правящу, Хосрой же Персский царь, видев греческая скиптра смирившася, от Фоки царя мучителя, единаго от вельмож своих Сарвара именем, с тысящами многими воинств посылает, вся восточныя страны покорити себе. Предвари бо и прежде, яко десять тем христиан погубив Хосрой: яко жидовом прекупляющим их от него и погубляющим. Начальный же вельможа Сарвар, востоки вся попленив, постиже и до самаго златаго града, иже ныне Скутарь нарицается. Царь бо Ираклий имением общаго злата оскудев священныя сосуды церковныя на златницы претворив, во отдаяние большее и совершеннейшее. По Евксинскому же морю с корабли в Персидския страны пришед, потребляет я: и отнюд побеждается, от него Хосрой с прочими воинствы. Помале же и Сирой сын Хосроев, от отца своего отступив начальство себе приемлет, и отца Хосроя убив, царю Ираклию содружися. Хаган же мисонский, и скифский начальник уведев о царе, яко по морю понтскому отшел есть разрешив мир на греки, полки тьмочисленныя подвиг, от западных стран на Константинь град приходит, на Бога хульныя гласы возсылая. Абие же купно море убо корабльми, земля же пешими и всадники безчисленными исполнь бяше. Сергий же патриарх Константиня града, люди много утешаше, не отпадати, ни разслаблятися: но все упование от души на Бога возносити, и на Матерь Его Пречистую Богородицу: такоже и Вонос Патрикий, иже тогда град правляше, подобная на отвращение ратников устрояше. Подобает бо и нам с помощию вышнею, и на приличная действовати. Патриарх же божественныя иконы Богоматере, со всем множеством нося обхождаше по стенам свыше, и оттуду утверждение им подавая. Яко убо Сарвар от востока, Хаган же от запада идяста, сожещи окрестная града: патриарх же нерукотворенную Христову икону, и честная и животворящая древа, к сему же и честную ризу Богоматере нося, по стенам обхождаше. Хаган же скифянин сушею, стенам Константиня града нападает, со множеством безчисленным, крепкоизрядно оружии утверждени: и толико множество бяше, яко единому гречину с десятми скифяны яве братися. Но необоримая Поборница, обретшимися малыми зело воины в храме Ея, нарицаемем Пигии, множайшия их погуби. Отсюду же грецы дерзновение приемше, и восплескавше, от Воеводы необоримыя Божия Матере, их присно до конца побеждаху. Воззревше же и на примирение, граждане отражени быша. Отвеща бо им Хаган: не прельщайтеся о Бозе, в Негоже веруете, всячески бо утре град ваш прииму. Граждане же слышавше, руки к Богу простираху. Согласившеся убо, Хаган же и Сарвар сушею и морем на град устремляются, козньми пленити желающе: но толико побеждени быша от грек, якоже недовольным быти живым мертвыя жещи. Моноксила же оружников исполнена, недром глаголемым рогом, ко храму Богоматере сущему во Влахернах, бури внезапу сильне морю припадши, и раздельшуся ему в сечение, с корабли всеми врагов растлешася. И бяше видети то преславное изряднодействие Пречистыя и Богоматере, всех при брезе моря сущему во Влахернах извре. Людие же, елико скоро врата отверзше, вкупе вся избиша, и дети и жены на ня вмужествившияся. Начальницы же их возвратишася плачуще купно и рыдающе. Боголюбивии убо людие Константиня града, Богоматери благодарение дающе, всенощную песнь, и неседальную Ей воспеша, яко о оных бдевши, и преестественною силою содеявши на враги победу. Оттоле убо на воспоминание толикаго и преестественнаго чудесе Церковь сицевый праздник прият, Матери Божии возлагати в настоящее время, егда и поведа Богоматерию бысть. Неседальное же именовася, за еже тогда тако деяти градскому же клиросу, и людем всем. По прехождении же тридесяти и шести лет, при царстве Константина Погоната, агаряне безчисленное воинство водяще, паки на Константинь град нападоша, и седмь лет сей борюще, егда и в Кизических странах презимоваху, многия своя погубиша. Таже отрекшеся брани, и с воинством своим возвращающееся, и бывше в мори нарицаемем Силео, вси потопишася, предстательством Всечистыя и Богоматере. Но и в третие паки, при Льве Исавре, агаряне паче множайших тем числом, первее убо Персское разоряют царство, таже Египет и Ливию. Обтекше же и Индию, Ефиопию же и Испанию, напоследок же и на самый царский град воюют, тысящию осмию сот кораблей носими: окруживше убо его, яко абие расхитити его ждаху. Градстии же священнии людие, честное древо честнаго и животворящаго Креста, и честную икону Богоматере Одигитрии обносяще, стену окружаху, со слезами Бога умилостивляюще. Возмечтася убо, сице агаряном на две части разделитися: и овии убо на болгары воюют, и тамо падают вящше двою тму: овии же оставльшеся на царь град приити, возбранившеся же от вериги, бывшия от Галаты до стен царя града. Восплывшим же негде до места нарицаемаго Сосфен, тамо ветру северну возвеявшу, многи корабли их сокрушишася, и погибоша: оставльшиися же в глад зельный впадоша, яко и плотем человеческим прикоснутися, и кал месити и ясти. Таже бежавше, и во Егейскую пучину достигше, кораблецы своя вся, и самех себе глубине морской предаша: град бо силен с небесе спад, возврение моря сотворив, смолу кораблей распусти: и тако множество безчисленное оное воинских кораблей погибе, трем токмо на возвещение оставльшимся. Сих ради убо всех преестественных чудес Всечистыя и Богоматере, настоящий праздник празднуем. Неседальный же речеся, зане просто стояще тогда вси людие в нощь оную, Слова Матери песнь воспеша. И яко во всех иных седети от обычая имуще, в настоящих Богоматере, прости вси слушаем. Твоея поборницы же и непоборимыя Матере молитвами, Христе Боже, от облежащих напастей и нас избави, и помилуй нас яко един Человеколюбец.

Песнь 7.

Ирмос: Не послужиша твари:

{Α} Воспеваем Тя вопиюще: радуйся, колеснице солнца умнаго, лозо истинная, грозд зрелый возделавшая, вино источающий, души веселящее верою Тя славящих.

{Ι} Врача всех человек рождшая, радуйся Богоневесто, жезле тайный, цвет неувядаемый процветший, радуйся Владычице, Еюже радости наполняемся, и жизнь наследствуем.

{Ρ} Ветийствующий не может язык Владычице песнословити Тя, паче бо серафимов возвысилася еси, рождши Царя Христа. Егоже моли граду сему избавитися от многих искушений.

{Ε} Хвалят Тя блажаще концы, и любовию зовут Тебе: радуйся свитче, в немже перстом написася Отчее Слово Чистая. Егоже моли, в книги животныя, рабом Твоим написатися Богородице.

{Ι} Молим раби Твои, и приклоняем колено сердца нашего: приклони ухо Твое Чистая, и спаси скорбьми погружаемыя присно, и соблюди от всякаго вражия пленения Твой град Богородице.

Иный, глас 6.

Ирмос: Росодательну:

Пресветлое собрание божественных Твоих мучеников Многомилостиве, во свете Твоем незаходимем ныне жительствует. Тех молитвами просвещение, и грехов очищение подаждь всем Христе.

Коль красное время, еже нам дал еси воздержания Господи: в немже ущедри души наша яко Благ, молитвами святых страдалец, красныя и честныя возлюбивших страсти Твоя.

Прешедшия многоболезненную бурю жития рабы Твоя, устреми в пристанище Владыко жизни, вопити со всеми избранными: благословен еси Господи Боже отец наших.

Богородичен: Закона Дателя Приснодево рождшая моли, беззакония отъяти вся, во время ныне настоящее, добре произволившим обучатися божественнаго поста тщанием.

Иный, глас 5.

Ирмос: Благословен еси:

Благословен еси Боже, показавый доблия о Тебе страждущия мученики, препетый и препрославленный.

Благословен еси Боже, страстотерпцы молитвенники нам к Тебе подаваяй, препетый и препрославленный.

Троичен: Благословен еси Боже, един убо Естеством, Лицы же треми познаваемый, препетый и препрославленный.

Богородичен: Благословен еси Боже, рождейся безсеменно, и Рождшую показавый чистотствующую, препетый и препрославленный.

Стих: Святым иже суть на земли Его, удиви Господь вся хотения Своя в них.

Благословен еси Боже, звери укротивый, и погасивый огнь, в славу святых Твоих, препетый и препрославленный.

Стих: Блажени, яже избрал, и приял еси Господи.

Благословен еси Боже, от смерти в безконечный живот преложивый, верою в житии послужившия Тебе.

Ирмос: Благословен еси Боже, видяй бездны, и на престоле славы седяй, препетый и преславный.

Песнь 8.

Ирмос: Отроки благочестивыя:

{Ν} Ложесны Слово прияла еси, вся носящаго носила еси, млеком питала еси, манием питающаго вселенную всю, Чистая, Емуже поем: Господа пойте дела, и превозносите во вся веки.

{Μ} Моисей уразуме в купине великое таинство Рождества Твоего: отроцы же прообразиша сие явственнее посреде огня стояще, и не опаляеми, нетленная святая Дево. Тем Тя почитаем во вся веки.

{Ο} Прежде прелестию обнажившиися в ризу нетления облекохомся Рождеством Твоим: и седящии во тьме прегрешений, свет видехом, света жилище Отроковице. Тем Тя поем во вся веки.

{Ν} Мертвии Тобою оживляются, Жизнь бо ипостасную родила еси, немии прежде, благоглаголиви бывают, прокаженнии очищаются, недузи отгоняются, духов воздушных множества побеждаются, Дево человеков спасение.

{Η} Миру рождшая спасение, имже от земли на высоту взяти быхом, радуйся всеблагословенная, покрове и державо, стено и утверждение, поющим Чистая: Господа пойте дела, и превозносите во вся веки.

Иный.

Ирмос: Из пламене преподобным росу:

Святых мученик исправлением, небеснии умове преудивишася: тех молитвами, милости Твоя Владыко в нас богатно удиви, Щедре.

Огнь Божественною росою поправшии, страдальцы Господни досточуднии, избавите нас огня мучащаго, ко Владыце теплыми вашими молитвами.

Преблагий Слове, отшедшия от нас православно, жизни сподоби яже на небесех, и святыя светлости, добропобедных мученик молитвами.

Богородичен: Молитвами Щедре, Рождшия Тя, и святых мученик, и апостол Твоих, просвети наша души, еже славити Тя, в веселии душевнем во веки.

Иный.

Ирмос: Творца твари, Егоже ужасаются ангели:

Лицы мученик святии, помяните любовию воспевающия вы, и превозносящия Христа во веки.

Мечем усекаеми, радовахуся мученицы, поюще Христа, и превозносяще во вся веки.

Благословим Отца, и Сына, и Святаго Духа, Господа.

Троичен: Страннолепно разделяется Троица, и пребывает нераздельна яко Бог: Юже превозносим во вся веки.

Богородичен: Дева Младенца роди, Бог бо из Нея вочеловечися: вся тварь да поет Его во веки.

Стих: Дивен Бог во святых Своих, Бог Израилев.

Столпи мужества явишася, падением диаволим радующеся мученицы, поюще Христа и превозносяще во веки.

Стих: Души их во благих водворятся.

У Авраама внедритися сподоби Господи рабы Твоя, верою преставльшияся к Тебе, и надеждею.

Хвалим, благословим, покланяемся Господеви:

Ирмос: Творца твари, Егоже ужасаются ангели, пойте людие, и превозносите во вся веки.

Песнь 9.

Ирмос: Всяк земнородный:

{Ι} Да Тебе вернии, радуйся зовем Тобою радости причастницы бывше присносущныя, избави нас напастей, варварскаго пленения, и всякия иныя раны, за множество Отроковице прегрешений, находящия человеком согрешающим.

{Ω} Явилася еси просвещение наше и утверждение. Темже вопием Ти: радуйся звездо незаходимая, вводящая в мир великое Солнце. Радуйся, Едем отверзшая заключенный Чистая. Радуйся сосуде, миро неистощимое на Тя излиянное приемший.

{Σ} Станем благоговейно в дому Бога нашего, и возопиим: радуйся, миру Владычице. Радуйся Марие, Госпоже всех нас. Радуйся, едина непорочная в женах и добрая. Радуйся, столпе огненный, вводящий в вышнюю жизнь человечество.

{Η} Голубице милостиваго рождшая, радуйся Приснодево: преподобных всех, радуйся похвало, страдальцев венчание. Радуйся всех праведных Божественное удобрение, и нам верным спасение.

{Φ} Пощади Боже наследие Твое, грехи наша вся презрев ныне, на сие имея молящую Тя, на земли безсеменно Тебе Рождшую, великия ради милости восхотевшаго вообразитися Христе в человечество.

Иный.

Ирмос: Бога человеком невозможно:

Яко свет, яко солнце возсиявше, всю землю лучами благочестия мученицы, и светилами чудес просветиша, и многобожия тьму разгнаша: ихже молитвами Боже, помилуй нас.

Воинство мучеников непобедимое, всех нас укрепи добре подвизатися, и совершити поста поприще: яко да Божественнаго жития дело совершивше, причастницы будем жизни, веселящеся.

Твоя да предварит благость Господи, от нас страшным преставльшихся повелением Твоим: да окружит их Твоя милость, и да наставит к селением просвещенным светом лица Твоего.

Богородичен: Гласом ангеловым совета Отча Ангела, неизреченно Богородице родила еси: гласы убо рабов Твоих приими, яже во время поста приносим, и сия принеси Богу якоже кадило.

Иный.

Ирмос: Исаие ликуй:

Совершающе торжество мученическое, днесь людие воскликнем песньми, поюще Христу подвигоположнику, и победы на враги им подавшему: Егоже в песнех величаем.

Ноготьми растерзаеми, и усецаеми мечем на уды, совокупистеся Христу любезно, всехвальнии мученицы. Тем и ныне на небесех веселящеся, о всех молитеся.

Троичен: Едино Существом воспеваю Тя безначальная Троице, честная, живоначальная, несекомая Единице, Отче нерожденный, и рожденный Слове и Сыне, Душе Святый нас спаси поющих Тя.

Богородичен: Паче ума Рождество Твое Богомати, без мужа бо зачатие в Тебе, и девственно рождение бысть: ибо Бог есть родивыйся, Егоже величающе, Тя Дево ублажаем.

Стих: Святым, иже суть на земли Его:

Доблее воинство Царя всех и Бога, мучеников песньми венчаим людие: тии бо победиша бесовския полки яве, яже воспевающе, Владыку величаем.

Стих: Блажени, яже избрал, и приял еси Господи.

Егда все создание Твое возставиши судитися Христе, яже приял еси, и ныне рабы Твоя верныя помилуй, прости яже в житии прегрешения их, и со святыми Твоими упокой я во веки.

Ирмос: Исаие ликуй, Дева име во чреве, и роди Сына Еммануила, Бога же и Человека, Восток имя Ему: Егоже величающе, Деву ублажаем.

Ексапостиларий.
Подобен: Жены услышите:

Еже от века днесь познавается таинство: Божие Бог Слово, Сын Девы Марии за милосердие бывает. И радость Благовещения Гавриил провещавает, с нимже возопиим вси: радуйся Мати Господня.

На хвалитех: Всякое дыхание: Поставим стихов 4: и поем стихиры, глас 4.
Подобен: Яко добля:

Сокровенное таинство, и ангелом неведомое, Гавриил уверяет архангел, и к Тебе ныне приидет единей нетленней и добрей голубице, и рода нашего воззванию, и возопиет Тебе Пресвятая, еже радуйся: уготовися словом, Бога Слова, Твоими ложеснами прияти.

Светоносная палата уготовася Тебе Владыко, утроба чистая Богоотроковицы: гряди к Сей и сниди, ущедри создание Твое, завистно брань приимшее, и работою удержанное льстиваго, и доброту первую погубившее, и Твоего спасительнаго чающее сошествия.

Гавриил архангел, к Тебе Всенепорочная, явленно приидет, и возопиет Тебе: радуйся клятвы разрешение, падших востание. Радуйся, едина избранная Богу бывшая. Радуйся, колеснице солнца славы: приими Безплотнаго, во утробе Твоей вселитися хотящаго.

Слава, и ныне, самогласен, глас 4:

Языка, егоже не ведяше, услыша Богородица, глаголаше бо к ней архангел Благовещения глаголы: отнюдуже верно приимши целование, зачат Тя Превечнаго Бога. Темже и мы радующеся вопием Ти: из Нея воплотивыйся непреложно Боже, мир мирови даруй, и душам нашим велию милость.

Славословие великое и отпуст.

 

На Литургии

изобразительная. И от канона акафиста, песнь 3 и 6.

Прокимен, глас 3: Песнь Богородицы: Величит душа Моя Господа, и возрадовася дух Мой о Бозе Спасе моем. Стих: Яко призре на смирение Рабы Своея: се бо от ныне ублажат Мя вси роди.

Апостол дне ко Евреем, зачало 322. [Евр. 9, 24 – 28.]

 

Братие, не в рукотворенная святая вниде Христос, противообразная истинных, но в самое небо, ныне да явится лицу Божию о нас,	Братья, Христос вошел не в рукотворенное святилище, по образу истинного устроенное, но в самое небо, чтобы предстать ныне за нас пред лице Божие,
Ниже да многажды приносит Себе, якоже первосвященник входит во святая (святых) по вся лета с кровию чуждею:	И не для того, чтобы многократно приносить Себя, как первосвященник входит во святилище каждогодно с чужою кровью;
Понеже подобаше бы Ему множицею страдати от сложения мира: ныне же единою в кончину веков, во отметание греха, жертвою Своею явися.	Иначе надлежало бы Ему многократно страдать от начала мира; Он же однажды, к концу веков, явился для уничтожения греха жертвою Своею.
И якоже лежит {определено есть} человеком единою умрети, потом же суд,	И как человекам положено однажды умереть, а потом суд,
Тако и Христос единою принесеся, во еже вознести многих грехи, второе без греха явится, ждущим Его во спасение.	так и Христос, однажды принеся Себя в жертву, чтобы подъять грехи многих, во второй раз явится не для очищения греха, а для ожидающих Его во спасение.

И Богородицы, от тогоже послания, зачало 320. [Евр. 9, 1 – 7.]

 

Братие, имеяше убо первая скиния оправдания службы, святое же людское:	Братья, первый завет имел постановление о Богослужении и святилище земное:
Скиния бо сооружена бысть первая, в нейже светильник и трапеза и предложение хлебов, яже глаголется святая.	Ибо устроена была скиния первая, в которой был светильник, и трапеза, и предложение хлебов, и которая называется "святое".
По вторей же завесе скиния глаголемая Святая святых,	За второю же завесою была скиния, называемая "Святое-святых",
Злату имущи кадильницу и ковчег завета окован всюду златом, в немже стамна злата имущая манну, и жезл Ааронов прозябший, и скрижали завета:	Имевшая золотую кадильницу и обложенный со всех сторон золотом ковчег завета, где были золотой сосуд с манною, жезл Ааронов расцветший и скрижали завета,
Превышше же eго херувими славы, осеняющии oлтарь: о нихже не леть ныне глаголати подробну.	А над ним херувимы славы, осеняющие очистилище; о чем не нужно теперь говорить подробно.
Сим же тако устроeным, в первую убо скинию выну вхождаху священницы, службы совершающе:	При таком устройстве, в первую скинию всегда входят священники совершать Богослужение;
Во вторую же eдиною в лето eдин архиерей, не без крове, юже приносит за себе и о людских невежествиих.	А во вторую – однажды в год один только первосвященник, не без крови, которую приносит за себя и за грехи неведения народа.

Аллилуиа, глас 8: Воскресни Господи в покой Твой: Стих: Помяни Господи Давида, и всю кротость его.

Евангелие дне, от Марка, зачало 35. [Мк. 8, 27 – 31.]

 

Во время оно, изыде Иисус и ученицы Его в веси Кесарии Филипповы: и на пути вопрошаше ученики Своя, глаголя им: кого Мя глаголют человецы быти?	Во время оно, пошел Иисус с учениками Своими в селения Кесарии Филипповой. Дорогою Он спрашивал учеников Своих: за кого почитают Меня люди?
Они же отвещаша: Иоанна Крестителя: и инии Илию: друзии же единаго от пророк.	Они отвечали: за Иоанна Крестителя; другие же – за Илию; а иные – за одного из пророков.
И Той глагола им: вы же кого Мя глаголете быти? Отвещав же Петр глагола Ему: Ты еси Христос.	Он говорит им: а вы за кого почитаете Меня? Петр сказал Ему в ответ: Ты Христос.
И запрети им, да ни комуже глаголют о Нем.	И запретил им, чтобы никому не говорили о Нем.
И начат учити их, яко подобает Сыну Человеческому много пострадати, и искушену быти от старец и архиерей и книжник, и убиену быти, и в третий день воскреснути.	И начал учить их, что Сыну Человеческому много должно пострадать, быть отвержену старейшинами, первосвященниками и книжниками, и быть убиту, и в третий день воскреснуть.

И Богородицы, от Луки, зачало 54. [Лк. 10, 38 – 42; 11, 27 – 28.]

 

Во время оно, вниде Иисус в весь некую: жена же некая именем Марфа прият Его в дом свой:	Во время оно, пришел Иисус в одно селение; здесь женщина, именем Марфа, приняла Его в дом свой;
И сестра ей бе нарицаемая Мариа, яже и седши при ногу Иисусову, слышаше слово Его.	У ней была сестра, именем Мария, которая села у ног Иисуса и слушала слово Его.
Марфа же молвяше о мнозе службе, ставши же рече: Господи, не брежеши ли, яко сестра моя едину мя остави служити? рцы убо ей, да ми поможет.	Марфа же заботилась о большом угощении, и подошедши сказала: Господи! или Тебе нужды нет, что сестра моя одну меня оставила служить? скажи ей, чтобы помогла мне.
Отвещав же Иисус рече ей: Марфо, Марфо, печешися и молвиши о мнозе,	Иисус же сказал ей в ответ: Марфа! Марфа! ты заботишься и суетишься о многом,
Едино же есть на потребу. Мариа же благую часть избра, яже не отымется от нея.	А одно только нужно. Мария же избрала благую часть, которая не отнимется у нее.
Бысть же егда глаголаше сия, воздвигши некая жена глас от народа, рече ему: блажено чрево носившее Тя, и сосца, яже еси ссал.	Когда же Он говорил это, одна женщина, возвысивши голос из народа, сказала Ему: блаженно чрево, носившее Тебя, и сосцы, Тебя питавшие!
Он же рече: темже убо блажени слышащие слово Божие и хранящии е.	А Он сказал: блаженны слышащие слово Божие и соблюдающие его.

Причастен: Чашу спасения прииму, и имя Господне призову.

На трапезе ядим два варения с елеем, и пием вино, благодаряще Всесвятую Владычицу нашу Богу о бывшем от Нея чудеси.