"Утоли моя печали"

Утоли болезни/ многовоздыхающия души моея,/ утолившая всяку слезу от лица земли,/ Ты бо человеком болезни отгониши/ и грешных скорби разрушаеши,/ Тебе бо вси стяжахом надежду и утверждение,// Пресвятая Мати Дево.

Не ввери мя человеческому предстательству,/ Пресвятая Владычице,/ но приими моление раба Твоего,/ скорбь бо обдержит мя,/ терпети не могу демонскаго стреляния,/ покрова не имам,/ ниже где прибегну, окаянный,/ всегда побеждаем,/ и утешения не имам, разве Тебе, Владычице мира,/ упование и предстательство верных,/ не презри моление мое,// полезно сотвори.