В субботу вечера на Малей вечерни, стихиры на 4. Глас 6.
Подобен: Ангельския:

Ныне ангельская воинства копиеносят Древо честное, благоговейно окружающа, и вся созывающа верныя на поклонение. Приидите убо постом просветившиися, припадем ему радостию и страхом, верно зовуще: радуйся честный Кресте, миру утверждение. [Дважды.]

Да Адамову потребиши клятву, плоть нашу приемлеши кроме скверны, распинаешися же и умираеши, Иисусе преблагий: темже Крест Твой, и копие, губу же и трость, гвоздие верно почитаем, и Воскресение Твое видети просим.

Заключает Едем древом древле змий, древо же Креста отверзает сей всем хотящим постом и слезами очиститися. Приидите убо предлежащее видяще, тому припадем со страхом вернии зовуще: отверзи врата небесная Кресте, любящим тя.

Слава, и ныне.
Подобен:

Егда Кресту пригвождена виде Слове Божий, безсеменно Тебе Рождшая, взываше вопиющи: увы Мне Чадо сладчайшее, кое Твое смирение Боже Мой? Како безстрастный страсть терпиши, неправедным судом? Песнословлю Твое страшное крайнее снизхождение.

На стиховне стихиры подобны. Глас 2:
Подобен: Доме Евфрафов:

Разрешившеся уз древняго осуждения, вернии древом Креста, на нем пригвожденнаго Христа славословим.

Стих: Возносите Господа Бога нашего, и покланяйтеся подножию ногу Его, яко свято есть.

Прииди ныне с нами Давиде, цевницу движи, Христа возносите поя, вернии поклонитеся Его подножию.

Стих: Бог же Царь наш прежде века, содела спасение посреде земли.

Вознесем людие предлежащее Древо, имже спасение нам Христос подает, и верою целуем.

Слава, и ныне, глас и подобен тойже:

Крестобогородичен: Вознесена на Кресте, за человеки, видящи Твоего Сына Дево, вопияше рыдающи: слава благоутробию Твоему.

Таже, Ныне отпущаеши: Трисвятое. По Отче наш:

Тропарь, глас 1: Спаси Господи люди Твоя, и благослови достояние Твое, победы православным христианом на сопротивныя даруя, и Твое сохраняя Крестом Твоим жительство.

И бывает отпуст. По отпусте же входит священник со екклисиархом в сосудохранильницу, и вземлют честное Древо, предыдущу свещнику и кадилу, поющим тропарь: Спаси Господи люди Твоя: И приносят на святую трапезу, и вжигают свещу на всю нощь.

На Велицей вечерни,

благословляет священник, и поем яко обычно предначинательный псалом. Таже стихословие, первая кафисма.

На Господи воззвах, поставим стихов 10, и поем стихиры воскресны осмогласника 3, и анатолиевы 3, и честнаго Креста 4, глас 5:
Подобен: Радуйся постников:

Возсияй Господень Кресте, светолучныя молния твоея благодати, в сердца чтущих тя, и Богоприятною любовию приемлющих, мировожделенне, имже слезное потребися сетование, и смертных сетей избавихомся, и к присному веселию приидохом. Покажи красоты твоея благолепие, воздаяние подаждь воздержания рабом твоим, верно просящим твое богатное заступление, и велию милость.

Радуйся живоносный Кресте, Церкве красный раю, древо нетления, прозябшее нам вечныя славы наслаждение: иже бесовстии отгоняются полцы, и ангельстии свеселятся чинове, и совокупления верных празднуют. Оружие непобедимое, утверждение нерушимое, верных победо, священников похвало, Христовы ныне страсти и нам подаждь достигнути, и велию милость.

Радуйся живоносный Кресте, благочестия непобедимая победа, дверь райская, верных утверждение, Церкве ограждение: имже тля разорися и упразднися, и попрася смертная держава, и вознесохомся от земли к небесным: оружие непобедимое, бесов сопротивоборче, славо мучеников, преподобных яко воистинну удобрение, пристанище спасения, даруяй миру велию милость.

Гряди первозданная двоице, лика отпадшая горних, завистию человекоубийцы, горькою сластию древа, древле вкушением. Се всечестное воистинну Древо предгрядет, к немуже притекше радостию облобызайте, и возопийте к нему с верою: ты наше воззвание, Кресте всечестный, древо Богоблаженное, саде небесный: егоже плода причастившеся, нетление улучихом, Едема перваго приемше известно, и велию милость.

Слава, глас 3: Христе Боже наш, вольное распятие во общее воскресение рода человеческаго восприемый, и тростию Креста, обагрением червленым Своя персты окровавивый, оставительная нам царски подписати человеколюбствовавый, не презри нас бедствующих, и паки от Тебе разстояние: но ущедри Едине долготерпеливе, во обстоянии люди Твоя, и востани, побори борющия ны, яко всесилен.

И ныне, Богородичен гласа. Вход. Свете тихий:

Прокимен: Господь воцарися:

Ектениа, и прочее яко обычно.

На литии стихира храма.

Слава, и ныне, глас 5: Зрящи Тя тварь вся на Кресте нага висяща, Содетеля и Зиждителя всех, изменяшеся страхом, и рыдаше: солнце же свет омрачи, и земля колебашеся, камение же разседашеся, и храма светлость раздирашеся. мертвии восташа от гробов, и ангельския силы ужасошася, глаголюще: о чудесе! Судия судится, и страждет хотя за спасение мира, и обновление.

На стиховне стихиры осмогласника, яже по алфавиту.

Слава, и ныне, глас 4: Пособивый Господи кроткому Давиду победити иноплеменника, верным людем нашим споборствуй, и оружием Креста низложи враги наша: покажи благоутробне на нас древния милости Твоя, и да разумеют воистинну, яко Ты еси Бог: и на Тя надеющиися побеждаем, молящиися обычно Пречистей Твоей Матери, дароватися нам велицей милости.

Тропарь, Богородице Дево радуйся: дважды: и крестный единожды, глас 1: Спаси Господи люди Твоя.

И прочее последование бдения: яко обычно.

 

На Утрени

по шестопсалмии, Бог Господь, во глас осмогласника, и глаголем тропарь воскресный, дважды. Слава, крестный: Спаси Господи люди Твоя: И ныне, Богородичен: Гавриилу вещавшу:

И обычное стихословие. Седальны глаголем воскресны.

По полиелеи, [аще где храм честнаго Креста] седален Креста, глас 8.
Подобен: Повеленное тайно:

В раи убо прежде древом обнажи о вкушении враг, нанося умерщвление: Креста же древо, живота одеяние человеком нося, наведе на земли, и мир весь исполнися всякия радости. Егоже видяще покланяема, Богу в вере людие согласно воззовем: исполнь храм славы Его. [Дважды.]

Степенна гласа. Евангелие утреннее. Воскресение Христово: псалом 50.

Слава, глас 8: Покаяния отверзи ми двери: И ныне: На спасения стези: Таже, глас 6: Помилуй мя Боже: Множества содеянных мною лютых:

Канон воскресен, и Богородицы, на 6: таже Триоди на 8, творение господина Феодора Студита. Глас 1.

Песнь 1.

Ирмос: Воскресния день, просветимся людие:

Торжества день, востанием Христовым, смерть безвестна показася, жизни возсия заря, Адам востав ликует радостию: темже воскликнем, победную поюще.

Поклонения день честнаго Креста, приидите к сему вси: востания бо Христова зари, светосияяй предлагает ныне, того облобызаим душевно радующеся.

Явися великий Господень Кресте, покажи ми зрак Божественный красоты твоея ныне, достойно поклонника хвалы твоея: ибо яко одушевленну тебе, и возглашаю, и облобызаю тя.

Да восхвалят согласно небо и земля, яко предлежит всем всеблаженнейший Крест, на немже пригвожден телесне пожреся Христос: того лобызаим душевно радующеся.

Слава, Троичен: О Троице начертаньми! О Единице зраком! Отче, Сыне, и Душе, единосильная Единице, в совете и хотении, и державы начале, мир Твой сохрани, мир подающи.

Богородичен: Искуса никакоже ведущи мужеска Дево, безсеменно раждаеши Младенца, чисто носиши рождение, мира Творца Христа Бога: Того моли умирити всяческая.

Катавасиа: Божественнейший прообрази древле Моисей, в Чермнем мори провед Израиля Крестом Твоим, воду жезлом пресек, песнь Тебе исходную воспевая Христе Боже.

Песнь 3.

Ирмос: Приидите, пиво пием:

Приидите, песнь поим нову, разрушение адово торжествующе: из гроба бо Христос воскресе, смерть пленив, и спасе всяческая.

Приидите, почерпем вернии, не от источника источающаго воду тленную, но от источника просвещения, Креста Христова поклонением, о немже и хвалимся.

Древле егоже прообразоваше Моисей дланьма, Крест Твой ныне облобызающе, умнаго Амалика побеждаем, Владыко Христе, имже и спасаемся.

Очима и устнама чистыма поюще песнь радования, Господню Кресту радостию поклонимся вернии, плещуще песньми.

Слава, Троичен: Единаго в трех Ипостасех Бога безначальнаго чту: нераздельнаго Существа зраком, Отца, Сына, и Духа Живаго, в нихже крестихомся.

Богородичен: В купине Моисей Твое образно таинство древле Чистая виде: якоже бо оныя пламень, огнь Божества Твою утробу не опали.

Катавасиа: Утверди Владыко Христе Крестом на камени мя веры, не поколебатися уму прилоги врага злаго: един бо еси Свят.

Седален, глас 6:

Крест Твой, Господи, освятися: в нем бо бывают исцеления болящим во гресех: имже Тебе припадаем, помилуй нас.

Стих: Возносите Господа Бога нашего, и покланяйтеся подножию ногу Его, яко свято есть.

Днесь пророческое исполнися слово: се бо покланяемся, на место, идеже стоясте нозе Твои Господи: и древа спасения вкусивше, греховных страстей свободу улучихом, молитвами Богородицы, едине Человеколюбче.

Слава: Токмо водрузися древо Христе Креста Твоего, основания поколебашася смерти Господи: егоже бо поглоти желанием ад отпусти трепетом. Явил еси нам спасение Твое Святый, и славословим Тя Сыне Божий, помилуй нас.

И ныне, Богородичен: Богородице Дево, моли Сына Твоего пригвождшагося волею на Кресте, и воскресша из мертвых, Христа Бога нашего, спастися душам нашим.

Песнь 4.

Ирмос: На Божественней стражи:

Се воскресе Христос, мироносицам женам ангел рече: не рыдайте, шедше рцыте апостолом: радуйтеся, днесь спасение миру, мучительство врага смертию разрушися.

Живоноснаго Твоего Креста, поклонную радость днесь Христе сретающе, предсретение творим всесвятыя страсти Твоея, юже во спасение мира соделал еси Спасе, яко всесилен.

Днесь бывает радость на небеси и на земли, яко Христово знамение миру является Крест треблаженный: сей бо предложен быв, источает кланяющимся ему радость приснотекущую.

Что Ти принесем Христе, яко честному Кресту дал еси нам поклонитися? На немже всесвятая кровь Твоя излияся, идеже и плоть Твоя гвоздьми водрузися, егоже облобызающе ныне благодарим Тя.

Троичен: Единаго Божества пою три Ипостаси, нераздельно, естественне просто проповедая, Отца безначальна, Сына, и Духа Святаго сопрестольна, господство едино, и едино царство, едину державу присносущную.

Богородичен: Едина в женах явилася еси вещь пречудна Чистая, слышание страшное: естество бо Ты обновила еси, без семене рождши, пребывающи паки якоже прежде Дева: родивыйся бо из Тебе, Бог есть истинный.

Катавасиа: На Кресте Тя Сильне, светило великое видев, трепетом взятся, лучи сопрятав скры, вся же тварь воспе со страхом Твое долготерпение: ибо исполнися земля Твоего хваления.

Песнь 5.

Ирмос: Утренюем утреннюю:

Возсиял еси от гроба незаходимый Свете, миру облистая нетление, потребил еси Господи смертный плач от конец, яко благоутробен.

Приступим очищеннии воздержанием, тепле облобызающе во хвалении Древо всесвятое, на немже Христос распинаемь, спасе мир, яко благоутробен.

Ликуют в веселии ангельстии чини, днесь Креста Твоего поклонением: тем бо низложил еси бесовския полки, спасый Христе человечество.

Рай другий познася Церковь, якоже прежде древо имущая живоносное, Крест Твой Господи, из негоже прикосновением безсмертию причастихомся.

Слава, Троичен: Собезначальны три славлю, единаго Существа: Бога Отца, Сына, и Духа, Свет един трисиятельный, купно державное царство, в неслиянном тождестве.

Богородичен: Родила еси естества законом, но паче закона: Тебе бо единыя безсеменно Рождество, страшный и помышляемый нрав, и глаголемый рождения Твоего, Всенепорочная.

Катавасиа: Утренююще Тя воспеваем Спасе щедре, мир обретше Крестом Твоим, имже обновил еси род человеческий ко свету невечернему вводя нас.

Песнь 6.

Ирмос: Снизшел еси:

Воскресл еси смерть упразднив Христе, якоже великий Царь, от адовых сокровищ воззвал еси нас в наслаждение Царства небеснаго, в землю безсмертия.

Плещуще песньми Божественными вернии, воскликнем Богу, Крест Господень целующе: освящения бо источает источник, всем сущим в мире.

Исполняется песнописательный глас: се бо покланяемся пречистых ног Твоих подножию Всесильне, Кресту Твоему честному, тривожделенному древу.

Еже виде древо в Твой хлеб вложеное, во пророцех рыдатель, Крест Твой Щедре облобызающе, воспеваем Твоя узы, и погребение, копие же и гвоздия.

На рамех егоже изволил еси Христе носити святый Крест, и на сем вознестися, и распятися плотию, облобызающе собираем крепость на враги невидимыя.

Троичен: Единицу в трех начертаниих пою, и Троицу во едином естестве покланяемую, Бога трое купно, Свет трисолнечный, Отца, и Сына, и Святаго Духа.

Богородичен: Чудес великое чудо в Тебе явися нескверная Агнице, вземлющаго бо мира грех, Агнца родила еси: Егоже моли прилежно о поющих Тя.

Катавасиа: Образ Божественнаго Креста, Иона во чреве китове простертыма дланьма проначерта, и взираше спасен от зверя силою Твоею Слове.

Кондак, глас 7. Самогласен:

Не ктому пламенное оружие хранит врат Едемских: на тыя бо найде преславный соуз Древо крестное, смертное жало, и адова победа прогнася. Предстал бо еси Спасе мой, вопия сущим во аде: внидите паки в рай.

Икос: Три кресты водрузи на Голгофе Пилат, два разбойников, и един Жизнодавца. Егоже виде ад, и рече сущим доле: о слуги мои, и силы моя! Кто водрузив гвоздие в сердце мое, древяным мя копием внезапу прободе? И растерзаюся, внутренними моими болю, утробою уязвляюся, чувства моя смущают дух мой, и понуждаются изрыгати Адама, и сущия от Адама, древом данныя ми: Древо бо сия вводит паки в рай.

Синаксарий. Стихи:

Кресту вся земля да покланяется:

Имже познала Тебе покланятися, Слова.

В тойже день, в неделю третию постов, поклонение празднуем честнаго и животворящаго Креста, вины ради сицевы: Понеже бо четыредесятодневным постом, образом неким и мы распинаемся, умерщваяеми от страстей, горести же чувство имамы, унывающе и низпадающе: предлагается честный и животворящий Крест, яко убо прохлаждая и утверждая нас, и воспоминая нам страсти Господа нашего Иисуса Христа, и утешая. Аще Бог наш нас ради распятся, колико подобает нам Его ради деяти, облегчая же болезни наша предложением Владычних скорбей, и воспоминанием и упованием, Крестом славы? Яко бо Спас наш на Крест возшед, прославися безчестным жительством и огорчением: сице подобает и нам деяти, да и спрославимся Ему, аще и нечто некогда страждем печальное. И инако: якоже долгий и жестокий путь проходящии, и трудом отягчавшии, аще где древо благосеннолиственное обрящут, мало седше упокояются, и яко убо юни бывше прочее путь проходят: тако и ныне в постное время и прискорбный путь и подвиг, насадися посреде от святых отец живоносный Крест, ослабу и прохлаждение нам подаяй благомужественны же и легки к прочему труду утрудившияся устрояя. Или якоже есть при цареве пришествии, предходят онаго знамения и скиптры: таже и сам приходит, радуяся о победе, и веселяся, свеселится же вкупе и послушное. Тако и Господь наш Иисус Христос, хотя елико неуклонно на смерть показати победу, и со славою произыти воскресным днем, предпосла скиптр Свой, Царское знамение, животворящий Крест, обрадования и прохлаждения нас, яко множайша исполняющий, и устрояющий нас готовых быти, и Самаго елико мощно Царя восприяти, и восхвалити светло побеждающа. Посреде же святыя четыредесятницы седмицы: зане горькому источнику подобна есть святая четыредесятница, сокрушения ради, и сущия нам от поста горести и печали. Якоже убо во онаго среду божественный Моисей древо вложи, и услади его, тако и проведый нас Бог умнаго Чермнаго моря, и фараона, животворящим древом честнаго и животворящаго Креста, услаждает горесть постом от четыредесятницы: и утешая нас яко в пустыни пребывающих, дондеже ко умному Иерусалиму возведет Своим Воскресением. Или понеже Крест древо живота глаголется и есть, оно же древо посреде рая Едема насаждено бяше: прилично и божественнии отцы крестное Древо посреде святыя четыредесятницы насадиша, вкупе убо и Адамово лакомство поминающе, вкупе же и онаго отъятия прописующе настоящим Древом, сего бо вкушающе не ктому умираем, но паче и оживляемся. Того силою Христе Боже и нас сохрани от лукаваго искушений: и Божественным Твоим страстем и живоносному Воскреснию поклонитися сподоби, четыредесятодневное благосветле прешедшим поприще, и помилуй нас яко един Благ и Человеколюбец, аминь.

Песнь 7.

Ирмос: Отроки от пещи:

Воскресл еси из гроба тридневно, яко спяй Господи, адовы вратари поразив Божественною силою, и древния воздвиг праотцы едине благословенный отцев Боже, и препрославленный.

Цевницею песней ликующе возрадуемся днесь людие Крестным поклонением на сем пригвоздившагося Христа славяще, единаго благословеннаго отцев Бога, и препрославленнаго.

Показавый умерщвления орган, жизни делателище, миру облобызательное, Твой Крест Всещедре, тому покланяющияся освяти, едине благословенный отцев Боже и препрославленный.

Едине милостиве и благоутробне, просвети, освяти едине Иисусе, покланяющияся верно Твоему Кресту, и Божественным страданием, едине благословенный отцев Боже, и препрославленный.

Слава, Троичен: Единицу в трех Ипостасех, пою Божество: Свет бо Отец, Свет Сын, Свет Дух, Свету нераздельну пребывающу, единством естественным, и треми лучами Лиц сияющу.

Богородичен: Всех пророк многоименитое Ты еси проповедание, врата бо Божия, ручка златая, земля святая, явилася еси Дево Богоневестная, рождшая плотию Иисуса Христа, отцев Бога, и препрославленна.

Катавасиа: Из пламене отроки избавлей, плоть приим пришел еси на землю, и на Кресте пригвожден, спасение нам даровал еси Христе, един благословен отцев Боже, и препрославлен.

Песнь 8.

Ирмос: Сей нареченный:

Миро в руках что держите всяко? Кого же взыскуете? Ныне явлейся юноша во гробе, вопия: воскресе Христос и Бог наш, возставивый естество человеков от адовых сокровищ.

Радуйся требогатое древо и Божественное, Кресте, свете сущим во тьме, четвероконечный мир сиянием твоим, востания Христова проявлей зари, сподоби вся верныя достигнути Пасху.

В сий день благоухают мира божественныя мироположницы, живомирственное древо Крест Христов: обоняим его Богодухновенныя вони, тому покланяющеся верно во веки.

Гряди Елиссее пророче, рцы яве, что древо оное, еже в воду вложил еси? Крест Христов, имже от глубины тли извлекохомся, тому покланяющеся верно во веки.

Древле Иаков прообразуя Крест Твой Христе, Иосиф покланяшеся Божественнаго жезла краеви, скиптр сей страшный Царствия Твоего предвидев: емуже ныне покланяемся верно во веки.

Благословим Отца, и Сына, и Святаго Духа, Господа.

Троичен: Едино в трех начертаниих Существо славя, не сливаю единолично трех, ниже пресецаю зрака, Отца, и Сына, со Духом: Един бо над всеми Бог в Троице.

Богородичен: Едина в матерех явилася еси Дева Богоневесто Марие, без мужа родивши Христа Спаса, чистоты знамение сохранивши: Тебе ублажаем вернии во веки.

Катавасиа: Руце в ров верженый львов, иногда великий во пророцех, крестообразно простер Даниил, неврежден от сих снеди спасеся, благословя Христа Бога во веки.

Песнь 9.

Ирмос: Светися, светися:

Во гроб сошел еси жизнодавче и Боже, и сокрушил еси вся заклепы же и вереи, и мертвыя воскресил еси, слава востанию Твоему, вопиющия, Христе Спасе всесильне.

Гроб Твой жизнь мне Христе источи, содержай бо жизнь, представ возопил еси живущим во гробех: сущии во узах разрешитеся, Аз бо мира избавление приидох.

Песньми да взыграют вся древа дубравная, тезоименитое древо Креста зряще облобызаемое днесь: на немже Христос вознесе главу, якоже пророчествует божественный Давид.

Древом умерый, древо тя обретох жизни Христоносне Кресте мой, хранителю мой нерушимый, на демоны крепкая державо, тебе покланяяйся днесь зову: освяти мя славою твоею.

Веселися, радуйся Церковь Божия, древу требогатному покланяющися днесь, всесвятаго Креста Христова: Емуже служат чинове ангельстии, и со страхом предстоят.

Троичен: Троице Лицы, единице Естеством покланяюся, Тебе Божество Святое, Отцу, и Сыну, со Святым же Духом, единому началу, единому Царству, всеми владычествующему.

Богородичен: Гора великая в нюже вселися Христос, Ты явилася еси Дево, якоже божественный Давид вопиет: Еюже мы вознесохомся к небеси, всынившеся Духом Всеблаженная.

Катавасиа: О Мати Дево, и Богородице неложная, рождшая безсеменно Христа Бога нашего, на Крест вознесшагося плотию, Тя вернии вси достойно с Ним ныне величаем.

Ексапостиларий воскресен. И Креста.
Подобен: Со ученики взыдем:

Слава: Крест Христов честный днесь предложенный видевше поклонимся, и верно возвеселимся, облобызающе любовию, на сем волею распеншагося просяще Господа, сподобити всех нас, и Кресту честному поклонитися, и достигнути Воскресение неосужденно.

И ныне, Богородичен: Древу, на немже Всечистая, пречистеи длани о нас простре, пригвоздивыйся Сын Твой, ныне благочестно покланяющимся, даждь нам мир, и мироспасительныя всечестныя страсти предварити, и светлой мирорадостной господоименитой Пасце поклонитися, и светоносному дню.

На хвалитех поставим стихов 8: и поем стихиры воскресны, осмогласника 4: и трипеснца подобны 3, повторяюще 1, глас 4.
Подобен: Яко добля:

Во гласех воскликнем, в песнех возвеличим, Крест честный облобызающе, и к нему возопиим: Кресте всечестне, освяти наша души и телеса силою твоею, и от всякаго вреда сопротивных соблюди невреждены, благочестно покланяющияся тебе.

Приступивше почерпите неистощаемых вод, Креста благодатию проливаемых: се предлежащее видяще Древо святое, дарований источник, напоеное кровию и водою Владыки всех, на том волею вознесшагося, и земныя воздвигшаго.

Стих: Возносите Господа Бога нашего, и покланяйтеся подножию ногу Его, яко свято есть.

Церкве утверждение, монашествующих похвала и спасение, ты еси Кресте всечестне: темже покланяющеся тебе, и сердцем и душею просвещаемся днесь, Божественною благодатию на тебе Пригвоздившагося, и державу льстиваго разорившаго, и клятву потребльшаго.

Стих: Бог же Царь наш прежде века, содела спасение посреде земли.

И повторяюще первую стихиру, таже глаголем стих:

Воскресни Господи Боже мой, да вознесется рука Твоя, не забуди убогих Твоих до конца.

И поем самогласен, глас 8:

Высокомудраго разума злых фарисеев, всех Господь притчею убежати сего научи: и не высокомудрствовати паче, еже подобает мудрствовати, всех наказа, прописание и образ Сам быв, даже до распятия и смерти, Сам Себе излияв. Благодаряще убо с мытарем рцем: пострадавый за ны, и безстрастен пребывый Боже, от страстей нас избави, и спаси души наша.

Слава, паки тойже. И ныне: Преблагословенна еси Богородице: Славословие великое.

Егда же начинаем пети: Слава в вышних: Тогда приидет иерей оболчен во вся священническия одежды, [или аще где будет старей, то от первейшаго в своих им местех должно есть сему быти]. И взем кадильницу, кадит святую трапезу, и честный Крест, таже подъемлет его на дискосе со хранильницею на главу свою, и исходит от левыя страны престола северными дверьми, предыдущим ему свещам двум, и кадильнице, и отходит до царских врат. Скончану же бывшу славословию, и Трисвятому, глаголет священник: Премудрость, прости. И начинаем тропарь: Спаси Господи люди Твоя: трижды. И приходит иерей нося честный Крест пред святыя двери: и тамо уготовану четвероножнику, и полагается верху его честный Крест, и отверз хранильницу, кадит крестообразно от четырех стран.

И абие поем тропарь, глас 6:

Кресту Твоему покланяемся Владыко, и святое Воскресение Твое славим. [Трижды.]

И начинают покланятися, аще где во обители, игумен, или ин первенствуяй во священных, такожде и прочии священницы покланяющеся пред честным Крестом дважды: целуют же прежде старейшии, и по целовании, паки покланяются единожды: такожде творят и прочии священницы, десная страна и левая. Такожде приходит и братия два два покланяющеся по чину их.

Кланяющимся же братиям поем самогласны сия, глас 2:

Приидите вернии, животворящему Древу поклонимся, на немже Христос Царь славы волею руце распростер, вознесе нас на первое блаженство, ихже прежде сластию украд враг, изгнаны от Бога сотвори. Приидите вернии, Древу поклонимся, имже сподобихомся невидимых враг сокрушити главы. Приидите вся отечествия язык, Крест Господень песньми почтим: радуйся Кресте, падшаго Адама совершенное избавление! О тебе вернии хвалятся, яко твоею силою исмаильтеския люди державно покаряющии. Тебе ныне со страхом христиане целуем: на тебе пригвоздившагося Бога славим, глаголюще: Господи на том пригвоздивыйся помилуй нас, яко Благ и Человеколюбец.

Глас 8: Днесь Владыка твари, и Господь славы, на Кресте пригвождается и в ребра прободается, желчи и оцта вкушает, сладость церковная: венцем от терния облагается: покрываяй небо облаки, одеждею облачится поругания: и заушается бренною рукою, рукою создавый человека. По плещема биен бывает, одеваяй небо облаки. Заплевания и раны приемлет, поношения и заушения: и вся терпит мене ради осужденнаго, Избавитель мой и Бог, да спасет мир от прелести, яко благоутробен.

Слава, глас 8: Днесь неприкосновенный существом, прикосновен мне бывает, и страждет страсти, свобождаяй мя от страстей. Свет подаваяй слепым, от беззаконных устен оплевается, и дает плещи за плененныя на раны. Сего Чистая Дева и Мати на Кресте зрящи, болезненно вещаше: увы мне Чадо Мое, что сие сотворил еси? Красный добротою паче всех человек, бездыханный, беззрачный являешися, не имея вида, ниже доброты. Увы Мне Мой Свете! Не могу спяща зрети Тя, утробою уязвляюся, и лютое оружие сердце Мое проходит. Воспеваю Твоя страсти, покланяюся благоутробию Твоему, долготерпеливе слава Тебе.

И ныне, глас тойже: Днесь пророческое исполнися слово: се бо покланяемся на место, идеже стоясте нозе Твои Господи: и Древа спасения вкусивше, греховных страстей свободу улучихом, молитвами Богородицы, едине Человеколюбче.

Таже ектении, и отпуст. Слава, и ныне, стихира евангельская, в притворе: и чтется оглашение Студитово, и час первый, и совершенный отпуст.

 

На Литургии

изобразительная. Блаженна гласа, на 6: и от канона Креста песнь 3-я на 4.

Вместо же Трисвятаго поем: Кресту Твоему покланяемся Владыко, и святое Воскресение Твое славим.

Прокимен Апостола, глас 6: Спаси Господи люди Твоя, и благослови достояние Твое. Стих: К Тебе Господи воззову, Боже мой, да не премолчиши от мене.

Апостол ко Евреем, зачало 311. [Евр. IV, 14 – V, 6.]

Братие, имуще убо Архиереа велика, прошедшаго небеса, Иисуса Сына Божия, да держимся исповедания.	Братья, имея Первосвященника великого, прошедшего небеса, Иисуса Сына Божия, будем твердо держаться исповедания нашего.
Не имамы бо архиереа не могуща спострадати немощем нашим, но искушена по всячeским по подобию, разве греха.	Ибо мы имеем не такого первосвященника, который не может сострадать нам в немощах наших, но Который, подобно нам, искушен во всем, кроме греха.
Да приступаем убо с дерзновением к престолу благодати, да приимем милость и благодать обрящем во благовременну помощь.	Посему да приступаем с дерзновением к престолу благодати, чтобы получить милость и обрести благодать для благовременной помощи.
Всяк бо первосвященник, от человек приемлемь, за человеки поставляется на службы яже к Богу, да приносит дары же и жeртвы о гресех,	Ибо всякий первосвященник, из человеков избираемый, для человеков поставляется на служение Богу, чтобы приносить дары и жертвы за грехи,
Спострадати могий невежствующим и заблуждающим, понеже и той немощию обложен eсть:	Могущий снисходить невежествующим и заблуждающим, потому что и сам обложен немощью,
И сего ради должен eсть якоже о людех, такожде и о себе приносити за грехи.	И посему он должен как за народ, так и за себя приносить жертвы о грехах.
И никтоже сам себе приемлет честь, но званный от Бога, якоже и Аарон.	И никто сам собою не приемлет этой чести, но призываемый Богом, как и Аарон.
Тако и Христос не Себе прослави быти первосщенника, но Глаголавый к Нему: Сын Мой eси Ты, Аз днесь родих Тя:	Так и Христос не Сам Себе присвоил славу быть первосвященником, но Тот, Кто сказал Ему: Ты Сын Мой, Я ныне родил Тебя;
Якоже и инде глаголет: Ты eси священник во век по чину Мелхиседекову.	Как и в другом месте говорит: Ты священник вовек по чину Мелхиседека.

Аллилуиа, глас 1: Помяни сонм Твой, егоже стяжал еси исперва. Стих: Бог же Царь наш прежде века, содела спасение посреде земли.

Евангелие от Марка, зачало 37. [Мк. VIII, 34 – IX, 1.]

Рече Господь Своим учеником: иже хощет по Мне ити, да отвержется себe, и возмет крест свой, и по Мне грядет:	Говорит Господь Своим ученикам: кто хочет идти за Мною, отвергнись себя, и возьми крест свой, и следуй за Мною.
Иже бо аще хощет душу свою спасти, погубит ю: а иже погубит душу свою Менe ради и Eвангелиа, той спасет ю:	Ибо кто хочет душу свою сберечь, тот потеряет ее, а кто потеряет душу свою ради Меня и Евангелия, тот сбережет ее.
Кая бо польза человеку, аще приобрящет мир весь, и отщетит душу свою?	Ибо какая польза человеку, если он приобретет весь мир, а душе своей повредит?
Или что даст человек измену на души своей?	Или какой выкуп даст человек за душу свою?
Иже бо аще постыдится Менe и Моих словес в роде сем прелюбодейнем и грешнем, и Сын Человеческий постыдится eго, eгда приидет во славе Oтца Своего со Ангелы святыми.	Ибо кто постыдится Меня и Моих слов в роде сем прелюбодейном и грешном, того постыдится и Сын Человеческий, когда приидет в славе Отца Своего со святыми Ангелами.
И глаголаше им: аминь глаголю вам, яко суть нецыи от зде стоящих, иже не имут вкусити смерти, дондеже видят Царствие Божие пришедшее в силе.	И сказал им: истинно говорю вам: есть некоторые из стоящих здесь, которые не вкусят смерти, как уже увидят Царствие Божие, пришедшее в силе.

Причастен: Знаменася на нас свет лица Твоего Господи.