Неделя ваий.
Вход Господень в Иерусалим.
Песнопения Триоди Постной.

От незлобивых младенец Христе, на жребяти седя приял еси победную песнь, грядый ко страсти: трисвятым пением от ангел воспеваемый.

Се Царь твой Сионе, кроток и спасаяй грядет на жребяти, враги взыскуяй поразити в крепости: радуйся и красуйся с ваием празднующи.

Восплещим согласно вернии, ветви добродетелей и мы, яко отроцы ныне приносяще Христу, и сему Божественных дел распрострем одеяния, и таинственно Сего приимем.

Ваиа добродетелей братие, принесем Христу Богу грядущему, нас ради человечески пострадати волею, Божества крепостию всем безстрастие даровати.

На плещах херувимских яко Бог носимый, седает на жребя, нас ради на снедь грядый хотением: приидите усердно Сего с ваием воспоим.

Светлися Сионе новый ваием, воспевай со отроки, се Царь твой спасаяй к страсти грядет.

Стих: Из уст младенец и ссущих совершил еси хвалу.

Веселитеся Адаме и Ево, с пророки, се призвати вас страстию, Господь приходит.

Стих: Господи Господь наш, яко чудно имя Твое по всей земли.

Горе со Отцем, и Духом, ангельскую Приемый песнь, обнищавает странно доле, и отроческую песнь приемлет.

Пою Твое страшное смотрение страхом, еже осанна взываю Тебе: мене бо грядеши спасти, благословенный Господи.

Ныне отпущаеши: Трисвятое. И прочее якоже обычай.

И тропари, глас 1: Общее воскресение, прежде Твоея страсти уверяя, из мертвых воздвигл еси Лазаря Христе Боже. Темже и мы яко отроцы победы знамения носяще, Тебе победителю смерти вопием: осанна в вышних, благословен Грядый во имя Господне.

И другий, глас 4: Спогребшеся Тебе крещением Христе Боже наш, безсмертныя жизни сподобихомся воскресением Твоим, и воспевающе зовем: осанна в вышних, благословен Грядый во имя Господне.

Днесь благодать Святаго Духа нас собра, и вси вземше крест Твой глаголем, благословен Грядый во имя Господне, осанна в вышних. [Дважды.]

Имеяй престол небо, и подножие землю, Бога Отца Слово и Сын соприсносущный, на жребяти безсловеснем смирися днесь, в Вифанию пришед. Темже дети еврейския, ветви руками держаще, хваляху гласом: осанна в вышних, благословен грядый Царь Израилев. [Дважды.]

Приидите и мы днесь весь новый Израиль, яже от язык Церковь, со пророком Захариею возопиим: радуйся зело дщи Сионова, проповедуй дщи Иерусалимова: яко се Царь твой грядет тебе кроток и спасаяй, и вседый на жребя осле, сына подъяремнича: празднуй яже детей, ветви руками держащи похвали: осанна в вышних, благословен грядый Царь Израилев. [Дважды.]

Честное воскресение Твое прообразуя нам, воздвигл еси умершаго повелением Твоим, бездыханнаго Лазаря друга Блаже, из гроба четверодневна смердяща. Темже и на жребя возшед образно, якоже на колеснице носимь, языки укротевая Спасе. Сего ради и хваление приносит возлюбленный Израиль из уст ссущих, и младенец незлобивых, зрящих Тя Христе, входяща во святый град, прежде шести дней Пасхи. [Дважды.]

Прежде шести дней Пасхи прииде Иисус во Вифанию, и приступиша к нему ученицы Его, глаголюще Ему: Господи, где хощеши, уготоваем Ти ясти Пасху. Он же посла их: идите в преднюю весь, и обрящете человека, скудель воды носяща: последуйте ему, и дому владыце рцыте: Учитель глаголет, у тебе сотворю Пасху со ученики Моими. [Дважды.]

Призва Иаков сыны своя, и рече им: соберитеся, да возвещу вам, что срящет вас в последния дни. Соберитеся, и послушайте мене сынове Иаковли: послушайте Израиля, послушайте отца вашего. Иудо, тебе похвалят братия твоя: руце твои на плещу враг твоих: поклонятся тебе сынове отца твоего. Скимен львов Иуда, от леторасли сыне мой возшел еси: возлег уснул еси яко лев, и яко скимен, кто возбудит его? Не оскудеет князь от Иуды, и вождь от чресл его, дондеже приидут отложеная ему: и той чаяние языков. Привязуяй к лозе жребя свое, и к винничию жребца осляте своего: исперет вином одежду свою, и кровию гроздия одеяние свое. Радостотворны очи его паче вина, и белы зубы его паче млека.

Тако глаголет Господь: радуйся дщи Сионова зело, проповедуй дщи Иерусалимова, веселися и преукрашайся от всего сердца твоего, дщи Иерусалимля. Отъят Господь неправды твоя, и избавил тя есть из руки враг твоих: воцарится Господь посреде тебе, и не узриши зла ктому. Во время оно речет Господь Иерусалиму: дерзай Сионе, да не ослабеют руце твои. Господь Бог твой в тебе, Сильный спасет тя: наведет на тя веселие, и обновит тя в любви Своей, и возвеселится о тебе во украшении, яко в день праздника. И соберу сотреныя твоя: горе, кто приимет нань поношение? Се Аз сотворю в тебе, тебе ради, глаголет Господь, во время оно: и спасу утисненную, и отриновенную прииму, и положу я в похваление, и имениты по всей земли.

Тако глаголет Господь: радуйся зело дщи Сионя, проповедуй дщи Иерусалимля: се Царь твой грядет тебе праведен и спасаяй, Той кроток, и всед на подъяремника и жребца юна. И потребит колесницы от Ефрема, и кони от Иерусалима, и потребит лук бранный, и множество, и мир от языков: и обладает водами от моря до моря, и от рек до исходищ земли. И ты в крови завета твоего, испустил еси узники твоя от рова не имуща воды. Сядите в тверделех связани сонмища, и за един день пришельствия твоего сугубо воздам ти. Занеже напрягох тя Себе Иудо яко лук, исполних Ефрема, и воздвигну чада твоя Сионе на чада еллинска, и осяжу тя яко меч ратника. И Господь на них явится, и изыдет яко молния стрела его: и Господь Бог Вседержитель в трубу вострубит, и пойдет в шуме прещения Своего. Господь Вседержитель защитит их.

Всесвятый Дух, апостолы научивый глаголати иными странными языки, Той детем еврейским неискусозлобным повелевает звати: осанна в вышних, благословен грядый Царь Израилев.

Собезначальный и соприсносущный, Сын и Слово Отчее, на жребяти безсловесном седя, прииде днесь во град Иерусалим: Егоже херувими со страхом зрети не могут, дети восхвалиша, с ваием и ветвьми, хвалу таинственно воспевающе: осанна в вышних, осанна Сыну Давидову, пришедшему спасти от прелести весь род наш.

Прежде шести дней Пасхи, глас Твой услышася Господи, во глубинах адовых: темже и Лазаря четверодневна воздвигл еси. Дети же еврейския взываху: осанна Боже наш, слава Тебе.

Глас 2: Входящу Ти Господи во святый град, на жребяти седя, потщался еси приити на страсть, да совершиши закон и пророки. Дети же еврейския воскресения победу предвозвещающе, сретаху Тя с ветвьми и ваием, глаголюще: благословен еси Спасе, помилуй нас.

Слава Тебе Христе, в вышних седящему на престоле, и ныне чаемому с честным Твоим Крестом. Темже веселится дщи Сионова, радуются языцы земнии, ветви держат дети, ризы же ученицы, и вся вселенная научися вопити Тебе: благословен еси Спасе, помилуй нас.

Прежде шести дней бытия Пасхи, прииде Иисус во Вифанию, воззвати умерша четверодневна Лазаря, и проповедати воскресение. Сретоша же его и жены, Марфа и Мариа сестры Лазаревы, вопиюще к Нему: Господи, аще бы еси был зде, не бы умерл брат наш. Тогда глагола к ним: не предрекох ли вам: веруяй в Мя, аще и умрет, жив будет: покажите ми, где положисте его? И вопияше к нему Зиждитель всех: Лазаре, гряди вон.

Радуйся и веселися граде Сионе, красуйся и радуйся Церкве Божия: се бо Царь твой прииде в правде, на жребяти седя, от детей воспеваемый: осанна в вышних, благословен еси, Имеяй множество щедрот, помилуй нас.

Стих: Из уст младенец и ссущих совершил еси хвалу.

Прииде Спас днесь во град Иерусалим, исполнити Писание, и вси прияша в руки ваиа: ризы же подстилаху Ему, ведуще, яко Той есть Бог наш, Емуже херувими вопиют непрестанно: осанна в вышних, благословен еси, Имеяй множество щедрот помилуй нас.

Стих: Господи Господь наш, яко чудно имя Твое по всей земли.

На херувимех носимый, и певаемый от серафим, возсел еси на жребя Давидски Блаже: и дети Тя воспеваху Боголепно, иудее же хуляху беззаконно: стропотное языков, седалище жребца прообразоваше, из неверия в веру претворяемое. Слава Тебе Христе, едине Милостиве и Человеколюбче.

Ныне отпущаеши: Трисвятое, и прочее по обычаю. И глаголем тропарь отпустительный, глас 1: Общее воскресение: Дважды. Ин тропарь, глас 4: Спогребшеся Тебе: единожды. и Буди имя Господне: 3. И псалом: Благословлю Господа: И предложится чтение. Слово торжественное праздника.

С ветвьми умно очищени душами, якоже дети Христа восхвалим верно, велегласно зовуще Владыце: благословен еси Спасе в мир пришедый, спасти Адама от древния клятвы, духовно быв Человеколюбче Новый Адам, якоже благоволил еси: вся Слове к полезному устроивый, слава Тебе.

Четверодневна Лазаря от гроба возставивый Господи, вся научил еси вопити с ваием и ветвьми Тебе: благословен еси Грядый.

Над другом Твоим Христе слезы точиши тайно, и воздвизаеши из мертвых Лазаря лежаща мертва, в немже сострадание показал еси человеколюбно: уведевше же Твое пришествие Иисусе, множество младенец изыдоша днесь, в руках ваиа держаще, осанна Тебе взывающе: благословен еси, во еже мир спасти Пришедый.

Восхвалите согласно людие и языцы: Царь бо ангельский взыде ныне на жребя, и грядет хотяй на Кресте поразити враги, яко силен. Сего ради и дети с ваием взывают песнь: слава Тебе пришедшему Победителю: слава Тебе Спасу Христу: слава Тебе благословенному, единому Богу нашему.

На престоле херувимсте, и на жребяти возсед нас ради, и к страсти вольней достиг, днесь слышит детей возглашающих, осанна, народов вопиющих: Сыне Давидов, ускори спасти, ихже создал еси, благословенне Иисусе: на сие бо пришел еси, да разумеем славу Твою.

Прокимен, глас 4: Из уст младенец и ссущих совершил еси хвалу. Стих: Господи Господь наш, яко чудно имя Твое по всей земли. Всякое дыхание:

И егда приближишася во Иерусалим и приидоша в Виффагию к горе Елеонстей, тогда Иисус посла два ученика,	И когда приблизились к Иерусалиму и пришли в Виффагию к горе Елеонской, тогда Иисус послал двух учеников,
Глаголя има: идита в весь, яже прямо вама: и абие обрящета oсля привязано, и жребя с ним: отрешивша приведита Ми:	Сказав им: пойдите в селение, которое прямо перед вами; и тотчас найдете ослицу привязанную и молодого осла с нею; отвязав, приведите ко Мне;
И аще вама кто речет что, речета, яко Господь ею требует: абие же послет я.	И если кто скажет вам что-нибудь, отвечайте, что они надобны Господу; и тотчас пошлет их.
Сие же все бысть, да сбудется реченное пророком, глаголющим:	Всё же сие было, да сбудется реченное через пророка, который говорит:
Рцыте дщери Сионове: се, Царь твой грядет тебе кроток, и всед на oсля и жребя, сына подъяремнича.	Скажите дщери Сионовой: се, Царь твой грядет к тебе кроткий, сидя на ослице и молодом осле, сыне подъяремной.
Шедша же ученика и сотворша, якоже повеле има Иисус,	Ученики пошли и поступили так, как повелел им Иисус:
Приведоста oсля и жребя: и возложиша верху ею ризы своя, и вседе верху их.	Привели ослицу и молодого осла и положили на них одежды свои, и Он сел поверх их.
Множайшии же народи постилаху ризы своя по пути: друзии же резаху ветви от древ и постилаху по пути.	Множество же народа постилали свои одежды по дороге, а другие резали ветви с дерев и постилали по дороге;
Народи же предходящии (Ему) и вследствующии зваху, глаголюще: осанна Сыну Давидову: благословен Грядый во имя Господне: осанна в вышних.	Народ же, предшествовавший и сопровождавший, восклицал: осанна Сыну Давидову! благословен Грядущий во имя Господне! осанна в вышних!
И вшедшу Ему во Иерусалим, потрясеся весь град, глаголя: кто есть Сей?	И когда вошел Он в Иерусалим, весь город пришел в движение и говорил: кто Сей?
Народи же глаголаху: Сей есть Иисус Пророк, иже от Назарета Галилейска.	Народ же говорил: Сей есть Иисус, Пророк из Назарета Галилейского.
Видевше же архиерее и книжницы чудеса, яже сотвори, и oтроки зовуща в церкви и глаголюща: осанна Сыну Давидову, негодоваша	Видев же первосвященники и книжники чудеса, которые Он сотворил, и детей, восклицающих в храме и говорящих: осанна Сыну Давидову! – вознегодовали
И реша Ему: слышиши ли, что сии глаголют? Иисус же рече им: ей: несте ли чли николиже, яко из уст младенец и ссущих совершил еси хвалу?	И сказали Ему: слышишь ли, что они говорят? Иисус же говорит им: да! разве вы никогда не читали: из уст младенцев и грудных детей Ты устроил хвалу?
И оставль их, изыде вон из града в Вифанию и водворися ту.	И, оставив их, вышел вон из города в Вифанию и провел там ночь.

Воскресение Христово: не глаголем. Но абие псалом 50.

Таже иерей взем кадило, кадит крестообразно, глаголя молитву на благословение ваиа.

Диакон: Господу помолимся.

Мы же: Господи помилуй.

Господи Боже наш, седяй на херувимех, возставивый силу Твоего Сына, Господа нашего Иисуса Христа, да спасет мир Крестом, и погребением, и воскресением Своим: Егоже и ныне пришедша во Иерусалим на вольную страсть, людие седящии во тьме, и сени смертней, приемше воскресения знамения, ветви древес, и ваиа финик, воскресение знаменующе сретоша. Сам Владыко и нас по подражанию онех, в предпразднственный сей день, ваиа и ветви древес в руках носящих соблюди и сохрани. Да якоже онии народи и дети осанна Тебе приношаху, и мы такожде в песнех и пениих духовных, животворящаго и тридневнаго Воскресения достигнем, в томже Христе Иисусе Господе нашем: с Нимже благословен еси, с Пресвятым, и Благим, и Животворящим Твоим Духом, ныне и присно, и во веки веков, аминь.

Егда же целуют братия Евангелие, раздавает игумен ваиа.

Слава, глас 2: Днесь Христос входит во град Вифанию, на жребяти седяй, безсловесие разрешая язык злейшее, древле свирепеющее.

И ныне, паки тойже.

Таже, Помилуй мя Боже:

Стихира, глас 6: Днесь благодать Святаго Духа нас собра: Посем молитва: Спаси Боже люди: Господи помилуй, 12.

{Ω} Ирмос: Явишася источницы бездны влаги непричастны, и окрышася моря волнующася основания бурею: манием бо запретил еси ему, изрядныя же люди спасл еси. Поющия победную песнь Тебе Господи.

{Σ} Из уст младенец незлобивых, и ссущих, хвалу Твоих раб совершил еси, разрушити супостата, и отмстити страстию Креста, падение древняго Адама, древом же воскресити сего, поюща победную песнь Тебе Господи.

{Α} Хваление Церковь преподобных, живущему в Сионе, Тебе Христе приносит: о Тебе же Израиль творце своем радуется, и горы языцы противообразнии каменосердечнии, от лица Твоего возвеселишася, поюще победную песнь Тебе Господи.

Катавасиа: Явишася источницы:

{Ν} Ирмос: Точащий краесекомый повелением Твоим, твердый ссаша камень Израильтестии людие. Камень же Ты еси Христе и жизнь, на немже утвердися Церковь зовущая: осанна благословен еси Грядый.

{Ν} Мертвеца четверодневна повелением Твоим, из мертвых с трепетом ад испусти Лазаря. Воскресение бо Ты Христе и жизнь, в немже утвердися Церковь зовущи: осанна благословен еси Грядый.

{Α} Воспойте людие боголепно в Сионе, и молитву воздадите Христу во Иерусалиме, Сам грядет во славе со областию: в Немже утвердися Церковь зовущи: осанна благословен еси Грядый.

С ветвьми воспевше прежде, с древесы последи яша Христа Бога, неблагодарнии иудее. Мы же верою непреложною присно почитающе яко благодетеля, выну вопием Ему: благословен еси грядый Адама воззвати.

{Χ} Ирмос: Христос грядый явственно Бог наш, приидет и не закоснит, от горы приосененныя чащи, Отроковицы раждающия Неискусомужныя, пророк древле глаголет. Тем вси вопием: слава силе Твоей Господи.

{Ρ} Да точат веселие крепкое мастительное, горы, и вси холми, и древа дубравная да взыграют: Христа хвалите языцы, и Тому вси людие радующеся возопийте: слава силе Твоей Господи.

{Ι} Крепостию царствуяй веки Господь, облечен приидет, Сего красоты же и славы, несравненно есть благолепие в Сионе. Темже вси вопием: слава силе Твоей Господи.

{Σ} Пядию измеривый небо, дланию же землю, Господь прииде, Сион бо избра, в немже жити и царствовати изволи, и возлюби люди верно вопиющия: слава силе Твоей Господи.

{Τ} Ирмос: На гору Сион взыди благовествуяй, и Иерусалиму проповедуяй, в крепости вознести глас: преславная глаголашася о тебе граде Божий. Мир на Израиля, и спасение языком.

{Ο} В вышних седяй на херувимех Бог, и призираяй на смиренныя, Той грядет во славе со областию, и исполнятся всяческая Божественныя хвалы Его. Мир на Израиля, и спасение языком.

{Σ} Сионе Божий, горо святая, и Иерусалиме, окрест очи твои возведи, и виждь собранная чада твоя в тебе: се бо приидоша издалеча, поклонитися Царю твоему. Мир на Израиля, и спасение языком.

{Ε} Ирмос: Возопиша с веселием праведных дуси: ныне миру Завет Новый завещается, и кроплением да обновятся людие, Божия крове.

{Υ} Приими Израилю Божие царство, и пребываяй во тьме, свет да узрит великий, и кроплением да обновятся людие, Божественныя крове.

{Λ} Разрешены своя юзники Сионе испусти, и от рова неведения безводна изведи, и кроплением да обновятся людие, Божественныя крове.

На престоле на небеси, на жребяти на земли носимый Христе Боже, ангелов хваление, и детей воспевание приял еси зовущих Ти: благословен еси грядый Адама воззвати.

Икос: Понеже ада связал еси Безсмертне, и смерть умертвил еси, и мир воскресил еси, с ваиами младенцы восхваляху Тя Христе, яко победителя, зовуще Ти днесь: осанна Сыну Давидову. Не ктому бо, рече, заклани будут младенцы, за Младенца Мариина: но за вся младенцы и старцы, Един распинаешися. Не ктому на нас вместится меч: Твоя бо ребра прободутся копием. Темже радующеся глаголем: благословен грядый Адама воззвати.

На жребя всед словом прострый небо:

Человеки взыскуяй, разрешити безсловесия.

В сий день, славный и пресветлый праздник ваий празднуем, вины ради сицевыя: по востании Лазареве из мертвых, мнози видевше бывшее, вероваху во Христа и убо утверждается суд иудейскою сонмицею, Христа же, и самаго убити Лазаря. Бегает убо Иисус место злобе дая, иудеи же в праздник Пасхи убити Его поучение положиша. И времени бегства дану бывшу долгу, прежде шести дней Пасхи, глаголет, прииде Иисус во Вифанию, идеже бе Лазарь умерый: и тамо обеду бывшу, ядяше с ним и Лазарь: сестра же его Мариа на Христове нозе миро изливаше. И наутрие посылает ученики Своя привести ослицу и жребя. И имеяй престол небо, всед на жребя, входит во Иерусалим: дети же еврейския и сами подстилаху Ему ризы своя и ветви фиников, овыя убо режуще, другия же и в руках носяще, вопияху Ему предсылающе: осанна Сыну Давидову, благословен грядый во имя Господне, Царь Израилев. Сие же бысть, онех языки подвигшу Всесвятому Духу, в славу и благохваление Христово. Являху же Христову на смерть победу ваиами, сиесть, ветвьми: ваиа бо у евреов ветвь мягкая глаголется. Обычай бо бяше, яко победителе подвигов, или браний некиих, ветвьми древес присноцветущих, в победных провождениих почитаеми, и обводими бяху. Гадательственно же знаменоваше жребец, сущия ны от язык люди, на немже всед Христос, и препочив, одолетель и победитель, Царь же всея земли наречеся. О сем празднице и пророк глаголаше Захария [гл. 9, ст. 9]: Радуйся зело дщи Сионова, се Царь твой грядет тебе кроток, и всед на подъяремника и жребца осля сына подъяремнича. И Давид паки о детех: из уст младенец и ссущих совершил еси хвалу. Но входящу, рече, Христу потрясеся весь Иерусалим: и во отмщение народи от архиереи поощрени бывше, смотряху Его убити: Той же таяшеся крыяся, и являяся, притчами глаголаше им. Неизреченным Твоим милосердием Христе Боже наш, победители ны безсловесных страстей сотвори, и Твою светлую на смерть победу: ясное же и живоносное Воскресение видети сподоби, и помилуй нас ныне и присно, и во веки веков, аминь.

{Ο} Ирмос: Спасый во огни Авраамския Твоя отроки, и халдеи убив, яже правда праведно уловляше, препетый Господи Боже отец наших, благословен еси.

{Γ} Покланяющеся людие, и со ученики радующеся, ваием, осанна Сыну Давидову зовяху: препетый Господи Боже отец, благословен еси.

{Η} Неискусозлобное множество, еще младенствующее естество, Боголепно Тя Царю Израильтеский и ангельский воспет: препетый Господи Боже отец, благословен еси.

{Μ} С ваием Тя Христе, ветвьми похваляху множества, благословен пришедый Царь веков. Вопияху же препетый Господи Боже отец, благословен еси.

{Ε} Ирмос: Веселися Иерусалиме, торжествуйте любящии Сиона: Царствуяй бо во веки Господь сил прииде, да благоговеет вся земля от лица Его, и да вопиет: благословите вся дела Господня Господа.

{Ν} На жребя младо всед Царь твой Сионе, предста Христос: безсловесную бо идольскую прелесть разрушити, и неудержанное стремление уставити всех язык прииде, во еже пети: вся дела пойте Господа.

{Ο} Бог твой, радуйся Сионе зело, воцарися во веки Христос. Сей, якоже писано есть, кроткий и спасаяй, праведный Избавитель наш, прииде на жребяти, конское свирепство убити врагов, не вопиющих: благословите вся дела Господня Господа.

{Σ} Оскудевает Божественных ограждений, законопреступное сонмище непокоривых, понеже дом молитвы Божия, вертеп сотвориша разбойническ, от сердца Избавителя отринувше, Емуже вопием: благословите вся дела Господня Господа.

{Θ} Ирмос: Бог Господь, и явися нам, составите праздник, и веселящеся приидите, возвеличим Христа, с ваиами и ветвьми, песньми зовуще: благословен грядый во имя Господа Спаса нашего.

{Ε} Языцы вскую шатаетеся? писменницы, и священницы, почто тщетным поучистеся? кто Сей, рекше, Емуже дети с ваием и ветвьми, песньми зовут: благословен грядый во имя Господа Спаса нашего.

{Ο} Сей Бог наш, Емуже никтоже подобен, праведный всяк путь изобрет, даде возлюбленному Израилю. По сих же с человеки поживе явлься: благословен грядый во имя Господа Спаса нашего.

{Σ} Соблазны стези, что близ вас положисте непокоривии? Ноги ваша скоры кровь излияти Владычню: но воскреснет всяко спасти зовущия: благословен грядый во имя Господа Спаса нашего.

Множество народа Господи, постилаху по пути ризы своя: друзии же резаху ветви от древес, и ношаху. Предыдущии же и последующии, зовяху глаголюще: осанна Сыну Давидову, благословен еси пришедый, и паки грядый во имя Господне. [Дважды.]

Хотящу Тебе внити во святый град Господи, ветви садов людие ношаху, Тебе поюще всех Владыку: и зряще Тя на жребяти седяща, якоже на херувимех зряху. Сего ради сице вопияху: осанна в вышних, благословен еси пришедый, и паки грядый во имя Господне. [Дважды.]

Изыдите языцы, изыдите и людие, и видите днесь Царя Небеснаго, яко на престоле высоце, на жребяти худе во Иерусалим входяща. Роде иудейский неверный и прелюбодейный, прииди и виждь, Егоже виде Исаиа во плоти нас ради приити имуща, како уневещает Себе, яко целомудренный новый Сион, и отлагает осужденную сонмицу: яко в нетленном же браце и нескверном, несквернии стекошася благохваляще, неискусозлобнии дети. С нимиже и мы поюще возопием песнь ангельскую: осанна в вышних, Имущему велию милость.

Общее воскресение, прежде вольныя страсти Твоея, во уверение всех предпоказавый Христе Боже, Лазаря убо в Вифании, державною силою Твоею, четверодневна мертва воскресил еси: слепцем же еже видети яко Светодавец даровал еси Спасе, и во святый град со ученики Твоими вшел еси, седя на жребяти осли, пророческая исполняяй проповедания, якоже на херувимех носимый, и дети еврейстии с ветвьми и ваиами предсретаху Тя. Темже и мы ветви масличныя носяще и ваиа, благодарственно Тебе вопием: осанна в вышних, благословен грядый во имя Господне.

Прежде шести дней Пасхи, прииде Иисус в Вифанию, и приступиша к Нему ученицы Его, глаголюще Ему: Господи, где хощеши уготоваем Ти ясти Пасху? Он же посла их, идите в преднюю весь, и обрящете человека скудель воды носяща, последуйте ему, и дому владыце рцыте: Учитель глаголет, у тебе сотворю Пасху со ученики Моими.

Славословие великое. И тропарь: Общее воскресение: Таже ектении, и час первый, и оглашение, и обычный отпуст, и литиа вне монастыря.

Возлюбих, яко услышит Господь глас моления моего. Припев: Молитвами Богородицы, Спасе спаси нас.

Стих: 2: Яко приклони ухо Свое мне, и во дни моя призову. Молитвами Богородицы, Спасе спаси нас.

Стих 3: Объяша мя болезни смертныя, беды адовы обретоша мя. Молитвами Богородицы, Спасе спаси нас.

Стих 4: Скорбь и болезнь обретох, и имя Господне призвах. Молитвами Богородицы, Спасе спаси нас.

Слава, и ныне: Молитвами Богородицы, Спасе спаси нас.

Веровах, темже возглаголах: аз же смирихся зело. Спаси ны Сыне Божий, возседый на жребя, поющия Ти: аллилуиа.

Стих 2: Что воздам Господеви о всех, яже воздаде ми? Спаси ны Сыне Божий:

Стих 3: Чашу спасения прииму, и имя Господне призову. Спаси ны Сыне Божий:

Стих 4: Молитвы моя Господеви воздам, пред всеми людьми Его. Спаси ны Сыне Божий:

Слава, и ныне: Единородный Сыне:

Исповедайтеся Господеви яко благ, яко в век милость Его. Тропарь: Общее воскресение:

Стих 2: Да речет убо дом Израилев: яко благ, яко в век милость Его. Общее воскресение:

Стих 3: Да речет убо дом Ааронь: яко благ, яко в век милость Его. Общее воскресение:

Стих 4: Да рекут убо вси боящиися Господа: яко благ, яко в век милость Его. Общее воскресение:

Вход: Благословен грядый во имя Господне, благословихом вы из дому Господня, Бог Господь, и явися нам. Тропарь: Общее воскресение: Слава: Спогребшеся Тебе крещением Христе: И ныне, кондак: На престоле на небеси:

Таже Трисвятое. Прокимен Апостола, глас 4: Благословен грядый во имя Господне, Бог Господь, и явися нам. Стих: Исповедайтеся Господеви яко благ, яко в век милость Его.

Братие, радуйтеся всегда о Господе: и паки реку: радуйтеся.	Братья, радуйтесь всегда в Господе; и еще говорю: радуйтесь.
Кротость ваша разумна да будет всем человеком. Господь близ.	Кротость ваша да будет известна всем человекам. Господь близко.
Ни о чемже пецытеся, но во всем молитвою и молением со благодарением прошения ваша да сказуются к Богу:	Не заботьтесь ни о чем, но всегда в молитве и прошении с благодарением открывайте свои желания пред Богом,
И мир Божий, превосходяй всяк ум, да соблюдет сердца ваша и разумения ваша о Христе Иисусе.	И мир Божий, который превыше всякого ума, соблюдет сердца ваши и помышления ваши во Христе Иисусе.
Прочее же, братие (моя), елика суть истинна, елика честна, елика праведна, елика пречиста, елика прелюбезна, елика доброхвальна, аще кая добродетель и аще кая похвала, сия помышляйте.	Наконец, братия мои, что только истинно, что честно, что справедливо, что чисто, что любезно, что достославно, что только добродетель и похвала, о том помышляйте.
Имже и научистеся, и приясте, и слышасте, и видесте во мне, сия творите: и Бог мира будет с вами.	Чему вы научились, что приняли и слышали и видели во мне, то исполняйте, – и Бог мира будет с вами.

Аллилуиа, глас 1: Воспойте Господеви песнь нову, яко дивна сотвори Господь. Стих: Видеша вси концы земли спасение Бога нашего.

Прежде шести дний Пасхи прииде Иисус в Вифанию, идеже бе Лазарь умерый, егоже воскреси от мертвых.	За шесть дней до Пасхи пришел Иисус в Вифанию, где был Лазарь умерший, которого Он воскресил из мертвых.
Сотвориша же Ему вечерю ту, и Марфа служаше: Лазарь же един бе от возлежащих с Ним.	Там приготовили Ему вечерю, и Марфа служила, и Лазарь был одним из возлежавших с Ним.
Мариа же приемши литру мира нарда пистика многоценна, помаза нозе Иисусове, и отре власы своими нозе Его: храмина же исполнися от вони масти благовонныя.	Мария же, взяв фунт нардового чистого драгоценного мира, помазала ноги Иисуса и отерла волосами своими ноги Его; и дом наполнился благоуханием от мира.
Глагола же един от ученик Его, Иуда Симонов Искариотский, иже хотяше Его предати:	Тогда один из учеников Его, Иуда Симонов Искариот, который хотел предать Его, сказал:
Чесо ради миро сие не продано бысть на триех стех пенязь и дано нищим?	Для чего бы не продать это миро за триста динариев и не раздать нищим?
Сие же рече, не яко о нищих печашеся, но яко тать бе, и ковчежец имеяше, и вметаемая ношаше.	Сказал же он это не потому, чтобы заботился о нищих, но потому что был вор. Он имел при себе денежный ящик и носил, что туда опускали.
Рече же Иисус: не дейте ея, да в день погребения Моего соблюдет е:	Иисус же сказал: оставьте ее; она сберегла это на день погребения Моего.
Нищия бо всегда имате с собою, Мене же не всегда имате.	Ибо нищих всегда имеете с собою, а Меня не всегда.
Разуме же народ мног от Иудей, яко ту есть: и приидоша не Иисуса ради токмо, но да и Лазаря видят, егоже воскреси от мертвых.	Многие из Иудеев узнали, что Он там, и пришли не только для Иисуса, но чтобы видеть и Лазаря, которого Он воскресил из мертвых.
Совещаша же архиерее, да и Лазаря убиют,	Первосвященники же положили убить и Лазаря,
Яко мнози его ради идяху от Иудей и вероваху во Иисуса.	Потому что ради него многие из Иудеев приходили и веровали в Иисуса.
Во утрий же день народ мног пришедый в праздник, слышавше, яко Иисус грядет во Иерусалим,	На другой день множество народа, пришедшего на праздник, услышав, что Иисус идет в Иерусалим,
Прияша ваиа от финик, и изыдоша в сретение Ему, и зваху глаголюще: осанна, благословен грядый во имя Господне, Царь Израилев.	Взяли пальмовые ветви, вышли навстречу Ему и восклицали: осанна! благословен грядущий во имя Господне, Царь Израилев!
Обрет же Иисус oсля, вседе на не, якоже есть писано:	Иисус же, найдя молодого осла, сел на него, как написано:
Не бойся, дщи Сионя: се Царь твой грядет, седя на жребяти oсли.	Не бойся, дщерь Сионова! се, Царь твой грядет, сидя на молодом осле.
Сих же не разумеша ученицы Его прежде: но егда прославися Иисус, тогда помянуша, яко сия быша о Нем писана, и сия сотвориша Ему.	Ученики Его сперва не поняли этого; но когда прославился Иисус, тогда вспомнили, что так было о Нем написано, и это сделали Ему.
Свидетельствоваше убо народ, иже бе прежде с Ним, егда Лазаря возгласи от гроба и воскреси его от мертвых:	Народ, бывший с Ним прежде, свидетельствовал, что Он вызвал из гроба Лазаря и воскресил его из мертвых.
Сего ради и срете Его народ, яко слышаша Его сие сотворша знамение.	Потому и встретил Его народ, ибо слышал, что Он сотворил это чудо.

И бывает Литугиа Златоустова.

Причастен: Благословен грядый во имя Господне, Бог Господь, и явися нам. Аллилуиа, трижды.

На трапезе утешение: ядим рыбы, и вино пием, благодаряще Бога.

Источник: http://pravoslavnyi.narod.ru/

Адрес страницы: http://days.pravoslavie.ru/rubrics/canon398.htm

Неделя ваий. Вход Господень в Иерусалим. Песнопения Триоди Постной.

Неделя ваий.
Вход Господень в Иерусалим.
Песнопения Триоди Постной.