Великий Пяток.
Песнопения Триоди Постной.

Во святый и Великий Четверток вечера, во 2-й час нощи (в 8-м часу вечера – А.Р.) знаменует. И собравшимся нам во храм, благословившу священнику поем начало по обычаю, якоже в четверток 5-й седмицы. Таже шестопсалмие. Посем ектениа великая, и по возгласе поем, Аллилуиа, на глас 8. И тропарь: Егда славнии ученицы: трижды, косно и со сладкопением. Писан в Великий Четверток на Утрени. Таже ектениа малая. И даются свещи братии от екклисиарха. И глаголет священник: И о сподобитися нам: И чтет первое Евангелие от Иоанна, завета Святых Страстей, зачало 46: Рече Господь Своим учеником: ныне прославися Сын Человеческий: Конец: И ученицы Его. И скончавшуся Евангелию, поем: Слава долготерпению Твоему, Господи. И абие поем антифоны, повторяюще вся тропари.

Князи людстии собрашася на Господа и на Христа Его.

Слово законопреступное возложиша на Мя: Господи, Господи, не остави Мене.

Чувствия наша чиста Христови представим, и яко друзи Его души наша пожрем Его ради, и не попеченьми житейскими соугнетаемся, яко Иуда, но в клетех наших возопиим: Отче наш, Иже на небесех, от лукаваго избави нас.

Слава, Богородичен: Дева родила еси Неискусобрачная, и Дева пребыла еси Мати Безневестная, Богородице Марие: Христа Бога нашего моли спастися нам.

Тече глаголя Иуда беззаконным книжником: что мне хощете дати, и аз вам предам Его? Среди же совещавающих Сам стоял еси невидимо Совещаваемый: Сердцеведче, пощади души наша.

Милостию Богови послужим, якоже Марии на вечери, и не стяжим сребролюбия, яко Иуда: да всегда со Христом Богом будем.

Слава, Богородичен: Егоже родила еси, Дево, неизреченно, выну яко Человеколюбца не престай молящи, да от бед спасет вся к Тебе прибегающия.

Лазарева ради востания, Господи, осанна Тебе зваху дети еврейския, Человеколюбче. Беззаконный же Иуда не восхоте разумети.

На вечери Твоей, Христе Боже, учеником Твоим предглаголал еси: един от вас предаст Мя. Беззаконный же Иуда не восхоте разумети.

Иоанну вопросившу: Господи, предаяй Тя кто есть? Того хлебом показал еси. Беззаконный же Иуда не восхоте разумети.

На тридесятих сребреницех, Господи, и на лобзании льстивном, искаху иудее убити Тя. Беззаконный же Иуда не восхоте разумети.

На умовении Твоем, Христе Боже, учеником Твоим повелел еси: сице творите, якоже видите. Беззаконный же Иуда не восхоте разумети.

Бдите и молитеся, да не внидете в напасть, учеником Твоим, Христе Боже наш, глаголал еси. Беззаконный же Иуда не восхоте разумети.

Слава, Богородичен: Спаси от бед рабы Твоя, Богородице, яко все по Бозе к Тебе прибегаем, яко нерушимой стене и предстательству.

На вечери ученики питая, и притворение предания ведый, на ней Иуду обличил еси, неисправленна убо сего ведый: познати же всем хотя, яко волею предался еси, да мир исхитиши от чуждаго: Долготерпеливе, слава Тебе.

Таже И о сподобитися нам: И чтет священник второе Евангелие, от Иоанна, зачало 58: Во время оно, изыде Иисус со ученики: Конец: Но да ядят фаску.

Днесь Иуда оставляет Учителя и приемлет диавола, ослепляется страстию сребролюбия, отпадает Света омраченный: како бо можаше зрети, Светило продавый на тридесятих сребреницех? Но нам возсия Страдавый за мир. К Немуже возопиим: пострадавый и сострадавый человеком, Господи, слава Тебе.

Днесь Иуда притворяет благочестие и отчуждается дарования, сый ученик бывает предатель: во обычном лобзании лесть покрывает, и предпочитает Владычния любве, несмысленно работати сребролюбию, наставник быв соборища беззаконнаго: мы же имуще спасение Христа, Того прославим.

Глас 1: Братолюбие стяжим яко во Христе братия, а не немилостивное еже к ближним нашим: да не яко раб осудимся немилостивый, пенязей ради, и яко Иуда раскаявшеся, ничтоже пользуемся.

Слава, Богородичен: Преславная о Тебе глаголашася везде, яко родила еси плотию всех Творца, Богородице Марие, Всепетая и Неискусобрачная.

Ученик Учителя соглашаше цену и на тридесятих сребреницех продаде Господа, лобзанием льстивным предая Его беззаконником на смерть.

Днесь глаголаше Зиждитель небесе и земли Своим учеником: приближися час, и приспе Иуда предаяй Мене, да никтоже отвержется Мене, видя Мя на Кресте посреде двою разбойнику: стражду бо яко человек, и спасу яко Человеколюбец в Мя верующия.

Слава, Богородичен: Неизреченно в последняя заченшая и рождшая Создателя Твоего, Того моли спастися душам нашим.

Днесь бдит Иуда предати Господа, Превечнаго Спаса мира, Иже от пяти хлеб насытившаго множества. Днесь беззаконный отметается Учителя, ученик быв. Владыку предаде: сребром продаде, манною насытившаго человека.

Днесь Кресту пригвоздиша иудее Господа, пресекшаго море жезлом и проведшаго их в пустыню. Днесь копием ребра Его прободоша, язвами ранившаго их ради Египта: и желчию напоиша, манну пищу им одождившаго.

Господи, на страсть вольную пришед, вопиял еси учеником Твоим: аще и единаго часа не возмогосте бдети со Мною, како обещастеся умрети Мене ради? Поне Иуду зрите, како не спит, но тщится предати Мя беззаконным. Востаните, молитеся, да не кто Мене отвержется, зря Мене на Кресте. Долготерпеливе, слава Тебе.

Слава, Богородичен: Радуйся, Богородице, Невместимаго в небесех вместившая во утробе Твоей: радуйся, Дево, пророков проповедание, Еюже нам возсия Еммануил: радуйся, Мати Христа Бога.

Кий тя образ, Иудо, предателя Спасу содела? Еда от лика тя апостольска разлучи? Еда дарования исцелений лиши? Еда со онеми вечеряв, тебе от трапезы отрину? Еда иных ноги умыв, твои же презре? О коликих благ непамятлив был еси! И твой убо неблагодарный обличается нрав. Того же безмерное проповедуется долготерпение и велия милость.

Евангелие 3-е от Матфеа, зачало 109: Во время оно воини емше Иисуса: Конец: Плакася горько.

Емшим Тя беззаконным, претерпевая, сице вопиял еси, Господи: аще и поразисте Пастыря и расточисте дванадесять овец, ученики Моя, можах вящше, нежели дванадесять легеонов представити Ангелов. Но долготерплю, да исполнятся, яже явих вам пророки Моими, безвестная и тайная: Господи, слава Тебе.

Трищи отвергся Петр, абие реченное ему разуме, но принесе к Тебе слезы покаяния: Боже, очисти мя и спаси мя.

Слава, Богородичен: Яко врата спасительная и рай красный, и Света присносущнаго облак, сущую Святую Деву воспоим вси, глаголюще Ей, еже радуйся.

Рцыте, беззаконнии, что слышасте от Спаса нашего? Не закон ли положи и пророческая учения? Како убо помыслисте Пилату предати, Иже от Бога, Бога Слова и Избавителя душ наших?

Да распнется, вопияху Твоих дарований присно наслаждающиися, и злодея вместо Благодетеля прошаху прияти, праведников убийцы: молчал же еси, Христе, терпя их суровство, пострадати хотя и спасти нас, яко Человеколюбец.

Слава, Богородичен: Яко не имамы дерзновения за премногия грехи наша, Ты, Иже от Тебе Рождшагося, моли, Богородице Дево: много бо может моление Матернее ко благосердию Владыки. Не презри грешных мольбы, Всечистая, яко Милостив есть и спасти могий, Иже и страдати о нас изволивый.

Поставиша тридесять сребреников цену цененаго, Егоже оцениша от сынов Израилевых. Бдите и молитеся, да не внидете во искушение, дух убо бодр, плоть же немощна: сего ради бдите.

Даша в снедь Мою желчь, и в жажду Мою напоиша Мя оцта: Ты же, Господи, возстави мя, и воздам им.

Слава, Богородичен: Иже от язык поем Тя, Богородице Чистая, яко Христа Бога нашего родила еси, от клятвы человеки Тобою свобождшаго.

О како Иуда иногда Твой ученик, предательству поучашеся на Тя, свечеря льстивно, наветник и неправедник, шед, рече священником: что ми подаете и предам вам Онаго, закон разорившаго и осквернившаго субботу? Долготерпеливе Господи, слава Тебе.

Евангелие 4-е, от Иоанна, зачало 59. Во время оно, ведоша Иисуса от Каиафы в претор. Конец: Предаде Его им, да распнется.

Одеяйся светом, яко ризою, наг на суде стояще, и в ланиту ударение прият от рук, ихже созда: беззаконнии же людие на Кресте пригвоздиша Господа Славы: тогда завеса церковная раздрася, солнце померче, не терпя зрети Бога досаждаема, Егоже трепещут всяческая. Тому поклонимся.

Ученик отвержеся, разбойник возопи: помяни мя, Господи, во Царствии Твоем.

Слава, Богородичен: Умири мир, от Девы изволивый, Господи, плоть носити за рабы, да согласно Тебе славословим, Человеколюбче.

За благая, яже сотворил еси, Христе, роду еврейскому, распяти Тя осудиша, оцта и желчи напоивше Тя. Но даждь им, Господи, по делом их, яко не разумеша Твоего снизхождения.

О предательстве не довольни быша, Христе, роди еврейстии, но покиваху главами своими, хулу и ругание приносяще. Но даждь им, Господи, по делом их, яко не разумеша Твоего смотрения.

Ниже земля яко потрясеся, ниже камение яко разседеся, евреов увещаша, ниже церковная завеса, ниже мертвых воскресение. Но даждь им, Господи, по делом их, яко тщетным на Тя поучишася.

Слава, Богородичен: Бога от Тебе воплощеннаго познахом, Богородице Дево, Едина Чистая, Едина Благословенная: тем непрестанно Тя, воспевающе, величаем.

Сия глаголет Господь иудеем: людие Мои, что сотворих вам? Или чим вам стужих? Слепцы ваши просветих, прокаженныя очистих, мужа, суща на одре, возставих. Людие Мои, что сотворих вам? И что Ми воздасте? За манну желчь: за воду оцет: за еже любити Мя, ко Кресту Мя пригвозидисте. Ктому не терплю прочее, призову Моя языки, и тии Мя прославят со Отцем и Духом, и Аз им дарую живот вечный.

Днесь церковная завеса на обличение беззаконных раздирается, и солнце лучи своя скрывает, Владыку зря распинаема.

Законоположницы Израилевы, иудее и фарисее, лик апостольский вопиет к вам: се Храм, Егоже вы разористе, се Агнец, Егоже вы распясте и гробу предасте: но властию Своею воскресе. Не льститеся, иудее: Той бо есть, Иже в мори спасый и в пустыни питавый: Той есть Живот, и Свет, и Мир мирови.

Слава, Богородичен: Радуйся, врата Царя Славы, яже Вышний Един пройде и паки запечатленна остави, во спасение душ наших.

Егда предстал еси Каиафе, Боже, и предался еси Пилату, Судие, небесныя силы от страха поколебашася. Егда же вознеслся еси на древо, посреде двою разбойнику, вменился еси с беззаконными, Безгрешне, за еже спасти человека: Незлобиве Господи, слава Тебе.

Евангелие 5-е, от Матфеа, зачало 111: Во время оно, видев Иуда, предавый Иисуса: Конец: Понести крест Его.

Собрание иудейское у Пилата испросиша распяти Тя, Господи: вины бо в Тебе не обретше, повиннаго Варавву свободиша, и Тебе, Праведнаго, осудиша, сквернаго убийства грех наследовавше. Но даждь им, Господи, воздаяние их, яко тщетным на Тя поучишася.

Егоже вся ужасаются и трепещут, и всяк язык поет, Христа, Божию Силу и Божию Премудрость, священницы за ланиту удариша и даша Ему желчь: и вся пострадати изволи, спасти ны хотя от беззаконий наших Своею Кровию, яко Человеколюбец.

Слава, Богородичен: Богородице, рождшая словом паче слова, Создателя Своего: Того моли спасти души наша.

Господи, Иже разбойника спутника приемый, в крови руце осквернившаго, и нас с ним причти, яко Благ и Человеколюбец.

Мал глас испусти разбойник на кресте, велию веру обрете во едином мгновении спасеся и первый, райская врата отверз, вниде: Иже того покаяние восприемый, Господи, слава Тебе.

Слава, Богородичен: Радуйся, Ангелом радость мира приемшая. Радуйся, рождшая Творца Твоего и Господа. Радуйся, сподобльшаяся быти Мати Божия.

Днесь висит на древе, Иже на водах землю повесивый: венцем от терния облагается, Иже Ангелов Царь: в ложную багряницу облачается, одеваяй небо облаки: заушение прият, Иже во Иордане свободивый Адама: гвоздьми пригвоздися Жених Церковный: копием прободеся Сын Девы. Покланяемся Страстем Твоим, Христе. Покланяемся Страстем Твоим, Христе. Покланяемся Страстем Твоим, Христе. Покажи нам и славное Твое Воскресение.

Не яко иудее празднуем: ибо Пасха наша за ны пожреся Христос: но очистим сами себе от всякия скверны и чисто помолимся Ему: воскресни, Господи, спаси нас, яко Человеколюбец.

Крест Твой, Господи, жизнь и заступление людом Твоим есть, и нань надеющеся, Тебе распятаго Бога нашего поем, помилуй нас.

Слава, Богородичен: Видящи Тя висима, Христе, Тебе Рождшая вопияше: что странное еже вижду таинство, Сыне Мой? Како на древе умираеши плотию водружен, Жизни Подателю?

Искупил ны еси от клятвы законныя честною Твоею Кровию, на Кресте пригвоздився и копием прободся, безсмертие источил еси человеком, Спасе наш, слава Тебе.

Евангелие 6-е, от Марка, зачало 67: Во время оно воини ведоша Иисуса: Конец: Да видим и веру имем Ему.

Во Царствии Твоем помяни нас, Господи, егда приидеши во Царствии Твоем.

Блажени нищии духом, яко тех есть Царство Небесное.

Блажени плачущии, яко тии утешатся.

Блажени кротции, яко тии наследят землю.

Блажени алчущии и жаждущии правды, яко тии насытятся.

Древом Адам рая бысть изселен, древом же крестным разбойник в рай вселися. Ов убо вкушь, заповедь отверже Сотворшаго, ов же сраспинаемь, Бога Тя исповеда таящагося: помяни и нас, Спасе, во Царствии Твоем.

Блажени милостивии, яко тии помиловани будут.

Закону Творца от ученика купиша беззаконнии и, яко законопреступника, Того Пилатову судищу представиша, зовуще: распни, в пустыни сим Маннодавшаго. Мы же, праведнаго разбойника подражавше, верою зовем: помяни и нас, Спасе, во Царствии Твоем.

Блажени чистии сердцем, яко тии Бога узрят.

Богоубийц собор, иудейский язык беззаконный, к Пилату неистовне зовый, глаголаше: распни Христа неповиннаго, Варавву же паче нам отпусти. Мы же вещаим к Нему разбойника благоразумнаго глас: помяни и нас, Спасе, во Царствии Твоем.

Блажени миротворцы, яко тии сынове Божии нарекутся.

Живоносная Твоя ребра, яко из Едема источник источающая, Церковь Твою, Христе, яко словесный напаяет рай, отсюду разделяяся яко в начала, в четыри Евангелиа, мир напаяя, тварь веселя и языки верно научая покланятися Царствию Твоему.

Блажени изгнани правды ради, яко тех есть Царство Небесное.

Распялся еси мене ради, да мне источиши оставление: прободен был еси в ребра, да капли жизни источиши ми: гвоздьми пригвоздился еси, да аз глубиною Страстей Твоих к высоте державы Твоея уверяемь, зову Ти: Живодавче Христе, слава Кресту, Спасе, и Страсти Твоей.

Блажени есте, егда поносят вам, и изженут, и рекут всяк зол глагол на вы лжуще Мене ради.

Распинаему Тебе, Христе, вся тварь, видящи, трепеташе, основания земли колебахуся страхом державы Твоея, светила скрывахуся, и церковная раздрася завеса, горы вострепеташа, и камение разседеся, и разбойник верный зовет с нами, Спасе: еже помяни во Царствии Твоем.

Радуйтеся и веселитеся, яко мзда ваша многа на небесех.

Рукописание наше на Кресте растерзал еси, Господи, и, вменився в мертвых, тамошняго мучителя связал еси, избавль всех от уз смертных Воскресением Твоим, имже просветихомся, Человеколюбче Господи, и вопием Тебе: помяни и нас, Спасе, во Царствии Твоем.

Слава:

Отца, и Сына, и Духа Святаго вси единомудренно, вернии, славословити достойно помолимся, Единицу Божества, в Триех сущую Ипостасех, неслиянну пребывающу, просту, нераздельну и неприступну, Еюже избавляемся огненнаго мучения.

И ныне, Богородичен:

Матерь Твою, Христе, плотию безсеменно рождшую Тя, и Деву воистинну, и по рождестве пребывшую нетленну, Сию Тебе приводим в молитву, Владыко Многомилостиве, прегрешений прощению дароватися всегда зовущим: помяни нас, Спасе, во Царствии Твоем.

Прокимен, глас 4: Разделиша ризы Моя себе и о одежди Моей меташа жребий. Стих: Боже, Боже Мой, вонми Ми, вскую оставил Мя еси?

Евангелие 7-е, от Матфеа, зачало 113: Во время оно, пришедше воини: Конец: Воистинну Божий Сын бе Сей.

И полагается чтение. Таже псалом 50.

И посем Евангелие 8-е, от Луки, зачало 111: Во время оно ведяху со Иисусом и ина два: Конец: От Галилеи зряще сих.

{Π} Ирмос: К Тебе утренюю, милосердия ради Себе истощившему не преложно и до Страстей безстрастно преклоншемуся, Слове Божий, мир подаждь ми падшему, Человеколюбче.

{Ρ} Умывше ноги и предочистившеся таинства причащением Божественнаго ныне, Христе, Твоего, служителие от Сиона на Елеонскую гору великую с Тобою взыдоша, поюще Тя, Человеколюбче.

{Ο} Зрите, рекл еси, друзи, не бойтеся: ныне бо приближися час яту Ми быти и убиену рукама беззаконных: вси же расточитеся, Мене оставивше, ихже соберу проповедати Мя, Человеколюбца.

Нас ради Распятаго, приидите, вси воспоим, Того бо виде Мариа на древе, и глаголаше: аще и распятие терпиши, Ты еси Сын и Бог Мой.

Икос: Своего Агнца Агница зрящи к заколению влекома, последоваше Мариа простертыми власы со инеми женами, сия вопиющи: камо идеши, Чадо? Чесо ради скорое течение совершаеши? Еда другий брак паки есть в Кане Галилейстей, и тамо ныне тщишися, да от воды им вино сотвориши ? Иду ли с Тобою, Чадо, или паче пожду Тебе? Даждь Ми слово, Слове, не молча мимоиди Мене, Чисту соблюдый Мя: Ты бо еси Сын и Бог Мой.

Живый еси, Боже, Ты и умерщвленный на древе.

О Мертвече нагий и Бога Живаго Слове!

Заключенная отверзе едемская врата,

Вложив разбойник ключ, еже помяни мя.

Во святый и Великий Пяток, святыя и спасительныя и страшныя Страсти совершаем Господа и Бога Спаса нашего Иисуса Христа, яже нас ради волею прият: оплевания, биения, заушения, досады, насмеяния, багряную одежду, трость, губу, оцет, гвоздия, копие, и по сих всех, Крест и смерть: яже вся в пяток содеяшася. По внегда бо на тридесятих сребреницех от друга и ученика продан быв, предадеся, прежде ко Анне отводится архиерею, иже посылает Его к Каиафе: идеже оплеван бысть, и заушаемь по ланите, купно же поругаемь и посмеваемь, слышаше: прорцы нам, Христе, кто есть ударивый Тя? Тамо же и лжесвидетели приндоша оклеветающии, яко рече: разорите храм сей, и треми деньми воздвигну и: и яко рече Себе Сына Божия, егда и архиерей, хулы не терпя, ризу свою растерза. Утру же бывшу, отводится к Пилату в претор: и тин не внидоша, глаголет, да не осквернятся, но да ядят пасху. Пасху же весь праздник глаголет, или и тогда бысть, якоже подобаше: Христос же прежде единаго дне сию сотвори законную пасху, сзаклатися хотя в пяток. Изшед же Пилат, вопрошает я: о чесом Его оглаголуют? И, понеже ничтоже подобно обрете во оглаголании, посылает Его к Каиафе. Он же паки к Пилату, ибо той бе на Его убийство устремляяйся. Он же глаголет: поймите Его вы и распните, и по закону вашему судите. Они же паки глаголют: не достоит нам убити никогоже, распяти Пилата поощряюще. Вопрошает же Христа Пилат: аще царь иудеов есть? Он же не исповедует, но Вечный: не бо от мира сего Мое Царство, глаголет. Хотя же отрешити Его Пилат, первее убо онем глаголет, ни единыя на Него вины благоличныя обретати. Таже единаго на кийждо праздник связня обычай отрешати предлагает: имже угоден Варавва паче Христа мнится. Пилат же иудеом даруяй, бив Иисуса прежде, изводит с воины, во одеяние оболчена червленое, терновым же венцем обложенна, и в десницу Его трость вложив, ругаема же от воин, радуйся, глаголющих, Царю иудейский. Обаче сице ко благодати поругався, паки глаголет Пилат: ни едину же смерти вину обретаю в Нем. Они же, но мы Его умучим, глаголюще, яко Себе именует Сына Божия. Сим же глаголемым, Иисус молчаше, народ же кричаще к Пилату: распни, распни Его. Безчестною бо смертию обложи ти Его хотяху, да от среды благую Его память сотворят. Пилат же, аки бы срамляя их, глаголет: Царя ли вашего распну? Они же не имети глаголют инаго царя, но кесаря. Понеже бо хулу рекше, ничтоже успеша, на кесаря возносят, да поне сице неистовство исполнят. Глаголют бо: всяк иже царя себе творяй, пререкует кесарю. В сих же сущим, жена к Пилату посла, сны страшными убоявшися, ничтоже, глаголющи, тебе и Праведнику Оному: уже бо Его ради многая в ноши пострадах. И той, умывся, Крове Онаго вину отражает. Они же кричаху: Кровь Его на нас и на чада наша: аще Сего оставиши свободна, неси друг кесарю. Сего убо убоявся Пилат, аще и опасно Того ведый неповинна, крестному осуждению издает, отрешив Варавву. Сие же видев Иуда, сребреники поверг, отходит и, отшед, удавлению себе предаде, на древе обесився, последи же зело надувся растерзается. Воини убо тростию по главе Его поругавше, обременяют Ему крест. Таже от Киринии Симона понудивше, крест понести задевают. О часе же третием на лобнем месте бывше, тамо распинают Его, отобоюду Тому и другая два разбойника обесивше, да и Он яко злодей вменится. Худости же ради, разделение воини ризам Его полагают, жребием же нешвеную Его одежду дают, всякое досады премножество делающе. Не сия же точию, но и на Кресте сущу ругающеся глаголаху: уа, разоряяй храм и треми денми созидаяй, спаси Сам Себе. И паки: иныя спасе, Себе ли не может спасти? И паки: аще Царь Израилев есть, да снидет ныне со Креста и веруем в Него. И убо аще истину глаголаху, подобаше несумненно к Нему приступити: не точию бо Израилев Царь познавашеся, но и всего мира. Что бо хотяше, еже помрачитися солнцу на часы три, и посреде убо дне? Да всем будет Страсть явлена. Еже земли трястися, камению разседатися, противообразное иудеов обличающему: многим телесем воскреснути, во уверение общаго воскресения и в явление Страждущаго силы. Завесе церковной раздиратися, яко храму ярящуся, за еже в нем Страждущему славиму, и многим открывающему незримая. В третий убо час распятся Христос, якоже божественный Марко глаголет. От шестаго же часа до девятаго тьма бысть, егда и Лонгин сотник преславная видев, и паче солнца, вельми воззва: воистинну Сын бе Божий Сей. От разбойников убо един досаждаше Иисусу, другий же возбраняше ему, претя запретителнейше, и Христа Сына Божия исповедует: вере же его Спас воздая, еже с Собою в рай обещавает пребывание. Всякой убо досаде на Нем исполншейся, Пилат и титл надписа на Нем, глаголющь: Иисус Назарянин, Царь иудейский. Аще и они возбраняху не писати сице, но яко он рече, сице. Пилат же, еже писах, писах, паки противу рече. Таже Спасу возрекшу, жажду: иссоп со оцтом Ему растворяют. И рек: совершишася, преклонь главу, предаде дух. Всем же отшедшим, Мати Его предстояще у Креста и сестра ея, Мариа Клеогпова, юже Иаков роди, Клеопе безчадну умершу, еще же и Иоанн, любимый Ему ученик. Неразумнии убо иудее, ниже на Кресте телесе зрети довлееми, просиша Пилата, понеже великий бе день пасхи, и пяток, да осужденных голени сокрушатся, яко да скорее смерть приидет. И овех убо голени сокрушиша, еще бо живи бяху. На Иисуса же пришедше, яко видеша Его уже умерша, еже сокрушити убо, оставиша. Един же некто воинов, Лонгин зовомый, безумным угождая, воздвиг копие, в десная ребра прободает Христа: и абие изыде Кровь и вода, ово убо яко человека, ово же яко паче человека. Или, Кровь убо Божественных ради освящений причастия, вода же крещения ради. Той бо двоеточный источник воистинну, еже по нам содержит таинство: сия и Иоанн, видев, свидетельствова, и истинно есть свидетельство его, яко предстоя при всех и видя, пишет: и яко аще бы ложная имел глаголати, не бы на безчестие Учителю непщуемая списал. Сему, глаголют, тогда сущу, сосудом неким от животочных ребр Божественную и Пресвятую Кровь прияти. Сим же тако преестественно содеяным, понеже к вечеру бяше уже, Иосиф, иже от Аримафеа исходит, ученик прежде, якоже прочий, утаенный, и к Пилату пришед со дерзновением, яко знаему сущу, просит тело Иисусово: он же взяти повелевает. И убо с Креста сие снем всеблагоговейно положи. И уже пришедшей нощи приходит Никодим, нося смирны и алоа некое смешение, состроеное временем, и плащаницею обвивше, якоже обычай бе иудеем творити, близу положиша, во изсеченом от камене гробе Иосифове, идеже никтоже прежде лежа, да не Христу воскресшу, иному воскресение напишут. Смешению же алоа и смирны, прилепительным сущим, евангелист воспомяну, да егда видят плащаницу и сударь, во гробе оставлены, не непщуют украдену Ему быти: како бо свободе толицей не сущей, якоже и отторгнути оная сице всажденная плоти? Сия вся преславно бывшая в тогдашнее пятка время, и нам сих всех память творити с сокрушением сердца и умилением, богоноснии отцы повелеша. Ведомо же убо, яко в шестый день седмицы, яве в пяток распятся Господь, занеже и в шестый день изначала создатися человеку. Но и в шестый час дне на Кресте повешен бысть: зане в той час, якоже глаголют, и Адам на отреченное древо руце простер коснуся, и умре: подобаше бо в оньже час сокрушену, в той паки возсоздатися. В вертограде же, яко и Адам в раи. Горькое питие вкушение образоваше. Заушение нашу свободу являше. Оплевание и безчестное обвождение, еже о нас честь. Терновый венец, клятвы яже на нас отгнание. Багряная одежда за кожаныя ризы, и за еже на нас царскую утварь. Гвоздие, всеконечное нашего греха недвижение. Крест, древо еже в раи. Пронзенная ребра Адамово образоваху ребро, от негоже Ева, от неяже преступление. Копие, пламенное оружие мне отвращает. Из ребр вода, образ крещения. Кровь и трость, имиже нам червлеными писмены яко Царь, древнее отечество дарова и подписа. Глаголется убо Адамово главе тамо лежати, идеже и Христос Глава всех распятся: крестися убо Христовою Кровию истекшею. Лобное же место глаголется, занеже в потопе востекшей вне земли Адамово главе, кости точию носиме быти, яко некоему чуду зримому, юже Соломон честию праотца, со всем своим воинством, камением множайшим покры. Темже и место то оттоле Лифостротон, сиесть каменопостланное именовася. Глаголют убо святых изящнии, от предания имети, и самому Адаму тамо от Ангела погребену быти. Идеже убо труп, тамо и орел прииде, Христос, Вечный Царь, Новый Адам, ветхаго и древом падшаго Адама древом исцеляяй. Преестественным, и еже о нас неисчетным Твоим благоутробием, Христе Боже, помилуй нас, аминь.

{Σ} Ирмос: Столп злобы богопротивныя, божественнии отроцы обличиша: на Христа же шатающееся беззаконных соборище советует тщетная, убити поучается живот держащаго дланию: Егоже вся тварь благословит, славящи во веки.

{Α} От веждей учеником ныне сон, рекл еси, Христе, отрясите, в молитве же бдите, да не в напасть внидете, и наипаче Симоне: крепчайшему бо болий искус. Разумей Мя, Петре: Егоже вся тварь благословит, славящи во веки.

{Β} Скверна слова устен, никогдаже изреку Тебе, Владыка, с Тобою умру яко благоразумен, аще и вси отвергутся, возопи Петр. Ни плоть, ниже кровь, но Отец Твой откры ми Тя: Егоже вся тварь благословит, славящи во веки.

{Β} Глубину премудрости Божественныя и разума не всю испытал еси: бездну же Моих судеб не постигл еси, человече, Господь рече. Плоть убо сый, не хвалися, трижды бо отвержешися Мене: Егоже вся тварь благословит, славящи во веки.

{Α} Отрицаешися, Симоне Петре, еже сотвориши скоро, якоже речеся, и к тебе отроковица, едина пришедши, устрашит тя, Господь рече. Горце прослезив, обрящеши Мя обаче Милостива: Егоже вся тварь благословит, славящи во веки.

{Τ} Ирмос: Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.

{Ο} Пагубное соборище богомерзских, лукавнующих богоубийц сонмище, предста, Христе, Тебе, и яко неправедника влечаше Зиждителя всех, Егоже величаем.

{Ν} Закона не разумеюще нечестивиц, гласом пророческим поучающеся вотще, яко овча влечаху Тя, всех Владыку, неправедно закалати, Егоже величаем.

{Τ} Языком изданную жизнь, с книжники убити священницы предаху, уязвлен и самозавистною злобою, естеством Животодавца, Егоже величаем.

{Ε} Обыдоша яко пси мнози и удариша, Царю, ланиту Твою заушением, вопрошаху Тя, Тебе же ложна свидетельствоваху: и, вся претерпев, всех спасл еси.

Разбойника благоразумнаго во едином часе раеви сподобил еси, Господи, и мене древом крестным просвети и спаси мя.

Таже Евангелие 9-е, от Иоанна, зачало 61: Во время оно стояху при Кресте Иисусове: Конец: Воззрят Нань, Егоже прободоша.

И абие: Всякое дыхание: На глас 3, поставим стихи 4. И поем стихиры самогласны три, повторяюще первый:

Два и лукавная сотвори перворожденный сын Мой Израиль: Мене остави Источника воды животныя, и ископа себе кладенец сокрушенный: Мене на древе распят, Варавву же испроси и отпусти. Ужасеся небо о сем, и солнце лучи скры: ты же, Израилю, не усрамился еси, но смерти Мя предал еси. Остави им, Отче Святый, не ведят бо, что сотвориша.

Кийждо уд святыя Твоея плоти безчестие нас ради претерпе: терние, глава: лице, оплевания: челюсти, заушения: уста, во оцте растворенную желчь вкусом: ушеса, хуления злочестивая: плещи, биения: и рука, трость: всего телесе протяжения на Кресте: членове, гвоздия: и ребра, копие. Пострадавый за ны и от страстей свободивый нас, снизшедый к нам человеколюбием и вознесый нас, Всесильне Спасе, помилуй нас.

Распеншуся Ти, Христе, вся тварь, видящи, трепеташе, основания земли позыбашася страхом державы Твоея: Тебе бо вознесшуся днесь, род еврейский погибе, церковная завеса раздрася на двое, и мертвии от гробов воскресоша: сотник, видев чудо, ужасеся. Предстоящи же Мати Твоя вопияше, рыдающи матерски: како не возрыдаю и утробы Моея не бию, зрящи Тя нага, яко осуждена, на древе висяща? Распныйся и погребыйся, и воскресый из мертвых, Господи, слава Тебе.

Совлекоша с Мене ризы Моя и облекоша Мя в ризу червлену, возложиша на главу Мою венец от терний и в десную Мою руку вдаша трость, да сокрушу их, яко сосуды скудельничи.

Плещи Моя дах на раны, лица же Моего не отвратих от заплеваний, судищу Пилатову предстах и Крест претерпех за спасение мира.

Таже Евангелие 10-е, от Марка, зачало 69: Во время оно прииде Иосиф: Конец: Зрясте, где Его полагаху.

Таже Слава в вышних Богу: Священник же ектению: Исполним утреннюю молитву: И прочее по обычаю, и по возгласе: Яко Бог милости: абие Евангелие 11-е, от Иоанна, зачало 62: Во время оно моли Пилата Иосиф: Конец: Положиста Иисуса.

Вся тварь изменяшеся страхом, зрящи Тя на Кресте висима, Христе: солнце омрачашеся, и земли основания сотрясахуся, вся сострадаху Создавшему вся. Волею нас ради претерпевый, Господи, слава Тебе.

Глас 2. Стих: Разделиша ризы Моя себе и о одежди Моей меташа жребий.

Людно злочестивии и беззаконнии вскую поучаются тщетным? Вскую Живота всех на смерть осудиша? Велие чудо, яко Создатель мира в руки беззаконных предается, и на древо возвышается Человеколюбец, да яже во аде узники свободит зовущия: Долготерпеливе Господи, слава Тебе.

Стих: Даша в снедь Мою желчь и в жажду Мою напоиша Мя оцта.

Днесь зрящи Тя, Непорочная Дева, на Кресте, Слове, возвышаема, рыдающи матернею утробою, уязвляшеся сердцем горце, и стенящи болезненно из глубины души, лице со власы терзающи. Темже и перси биющи, взываше жалостно: увы Мне, Божественное Чадо, увы Мне, Свете мира: что зашел еси от очию Моею, Агнче Божий? Темже воинства безплотных, трепетом содержими бяху, глаголюще: Непостижиме Господи, слава Тебе.

Стих: Бог же, Царь наш прежде века, содела спасение посреде земли.

На древе видящи висима, Христе, Тебе, всех Зиждителя и Бога, безсеменно Рождшая Тя вопияше горько: Сыне Мой, где доброта зайде зрака Твоего? Не терплю зрети Тя неправедно распинаема: потщися убо, востани, яко да вижу и Аз Твое из мертвых тридневное Воскресение.

Господи, восходящу Ти на Крест, страх и трепет нападе на тварь, и земли убо возбранял еси поглотити распинающих Тя, аду же повелевал еси испустити узники, на обновление человеков. Судие живых и мертвых, жизнь пришел еси подати, а не смерть. Человеколюбче, слава Тебе.

Уже омакается трость изречения от судей неправедных, Иисус судимь бывает, и осуждается на крест, и страждет тварь, на Кресте видящи Господа. Но естеством телесе, мене ради страждай, Благий Господи, слава Тебе.

Таже Евангелие 12-е, от Матфеа, зачало 114: Во утрий день, иже есть по пятце: Конец: Знаменавше камень с кустодиею.

Таже Благо есть исповедатися Господеви: Трисвятое. По Отче наш:

Таже ектениа обычная. И отпуст. Первый же час не совокупляем ныне, но о втором часе дне.

О втором часе дне (в 8-м часу утра – А.Р.) клеплет, и облачится священник, и, благословившу ему, начинаем: Царю Небесный: Трисвятое. Пресвятая Троице: Отче наш: Возглашение: Яко Твое есть Царство: Господи, помилуй, 12. Слава, и ныне: Приидите, поклонимся: трижды. И глаголем псалмы сия, яже зде изъявляются.

Глаголы моя внуши, Господи, разумей звание мое. Вонми гласу моления моего, Царю мой и Боже мой, яко к Тебе помолюся, Господи. Заутра услыши глас мой, заутра предстану Ти и узриши мя. Яко Бог не хотяй беззакония, Ты еси: не приселится к Тебе лукавнуяй. Ниже пребудут беззаконницы пред очима Твоима: возненавидел еси вся делающия беззаконие. Погубиши вся глаголющия лжу, мужа кровей и льстива гнушается Господь. Аз же множеством милости Твоея, вниду в дом Твой, поклонюся ко храму святому Твоему, в страсе Твоем. Господи, настави мя правдою Твоею, враг моих ради исправи пред Тобою путь мой. Яко несть во устех их истины, сердце их суетно, гроб отверст гортань их, языки своими льщаху. Суди им, Боже, да отпадут от мыслей своих, по множеству нечестия их изрини я, яко преогорчиша Тя, Господи. И да возвеселятся вси уповающий на Тя, во век возрадуются, и вселишися в них, и похвалятся о Тебе любящии имя Твое. Яко Ты благословиши праведника, Господи, яко оружием благоволения венчал еси нас.

Вскую шаташася языцы, и людие поучишася тщетным? Предсташа царие земстии, и князи собрашася вкупе на Господа и на Христа Его. Расторгнем узы их, и отвержем от нас иго их. Живый на небесех посмеется им, и Господь поругается им. Тогда возглаголет к ним гневом Своим, и яростию Своею смятет я. Аз же поставлен есмь царь от Него над Сионом горою святою Его, возвещаяй повеление Господне. Господь рече ко Мне: Сын Мой еси Ты, Аз днесь родих Тя. Проси от Мене, и дам Ти языки достояние Твое, и одержание Твое концы земли. Упасеши я жезлом железным, яко сосуды скудельничи сокрушиши я. И ныне, царие, разумейте, накажитеся вси судящии земли. Работайте Господеви со страхом и радуйтеся Ему с трепетом. Приимите наказание, да не когда прогневается Господь, и погибнете от пути праведнаго, егда возгорится вскоре ярость Его. Блажени вси надеющиися Нань.

Боже, Боже мой, вонми ми, вскую оставил мя еси? Далече от спасения моего словеса грехопадений моих. Боже мой, воззову во дни, и не услышиши, и в нощи, и не в безумие мне. Ты же во святом живеши, хвало Израилева. На Тя уповаша отцы наши, уповаша, и избавил еси я. К Тебе воззваша, и спасошася: на Тя уповаша, и не постыдешася. Аз же есмь червь, а не человек, поношение человеков и уничижение людей. Вси видящии мя поругашамися, глаголаша устнами, покиваша главою. Упова на Господа, да избавит его, да спасет его, яко хощет его. Яко Ты еси исторгий мя из чрева: упование мое от сосцу матере моея. К Тебе привержен есмь от ложесн, от чрева матере моея Бог мой еси Ты. Да не отступиши от мене, яко скорбь близ, яко несть помогаяй ми. Обыдоша мя тельцы мнози, юнцы тучнии одержаша мя. Отверзоша на мя уста своя, яко лев восхищаяй и рыкаяй. Яко вода излияхся, и разсыпашася вся кости моя: бысть сердце мое, яко воск таяй посреде чрева моего. Изсше яко скудель крепость моя, и язык мой прильпе гортани моему, и в персть смерти свел мя еси. Яко обыдоша мя пси мнози, сонм лукавых одержаша мя: ископаша руце мои и нозе мои. Исчетоша вся кости моя, тии же смотриша и презреша мя. Разделиша ризы моя себе и о одежди моей меташа жребий. Ты же, Господи, не удали помощь Твою от мене, на заступление мое вонми. Избави от оружия душу мою, и из руки песни единородную мою. Спаси мя от уст львовых, и от рог единорожь смирение мое. Повем имя Твое братии моей, посреде церкве воспою Тя. Боящиися Господа, восхвалите Его, все семя Иаковле, прославите Его, да убоится же от Него все семя Израилево. Яко не уничижи, ниже негодова молитвы нищаго, ниже отврати Лице Свое от мене: и егда воззвах к Нему, услыша мя. От Тебе похвала моя, в церкви велицей исповемся Тебе: молитвы моя воздам пред боящимися Его. Ядят убозии, и насытятся, и восхвалят Господа взыскающии Его, жива будут сердца их в век века. Помянутся и обратятся ко Господу вси концы земли, и поклонятся пред Ним вся отечествия язык. Яко Господне есть Царствие, и Той обладает языки. Ядоша и поклонишася вси тучнии земли: пред Ним припадут вси низходящии в землю: и душа моя Тому живет. И семя мое поработает Ему, возвестит Господеви род грядущий. И возвестят правду Его людем рождшимся, яже сотвори Господь.

Слава, и ныне, аллилуиа, трижды. Господи, помилуй, трижды.

Распеншуся Тебе, Христе, погибе мучительство, попрана бысть сила вражия: ниже бо Ангел, ниже человек, но Сам, Господи, спасл еси нас, слава Тебе.

Таже поем тропари три от двунадесяти, повторяюще я. Глаголем же первый без стиха, тако бо творим и в прочих часех в первый тропарь. Во вторый же, глаголет наченший лик стих, и поет и. Таже паки другий лик стих, и поет и той и. Третий же глаголем на Славу, и на И ныне.

И паки туюже другий лик. Таже глаголет стих первый лик: Вскую шаташася языцы, и людие поучишася тщетным? И поем настоящий тропарь:

Яко овча на заколение веден был еси, Христе Царю, и яко агнец незлобивый пригвоздился еси Кресту, от беззаконных мужей, грех ради наших, Человеколюбче.

Стих: Предсташа царие земстии, и князи собрашася вкупе на Господа и на Христа Его.

Емшим Тя беззаконным, претерпевая, сице вопиял еси, Господи: аще и поразисте Пастыря, и расточисте дванадесять овец, ученики Моя, можах вящши, нежели дванадесяте легеонов представити Ангелов. Но долготерплю, да исполнятся, яже явих вам пророки Моими, безвестная и тайная: Господи, слава Тебе.

Прокимен пророчества, глас 4: Сердце его собра беззаконие себе. Стих: Блажен разумеваяй на нища и убога.

Тако глаголет Господь: прииму жезл Мой добрый и отвергу его, еже разорити завет Мой, егоже завещах ко всем людем. И разорятся в день оный, и уразумеют хананеи овцы хранимыя Мне, зане слово Господне есть. И реку к ним: аще добро пред вами есть, дадите мзду Мою или отрецытеся: и поставиша мзду Мою тридесять сребреник. И рече Господь ко мне: вложи я в горнило, и смотри аще искушено есть, имже образом искушен бых о них. И приях тридесять сребреник и вложих их в храм Господень в горнило.

Братие, мне да не будет хвалитися, токмо о Кресте Господа нашего Иисуса Христа, Имже мне мир распяся и аз миру. О Христе бо Иисусе ни обрезание что может, ни необрезание, но нова тварь. И елицы правилом сим жительствуют, мир на них и милость, и на Израили Божии. Прочее труды да никтоже ми дает: аз бо язвы Господа Иисуса на теле моем ношу. Благодать Господа нашего Иисуса Христа, со духом вашим, братие, аминь.

Таже Евангелие от Матфеа, зачало 110: Во время оно, утру бывшу, совет сотвориша вси архиерее: Чтет же в ряд и зачало 111, 112, 113. Конец: И мати сыну Зеведеову. Таже Стопы моя направи по словеси Твоему: Да исполнятся уста моя хваления: Трисвятое. И по Отче наш:

Нас ради Распятаго, приидите, вси воспоим. Того бо виде Мариа на древе и глаголаше: аще и распятие терпиши, Ты еси Сын и Бог Мой.

Таже Господи, помилуй, 40. Иже на всякое время: Господи, помилуй, трижды. Слава, и ныне: Честнейшую Херувим: Именем Господним благослови, отче. Священник: Боже, ущедри ны: Христе, Свете истинный:

Посем поем третий час. Глаголем: Приидите, поклонимся: трижды.

Суди, Господи, обидящия мя, побори борющия мя. Приими оружие и щит, и востани в помощь мою. Изсуни меч, и заключи сопротив гонящих мя: рцы души моей: спасение твое есмь Аз. Да постыдятся и посрамятся ищущии душу мою: да возвратятся вспять и постыдятся мыслящии ми злая. Да будут яко прах пред лицем ветра, и Ангел Господень оскорбляя их. Да будет путь их тьма и ползок, и Ангел Господень погоняя их. Яко туне скрыша ми пагубу сети своея, всуе поносиша души моей. Да приидет ему сеть, юже не весть, и ловитва, юже скры, да обымет и: и в сеть да впадет в ню. Душа же моя возрадуется о Господе, возвеселится о спасении Его. Вся кости моя рекут: Господи, Господи, кто подобен Тебе? Избавляяй нища из руки крепльших его, и нища и убога от расхищающих его. Воставше на мя свидетеле неправеднии, яже не ведех, вопрошаху мя. Воздаша ми лукавая воз благая, и безчадие души моей. Аз же, внегда они стужаху ми, облачахся во вретище, и смирях постом душу мою, и молитва моя в недра моя возвратится. Яко ближнему, яко брату нашему, тако угождах: яко плача и сетуя, тако смиряхся. И на мя возвеселишася и собрашася, собрашася на мя раны, и не познах: разделишася, и не умилишася. Искусиша мя, подражниша мя подражнением, поскрежеташа на мя зубы своими. Господи, когда узриши? Устрой душу мою от злодейства их, от лев единородную мою. Исповемся Тебе в церкви мнозе, в людех тяжцех восхвалю Тя. Да не возрадуются о мне враждующии ми неправедно, ненавидящии мя туне, и помизающии очима. Яко мне убо мирная глаголаху, и на гнев лести помышляху. Разшириша на мя уста своя, реша: благоже, благоже, видеша очи наши. Видел еси, Господи, да не премолчиши: Господи, не отступи от мене. Востани, Господи, и вонми суду моему. Боже мой, и Господи мой, на прю мою. Суди ми, Господи, по правде Твоей, Господи Боже мой, и да не возрадуются о мне. Да не рекут в сердцах своих: благоже, благоже души нашей, ниже да рекут, пожрохом его. Да постыдятся и посрамятся вкупе радующиися злом моим: да облекутся в студ и срам велеречующии на мя. Да возрадуются и возвеселятся хотящии правды моея: и да рекут выну, да возвеличится Господь, хотящии мира рабу Его. И язык мой поучится правде Твоей, весь день хвале Твоей.

Боже, хвалы моея не промолчи. Яко уста грешнича, и уста льстиваго на мя отверзошася, и глаголаша на мя языком льстивым. И словесы ненавистными обыдоша мя, и брашася со мною туне. Вместо еже любити мя, оболгаху мя, аз же моляхся. И положиша на мя злая за благая, и ненависть за возлюбление мое. Постави на него грешника, и диавол да станет одесную его. Внегда судитися ему, да изыдет осужден, и молитва его да будет в грех. Да будут дние его мали, и епископство его да приимет ин. Да будут сынове его сири, и жена его вдова. Движущеся да преселятся сынове его, и воспросят, да изгнани будут из домов своих. Да взыщет заимодавец вся, елика суть его, и да восхитят чуждии труды его. Да не будет ему заступника, ниже да будет ущедряяй сироты его. Да будут чада его в погубление, в роде едином да потребится имя его. Да воспомянется беззаконие отец его пред Господом: и грех матере его да не очистится. Да будут пред Господом выну, и да потребится от земли память их. Занеже не помяну сотворити милость, и погна человека нища и убога, и умилена сердцем умертвити. И возлюби клятву, и приидет ему: и не восхоте благословения, и удалится от него. И облечеся в клятву яко в ризу, и вниде яко вода во утробу его, и яко елей в кости его. Да будет ему яко риза, в нюже облачится, яко пояс, имже выну опоясуется. Сие дело оболгающих мя у Господа, и глаголющих лукавая на душу мою. И Ты, Господи, Господи, сотвори со мною имене ради Твоего, яко блага милость Твоя. Избави мя, яко нищ и убог есмь аз, и сердце мое смятеся внутрь мене. Яко сень, внегда уклонитися ей, отъяхся, стрясохся яко прузи. Колена моя изнемогоста от поста, и плоть моя изменися елеа ради. И аз бых поношение им: видеша мя, покиваша главами своими. Помози ми, Господи Боже мой, и спаси мя по милости Твоей. И да разумеют, яко рука Твоя сия, и Ты, Господи, сотворил еси ю. Прокленут тии, и ты благословиши: востающии на мя да постыдятся, раб же Твой возвеселится. Да облекутся оболгающии мя в срамоту, и одеждутся яко одеждею студом своим. Исповемся Господеви зело усты моими, и посреде многих восхвалю Его. Яко предста одесную убогаго, еже спасти от гонящих душу мою.

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего и от греха моего очисти мя. Яко беззаконие мое аз знаю и грех мой предо мною есть выну. Тебе Единому согреших и лукавое пред Тобою сотворих: яко да оправдишися во словесех Твоих и победиши, внегда судити Ти. Се бо в беззакониих зачат есмь, и во гресех роди мя мати моя, се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие, возрадуются кости смиренныя. Отврати Лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от Лица Твоего, и Духа Твоего святаго не отыми от мене. Воздаждь ми радость спасения Твоего и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо, всессожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая, тогда возложат на алтарь Твой тельцы.

Слава, и ныне, аллилуна, трижды. Господи, помилуй, трижды.

Господи, осудиша Тя иудее на смерть, Жизнь всех, иже Чермное море жезлом прошедший, на Кресте Тя пригвоздиша: и иже от камене мед ссавшии, желчь Тебе принесоша. Но волею претерпел еси, да нас свободиши от работы вражия, Христе Боже, слава Тебе.

И ныне, Богородичен: Богородице, Ты еси лоза: И поем три тропари от двунадесяти, повторяюще я. Глас 8:

Страха ради иудейскаго, друг Твой и ближний Петр отвержеся Тебе, Господи, и, рыдая, сице вопияше: слез моих не премолчи, рех бо сохранити веру, Щедре, и не сохраних: и наше покаяние такожде приими и помилуй нас.

Паки тойже. Таже стих:

Глаголы моя внуши, Господи:

Прежде Честнаго Твоего Креста, воином, ругающимся Тебе, Господи, умная воинства дивляхуся: обложился бо еси венцем поругания, землю живописавый цветы, багряницею поругания одеялся еси, облаки одеваяй твердь. Таковым бо смотрением разумеся Твое благоутробие, Христе, велия Твоя милость, слава Тебе.

Стих: Вонми гласу моления моего.

Влекомь на Крест, сице вопиял еси, Господи: за кое дело хощете Мя распяти, иудее? Яко разслабленныя ваша стягнух, зане мертвецы аки от сна возставих, кровоточивую исцелих, хананею помиловах. За кое дело хощете Мя убити, иудее? Но узрите, в Негоже ныне прободаете Христа, беззаконнии.

Прокимен, глас 4: Яко Аз на раны готов, и болезнь Моя предо Мною есть выну. Стих: Господи, да не яростию Твоею обличиши мене, ниже гневом Твоим накажеши мене.

Господь дает мне язык научения, еже разумети, егда подобает рещи слово: положи мя утро утро, приложи ми ухо, еже слышати, и наказание Господне отверзает уши мои, аз же не противлюся, ни противоглаголю. Плещи мои вдах на раны, и ланите мои на заушения, лица же моего не отвратих от студа заплеваний. И Господь Господь помощник ми бысть: сего ради не усрамихся, но положих лице свое, аки твердый камень, и разумех, яко не постыждуся: зане приближается оправдавый мя. Кто пряйся со мною? Да сопротивостанет мне купно. И кто судяйся со мною? Да приближится ко мне. Се Господь Господь поможет ми. Кто озлобит мя? Се вси вы яко риза обетшаете, и яко молие изъяст вы. Кто в вас бояйся Господа? Да послушает гласа отрока Его. Ходящии во тьме, и несть им света, надейтеся на имя Господне и утвердитеся о Бозе. Се вси вы огнь раждизаете, и укрепляете пламень: ходите светом огня вашего и пламенем, егоже разжегосте. Мене ради быша сия вам, в печали успнете.

Братие, Христос сущим нам немощным, по времени за нечестивых умре. Едва бо за праведника кто умрет: за благаго бо негли кто дерзнет умрети. Составляет же Свою любовь в нас Бог, яко еще грешником сущим нам, Христос за ны умре. Много же убо паче оправдали бывше ныне Кровию Его, спасемся Им от гнева. Аще бо врази бывше, примирихомся Богу смертию Сына Его, множае паче примирившеся, спасемся в животе Его.

Евангелие от Марка, зачало 66, 67 и 68, в ряд. Во время оно, совет сотвориша архиереи со старцы: Конец: Яже взыдоша с Ним во Иерусалим. И посем чтем по сказании, еже от Матфеа, слово крестное. Таже Господь Бог благословен: Трисвятое. И по Отче наш: кондак: Нас ради Распятаго: Господи, помилуй, 40. Молитва: Иже на всякое время: Господи, помилуй, трижды. Слава, и ныне. Честнейшую Херувим: Именем Господним благослови, отче. Иерей: Боже, ущедри ны:

Владыке Боже Отче Вседержителю, Господи Сыне Единородный Иисусе Христе, и Святый Душе, Едино Божество, едина сила, помилуй мя грешнаго: и имиже веси судьбами спаси мя недостойнаго раба Твоего, яко благословен еси во веки веков, аминь.

И абие поем шестый час. Глаголем: Приидите, поклонимся: трижды. И псалмы.

Боже, во имя Твое спаси мя, и в силе Твоей суди ми. Боже, услыши молитву мою, внуши глаголы уст моих. Яко чуждии восташа на мя, и крепции взыскаша душу мою, и не предложиша Бога пред собою, се бо Бог помогает ми, и Господь заступник души моей. Отвратит злая врагом моим, истиною Твоею потреби их. Волею пожру Тебе, исповемся имени Твоему, Господи, яко благо. Яко от всякия печали избавил мя еси, и на враги моя воззре око мое.

Изми мя, Господи, от человека лукава, от мужа неправедна избави мя. Иже помыслиша неправду в сердце, весь день ополчаху брани. Изостриша язык свой яко змиин, яд аспидов под устнами их. Сохрани мя, Господи, из руки грешничи, от человек неправедных изми мя, иже помыслиша запяти стопы моя. Скрыша гордии сеть мне, и ужи препяша сеть ногама моима. При стези соблазны положиша ми. Рех Господеви: Бог мой еси Ты, внуши, Господи, глас моления моего. Господи Господи, сило спасения моего, осенил еси над главою моею в день брани. Не предаждь мене, Господи, от желания моего грешнику: помыслиша на мя, не остави мене, да не когда вознесутся. Глава окружения их, труд устен их покрыет я. Падут на них углия огненная: низложиши я в страстех, и не постоят. Муж язычен не исправится на земли: мужа неправедна злая уловят во истление. Познах, яко сотворит Господь суд нищим и месть убогим. Обаче праведнии исповедятся имени Твоему, и вселятся правим с Лицем Твоим.

Живый в помощи Выщняго, в крове Бога Небеснаго водворится. Речет Господеви: заступник мой еси, и прибежище мое, Бог мой, и уповаю на Него. Яко Той избавит тя от сети ловчи, и от словесе мятежна. Плещма своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни: от вещи во тьме проходящия, от сряща и беса полуденнаго. Падет от страны твоея тысяща, и тма одесную тебе, к тебе же не приближится. Обаче очима Твоима смотриши и воздаяние грешников узриши. Яко Ты, Господи, упование мое, Вышняго положил еси прибежище Твое. Не приидет к тебе зло, и рана не приближится телеси твоему. Яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою. На аспида и василиска наступиши, и попереши льва и змиа. Яко на Мя упова, и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его. Долготою дней исполню его, и явлю ему спасение Мое.

Слава, и ныне: Аллилуиа, трижды. Господи, помилуй, трижды. Слава, тропарь, глас 2:

Спасение соделал еси посреде земли, Христе Боже, на Кресте пречистеи руце Твои простерл еси, собирая вся языки, зовущия: Господи, слава Тебе.

И ныне, Богородичен: Яко не имамы дерзновения: И поем 3 тропари от двунадесяти, глас 8, повторяюще я.

Сия глаголет Господь иудеем: людие Мои, что сотворих вам? Или чим вам стужих? Слепцы ваши просветих, прокаженныя очистих, мужа суща на одре возставих. Людие Мои, что сотворих вам? Или что Мне воздасте? За манну желчь, за воду оцет: за еже любити Мя, ко Кресту Мя пригвоздисте. Ктому не терплю прочее, призову Моя языки, и тии Мя прославят со Отцом и Духом, и Аз им дарую живот вечный.

Стих: Даша в снедь Мою желчь и в жажду Мою напоиша Мя оцта.

Законоположницы Израилевы, иудее и фарисее, лик апостольский вопиет к вам: се Храм, Егоже вы разористе: се Агнец, Егоже вы распясте, гробу предасте: но властию Своею воскресе. Не льститеся, иудее: Той бо есть, Иже в мори спасый и в пустыни питавый. Той есть Живот, и Свет, и Мир мирови.

Стих: Спаси мя, Боже, яко внидоша воды до души моея.

Приидите, христоноснии людие, видим, что совеща Иуда предатель со священники беззаконными на Спаса нашего: днесь повинна смерти Безсмертнаго Слова сотвориша и Пилату предавше, на месте лобном распяша. И сия стражда вопияше Спас наш, глаголя: остави им, Отче, грех сей, да разумеют языцы из мертвых Мое Воскресение.

Прокимен, глас 4: Господи Господь наш, яко чудно имя Твое по всей земли. Стих: Яко взятся великолепие Твое превыше небес.

Тако глаголет Господь: се уразумеет отрок Мой, и вознесется и прославится зело. Якоже ужаснутся о Тебе мнози, тако обезславится от человек вид Твой, и слава Твоя от сынов человеческих. Тако удивятся языцы мнози о Нем, и заградят царие уста своя: яко имже не возвестися о Нем, узрят, и иже не слышаша, уразумеют. Господи, кто верова слуху нашему? И мышца Господня кому открыся? Возвестихом, яко Отроча пред ним, яко корень в земли жаждущей, несть вида Ему, ниже славы: и видехом Его, и не имяше вида, ни доброты. Но вид Его безчестен, умален паче всех сынов человеческих: человек в язве сый, и ведый терпети болезнь, яко отвратися Лице Его, безчестно бысть, и не вменися. Сей грехи наша носит, и о нас болезнует, и мы вменихом Его быти в труде, и в язве от Бога, и во озлоблении. Той же язвен бысть за грехи наша, и мучен бысть за беззакония наша, наказание мира нашего на Нем, язвою Его мы исцелехом. Вси яко овцы заблудихом: человек от пути своего заблуди, и Господь предаде Его грех ради наших. И Той, зане озлоблен бысть, и не отверзает уст Своих: яко овча на заколение ведеся, и яко агнец пред стригущим Его безгласен, тако не отверзает уст Своих. Во смирении Его суд Его взятся, род же Его кто исповесть? Яко вземлется от земли живот Его, ради беззаконий людей Моих ведеся на смерть. И дам лукавыя вместо погребения Его, и богатыя вместо смерти Его: яко беззакония не сотвори, ниже обретеся лесть во устех Его. И Господь хощет очистити Его от язвы: аще дастся о гресе, душа ваша узрит семя долгоживотное. И хощет Господь рукою Своею отъяти болезнь от души Его, явити Ему свет, и создати разумом, оправдати праведнаго благослужаща многим, и грехи их Той понесет. Сего ради Той наследит многих, и крепких разделит корысти: зане предана бысть на смерть душа Его, и со беззаконными вменися, и Той грехи многих вознесе, и за беззакония их предан бысть. Возвеселися, неплоды нераждающая, возгласи и возопий, нечревоболевшая, яко многа чада пустыя паче, нежели имущая мужа.

Братие, святяй и освящаемии от Единаго вси: еяже ради вины не стыдится братию нарицати их, глаголя: возвещу имя Твое братии Моей, посреде Церкве воспою Тя. И паки: Аз буду надеяся Нань. И паки: се Аз и дети, яже Ми дал есть Бог. Понеже убо дети приобщишася плоти и крови, и Той приискренне приобщися техже, да смертию упразднит имущаго державу смерти, сиречь диавола. И избавит сих, елицы страхом смерти чрез все житие повинни беша работе. Не от Ангел убо когда приемлет, но от Семене Авраамова приемлет. Отнюдуже должен бе по всему подобитися братии, да милостив будет и верен первосвященник яже к Богу, во еже очистити грехи людския. В немже бо пострада, Сам искушен быв, может и искушаемым помощи.

Таже Евангелие от Луки, зачало 111: Во время оно ведяху со Иисусом и ина два злодея: Конец: От Галилеи зряще сих. И посем чтение. Таже Скоро да предварят ны: Трисвятое. По Отче наш: Кондак: Нас ради Распятаго: Господи, помилуй, 40. И молитва: Иже на всякое время: Господи, помилуй, трижды. Слава, и ныне: Честнейшую Херувим: Именем Господним благослови, отче. Священник: Боже, ущедри ны: Таже молитва святаго Великаго Василиа:

Боже и Господи Сил, и всея твари Содетелю, Иже за милосердие безприкладныя милости Твоея, Единороднаго Сына Твоего, Господа нашего Иисуса Христа, низпославый на спасение рода нашего, и Честным Его Крестом рукописание грех наших растерзавый и победивый тем начала и власти тьмы. Сам, Владыко Человеколюбче, приими и нас грешных благодарственныя сия и молебныя молитвы, и избави нас от всякаго всегубительнаго и мрачнаго прегрешения и всех озлобити нас ищущих, видимых и невидимых враг. Пригвозди страху Твоему плоти наша, и не уклони сердец наших в словеса или помышления лукавствия, но любовию Твоею уязви души наша, да, к Тебе всегда взирающе, и еже от Тебе светом наставляеми, Тебе неприступнаго и присносущнаго зряще Света, непрестанное Тебе исповедание и благодарение возсылаем Безначальному Отцу, со Единородным Твоим Сыном, и Всесвятым, и Благим, и Животворящим Твоим Духом, ныне и присно, и во веки веков, аминь.

Спаси мя, Боже, яко внидоша воды до души моея. Углебох в тимении глубины, и несть постояния. Приидох во глубины морския, и буря потопи мя. Утрудихся зовый, измолче гортань мой, исчезосте очи мои, от еже уповати ми на Бога моего. Умножишася паче влас главы моея ненавидящии мя туне: укрепишася врази мои изгонящии мя неправедно. Яже не восхищах, тогда воздаях. Боже, ты уведел еси безумие мое, и прегрешения моя от Тебе не утаишася. Да не постыдятся о мне терпящии Тебе, Господи, Господи сил: ниже да посрамятся о мне ищущии Тебе, Боже Израилев. Яко Тебе ради претерпех поношение, покры срамота лице мое. Чуждь бых братии моей, и странен сыновом матере моея. Яко ревность дому Твоего снеде мя, и поношения поносящих Ти нападоша на мя. И покрых постом душу мою, и бысть в поношение мне. И положих одеяние мое вретище, и бых им в притчу. О мне глумляхуся седящии во вратех, и о мне пояху пиющии вино. Аз же молитвою моею к Тебе, Боже, время благоволения. Боже, во множестве милости Твоея услыши мя, во истине спасения Твоего. Спаси мя от брения, да не углебну, да избавлюся от ненавидящих мя, и от глубоких вод. Да не потопит мене буря водная, ниже да пожрет мене глубина, ниже сведет о мне ровенник уст своих. Услыши мя, Господи, яко блага милость Твоя, по множеству щедрот Твоих призри на мя. Не отврати Лица Твоего от отрока Твоего, яко скорблю, скоро услыши мя. Вонми души моей, и избави ю: враг моих ради избави мя. Ты бо веси поношение мое, и студ мой, и срамоту мою, пред Тобою вси оскорбляющии мя. Поношение чаяше душа моя и страсть, и ждах соскорбящаго, и не бе, и утешающих, и не обретох. И даша в снедь мою желчь, и в жажду мою напоиша мя оцта. Да будет трапеза их пред ними в сеть, и в воздаяние, и в соблазн. Да помрачатся очи их, еже не видети, и хребет их выну сляцы. Пролей на ня гнев Твой, и ярость гнева Твоего да постигнет их. Да будет двор их пуст, и в жилищах их да не будет живый. Зане егоже Ты поразил еси, тии погнаша, и к болезни язв моих приложиша. Приложи беззаконие к беззаконию их, и да не внидут в правду Твою. Да потребятся от книги живых, и с праведными да не напишутся. Нищ и боляй есмь аз, спасение Твое, Боже, да приимет мя. Восхвалю имя Бога моего с песнию, возвеличу Его во хвалении. И угодно будет Богу паче тельца юна, роги износяща и пазнокти. Да узрят нищии, и возвеселятся, взыщите Бога, и жива будет душа ваша. Яко услыша убогия Господь, и окованныя Своя не уничижи. Да восхвалят Его небеса и земля, море, и вся живущая в нем. Яко Бог спасет Сиона, и созиждутся гради иудейстии: и вселятся тамо, и наследят и. И семя рабов Твоих удержит и, и любящии имя Твое вселятся в нем.

Боже, в помощь мою вонми, Господи, помощи ми потщися. Да постыдятся и посрамятся ищущии душу мою, да возвратятся вспять, и постыдятся хотящии ми злая. Да возвратятся абие стыдящеся, глаголющии ми: благоже, благоже. Да возрадуются и возвеселятся о Тебе вси ищущий Тебе, Боже, и да глаголют выну: да возвеличится Господь, любящии спасение Твое. Аз же нищ есмь и убог. Боже, помози ми, Помощник мой, и Избавитель мой еси Ты, Господи, не закосни.

Приклони, Господи, ухо Твое, и услыши мя, яко нищ и убог есмь аз. Сохрани душу мою, яко преподобен есмь: спаси раба Твоего, Боже мой, уповающаго на Тя. Помилуй мя, Господи, яко к Тебе воззову весь день. Возвесели душу раба Твоего, яко к Тебе взях душу мою. Яко Ты, Господи, благ и кроток, и многомилостив всем призывающим Тя. Внуши, Господи, молитву мою, и вонми гласу моления моего. В день скорби моея воззвах к Тебе, яко услышал мя еси. Несть подобен Тебе в бозех, Господи, и несть по делом Твоим. Вси языцы, елики сотворил еси, приидут, и поклонятся пред Тобою, Господи, и прославят имя Твое: яко велий еси Ты, и творяй чудеса. Ты еси Бог Един. Настави мя, Господи, на путь Твой, и пойду во истине Твоей: да возвеселится сердце мое боятися имене Твоего. Исповемся Тебе, Господи Боже мой, всем сердцем моим, и прославлю имя Твое в век. Яко милость Твоя велия на мне, и избавил еси душу мою от ада преисподнейшаго. Боже, законопреступницы восташа на мя, и сонм державных взыскаша душу мою, и не предложиша Тебе пред собою. И Ты, Господи Боже мой, щедрый и милостивый, долготерпеливый и многомилостивый и истинный, призри на мя и помилуй мя, даждь державу Твою Отроку Твоему, и спаси сына рабы Твоея. Сотвори со мною знамение во благо, и да видят ненавидящии мя, и постыдятся: яко Ты, Господи, помогл ми и утешил мя еси.

Слава, и ныне, Аллилуиа, трижды. Господи, помилуй, трижды. Слава, тропарь, глас 8:

Видя разбойник Начальника Жизни на Кресте висяща, глаголаше: аще не бы Бог был воплощся, Иже с нами распныйся, не бы солнце лучи (своя) потаило, ниже бы земля трепещущи тряслася. Но вся терпяй, помяни мя, Господи, во Царствии Твоем.

И ныне, Богородичен: Иже нас ради рождейся от Девы: И поем тропари три от двунадесяти, глас 7:

Ужас бе видети небесе и земли Творца на Кресте висяща, солнце померкшее, день же паки в нощь преложшийся, и землю из гробов возсылающу телеса мертвых: с нимиже покланяемся Тебе, спаси нас. [Дважды.]

Стих: Разделиша ризы Моя себе и о одежди Моей меташа жребий.

Егда на Кресте пригвоздиша беззаконнии Господа славы, вопияше к ним: чим вас оскорбих? Или о чем прогневах? Прежде Мене кто вас избави от скорби? И ныне что Мне воздаете, злая за благая? За столп огненный, на Кресте Мя пригвоздисте: за облак, гроб Мне ископасте: за манну, желчь Мне принесосте: за воду, оцтом Мя напоисте. Прочее призову языки, и тии Мя прославят со Отцом и со Святым Духом.

Стих: Даша в снедь Мою желчь и в жажду Мою напоиша Мя оцта.

Днесь висит на древе, Иже на водах землю повесивый: венцем от терния облагается, Иже ангелов Царь: в ложную багряницу облачится, одеваяй небо облаки: заушение прият, Иже во Иордане свободивый Адама: гвоздьми пригвоздися Жених Церковный: копием прободеся Сын Девыя. Покланяемся Cтрастем Твоим, Христе. Покланяемся Страстем Твоим, Христе. Покланяемся Cтрастем Твоим, Христе. Покажи нам и славное Твое Воскресение.

Прокимен, глас 6. Рече безумен в сердце своем: несть Бог. Стих: Несть творяй благостыню:

Пророчества Иереминна чтение: Господи, скажи ми, и уразумею, тогда видех: Ищи в Четверток Великий на 1-м часе.

Братие, имуще дерзновение входити во святая Кровию Иисус Христовою, путем новым и живым, егоже обновил есть нам завесою, сиречь плотию Своею, и Иереа велика над домом Божиим. Да приступаем со истинным сердцем во извещении веры, окроплени сердцы от совести лукавыя, и измовени телесы водою чистою. Да держим исповедание упования неуклонное: верен бо есть Обещавый. И да разумеваем друг друга в поощрении любве и добрых дел. Не оставляюще собрания своего, якоже есть неким обычай, но (друг друга) подвизающе: и толика паче, елико видите приближающся день (судный). Волею бо согрешающим нам по приятии разума истины, ктому о гресех не обретается жертва. Страшно же некое чаяние суда, и огня ревность, поясти хотящаго сопротивныя. Отверглся кто закона Моисеова, без милосердия при двою или триех свидетелех умирает. Колико, мните, горшия сподобится муки, иже Сына Божия поправый, и Кровь заветную скверну возмнив, в нейже освятися, и Духа благодати укоривый. Вемы бо Рекшаго: Мне отмщение, Аз воздам, глаголет Господь. И паки: яко судит Господь людем Своим. Страшно есть еже впасти в руце Бога Живаго.

Евангелие от Иоанна, зачало 59, 60, 61: Во время оно ведоша Иисуса от Каиафы в претор: Конец: Воззрят Нань, Егоже прободоша. Таже предлагается чтение: Слово крестное. Таже Не предаждь нас до конца: Трисвятое. По Отче наш: Кондак Нас ради Распятаго: Господи, помилуй, 40. Молитва: Иже на всякое время: Господи, помилуй, трижды. Слава, и ныне: Честнейшую Херувим: Именем Господним благослови, отче. Иерей: Боже, ущедри ны: И молитва:

Владыко Господи Иисусе Христе Боже наш, долготерпевый о наших согрешениих, и даже до нынешняго часа приведый нас, в оньже на животворящем древе вися, благоразумному разбойнику, иже в рай путесотворил еси вход, и смертию смерть разрушил еси, очисти нас грешных и недостойных раб Твоих: согрешихом бо и беззаконновахом и несмы достойни возвести очеса наша и воззрети на высоту небесную, зане оставихом путь правды Твоея и ходихом в волях сердец наших. Но молим Твою безмерную благость, пощади нас, Господи, по множеству милости Твоея, и спаси нас имене Твоего ради святаго, яко исчезоша в суете дние наши. Изми нас из руки сопротивнаго, и остави нам грехи наша, и умертви плотское наше мудрование, да ветхаго отложивше человека в новаго облецемся, и Тебе поживем нашему Владыце и Благодетелю: и тако Твоим последующе повелением, в вечный покой достигнем, идеже есть всех веселящихся жилище. Ты бо еси воистинну истинное веселие, и радость любящих Тя, Христе Боже наш, и Тебе славу возсылаем, со Безначальным Твоим Отцем, и Пресвятым, и Благим, и Животворящим Твоим Духом, ныне и присно, и во веки веков, аминь.

Таже блаженны скоро: Во Царствии Твоем, егда приидеши: Слава, и ныне: Помяни нас, Господи: Лик небесный: Слава: Лик святых Ангел: И ныне: Верую во Единаго Бога: Ослаби, остави: Посем Отче наш: И кондак: Нас ради Распятаго: Господи, помилуй, 40. И молитва: Всесвятая Троице: Таже Буди имя Господне: трижды. Слава, и ныне: Благословлю Господа на всякое время: И отпуст.

Подобает же и сие ведати, яко прияхом в Палестине, в сей святый день Великаго Пятка, не творити Преждесвященную, ниже паки совершенную Литургию, но ниже трапезу поставляем, ниже ядим в сей день распятия. Аще же кто будет многонемощен, или престарелся, и не могий пребыти постен, дается ему хлеб и вода, по захождении солнца. Сице бо прияхом от святых заповедей святых апостол, не ясти в Великий Пяток. Господне бо слово, еже рече к фарисеем Господь: яко егда отымется от них Жених, тогда постятся в тыя дни. Зде блаженнейшии апостоли восприяша, и сие обрящеши во апостольских преданиих, внимательно сия проходя. Но и правильное послание святейшаго архиепископа Александрийскаго Дионисиа яве сие предпоставляет.

Вся тварь изменяшеся страхом, зрящи Тя на Кресте висима, Христе: солнце омрачашеся, и земли основания сотрясахуся, вся сострадаху Создавшему вся. Волею нас ради претерпевый Господи, слава Тебе. [Дважды.]

Людие злочестивии и беззаконнии вскую поучаются тщетным? Вскую Живота всех на смерть осудиша? Велие чудо, яко Создатель мира в руки беззаконных предается, и на древо возвышается Человеколюбец, да яже во аде узники свободит, зовущия: Долготерпеливе Господи, слава Тебе.

Днесь, зрящи Тя, Непорочная Дева, на Кресте Слово возвышаема, рыдающи матернею утробою, уязвляшеся сердцем горце, и стенящи болезненно из глубины души, лице со власы терзающи. Темже и перси биющи, взываше жалостно: увы Мне, Божественное Чадо! Увы Мне, Свете мира! Что зашел еси от очию Моею, Агнче Божий? Темже воинства безплотных, трепетом содержими бяху, глаголюще: Непостижиме Господи, слава Тебе.

На древе видящи висима, Христе, Тебе всех Зиждителя и Бога, безсеменно Рождшая Тя вопияше горько: Сыне Мой, где доброта зайде зрака Твоего? Не терплю зрети Тя неправедно распинаема. Потщися убо, востани, яко да вижу и Аз Твое из мертвых тридневное Воскресение.

Днесь Владыка твари предстоит Пилату, и Кресту предается Зиждитель всех, яко агнец приводимь Своею волею: гвоздьми пригвождается, и в ребра прободается, и губою напояется манну одождивый, по ланите заушается Избавитель мира, и от Своих раб поругается Создатель всех. О Владычняго Человеколюбия! О распинающих моляше Своего Отца, глаголя: Отче, остави им грех сей: не ведят бо беззаконнии, что неправедное содевают.

О како беззаконное сонмище Царя твари осуди на смерть, не устыдевся благодеяния, яже воспоминая предутверждаше, глаголя к ним: людие Мои, что сотворих вам? Не чудес ли исполних Иудею? Не мертвецы ли воскресих единем словом? Не всякую ли болезнь исцелих и недуг? Что убо Ми воздаете? Вскую не помните Мя? За исцеления раны Мне наложивше, за живот умерщвляюще, вешающе на древе, яко злодея, Благодетеля: яко беззаконна, Законодавца: яко осужденна, всех Царя. Долготерпеливе Господи, слава Тебе.

Страшное и преславное таинство днесь действуемо зрится: неосязаемый удержавается: вяжется, разрешаяй Адама от клятвы: испытуяй сердца и утробы, неправедно испытуется: в темнице затворяется, Иже бездну затворивый: Пилату предстоит, Емуже трепетом предстоят небесныя силы: заушается рукою создания Создатель: на древо осуждается, судяй живым и мертвым: во гробе заключается Разоритель ада. Иже вся терпяй милосердно и всех спасый от клятвы, Незлобиве Господи, слава Тебе.

Глагола Господь к Моисею лицем к лицу, якоже аще бы кто возглаголал к своему другу, и отпущашеся в полк: слуга же Иисус сын Навин юноша не исхождаше из скинии. И рече Моисей ко Господу: се Ты мне глаголеши, изведи люди сия. Ты же не явил ми еси, кого послеши со мною. Ты же мне рекл еси: вем тя паче всех, и благодать имаши у Мене. Аще убо обретох благодать пред Тобою, яви ми Тебе Самаго, да разумно вижду Тя: яко да обрет буду благодать пред Тобою, и да познаю, яко людие Твои язык велик сей. И глагола [ему Господь]: Аз Сам предыду пред Тобою, и упокою тя. И рече к Нему Моисей: аще Сам Ты не идеши с нами, да не изведеши мя отсюду. И како ведомо будет воистинну, яко обретох благодать у Тебе, аз же и людие Твои, точию идущу Ти с нами: и прославлен буду, аз же и людие Твои, паче всех язык, елицы суть на земли? Рече же Господь к Моисею: и сие тебе слово, еже рекл сей, сотворю: обрел бо сей благодать предо Мною, и вем тя паче всех. И глагола Моисей: покажи ми славу Твою. И рече [Господь к Моисею]: Аз предыду пред тобою славою Моею, и воззову о имени Моем, Господь пред тобою: и помилую, егоже аще милую: и ущедрю, егоже аще щедрю. И рече: не возможеши видети Лица Моего, не бо узрит человек Лице Мое, и жив будет. И рече Господь: се место у Мене, и станеши на камени. Егда же прейдет Слава Моя, и положу тя в разселине камене, и покрыю рукою Моею над тобою, дондеже мимоиду. И отыму руку Мою, и тогда узриши задняя Моя: Лице же Мое не явится Тебе.

Прокимен, глас 4: Суди, Господи, обидящия мя, побори борющия мя. Стих: Приими оружие и щит, и востани в помощь мою.

Господь благослови последняя Иовля, неже прежняя: бяху же скоти его, овец четыренадесять тысящ, велблюдов шесть тысящ, супруг волов тысяща, ослиц стадных тысяща. Родиша же ся ему сынове седмь, и дщери три. И нарече первую убо, День: вторую же Кассию: третию же, Амалфеев рог. И не обретошася подобни в лепоте дщерем Иовлевым в поднебесней: даде же им отец наследие в братии их. Поживе же Иов по язве лет сто седмьдесят: всех же лет поживе двести четыредесять осмь. И виде Иов сыны своя, и сыны сынов своих, даже до четвертого рода: и скончася Иов стар, и исполнь дней. Писано же есть паки, востати ему, с нимиже Господь возставит и: тако толкуется от сирския книги. В земли убо живый Авситидийстей, на пределех Идумеи и Аравии: прежде же бяше имя ему Иоав. Взем же жену аравляныню, роди сына, емуже имя Еннон. Бе же той отца убо Зарефа, Исавовых сынов сын, матере же Восорры, якоже быти ему пятому от Авраама.

Прокимен Апостола, глас 6: Положиша Мя в рове преисподнем, в темных и сени смертней. Стих: Господи Боже спасения Моего, во дни воззвах и в нощи пред Тобою.

Апостол к Коринфянам, зачало 125: Братие, слово крестное: Конец: И Сего распята. Аллилуиа, глас 1: Спаси Мя, Боже, яко внидоша воды до души Моея. Стих: Поношение чаяше душа моя и страсть. Стих: Да помрачатся очи их, еже не видети. Евангелие от Матфеа, зачало 110: Во время оно совет сотвориша вси архиерее: Конец: Прямо гроба. Таже обычная ектениа: Рцем вси от всея души: И потом: Сподоби, Господи: Исполним вечернюю молитву: И прочая. И по возгласе поем от стиховных стихир подобны 4.

Егда от древа Тя мертва, Аримафей снят всех Живота, смирною и плащаницею Тя, Христе, обвив, и любовию подвизашеся, сердцем и устнами Тело нетленное Твое облобызати. Обаче одержимь страхом, радуяся, вопияше Ти: слава снизхождению Твоему, Человеколюбче.

Стих: Господь воцарися, в лепоту облечеся.

Егда во гробе нове за всех положился еси, Избавителю всех, ад всесмехливый, видев Тя, ужасеся, вереи сокрушишася, сломишася врата, гроби отверзошася, мертвии восташа, тогда Адам, благодарственно радуяся, вопияше Тебе: слава снизхождению Твоему, Человеколюбче.

Стих: Ибо утверди вселенную, яже не подвижится.

Егда во гробе плотски хотя заключился еси, Иже естеством Божества пребываяй Неописанный и Неопределенный, смерти заключил еси сокровища и адова вся истощил еси, Христе, царствия: тогда и субботу сию Божественнаго благословения и славы, и Твоея светлости сподобил еси.

Стих: Дому Твоему подобает святыня, Господи, в долготу дний.

Егда силы зряху Тя, Христе, яко прелестника от беззаконных оклеветаема, ужасахуся неизглаголанному долготерпению Твоему, и камень гроба руками запечатанный, имиже Твоя нетленная ребра прободоша. Обаче нашему спасению радующеся вопияху Ти: слава снизхождению Твоему, Человеколюбче.

Тебе одеющагося светом, яко ризою, снем Иосиф с древа с Никодимом и, видев мертва нага непогребена, благосердный плач восприим, рыдая, глаголаше: увы мне, Сладчайший Иисусе! Егоже вмале солнце на Кресте висима узревшее мраком облагашеся, и земля страхом колебашеся, и раздирашеся церковная завеса: но се ныне вижу Тя, мене ради волею подъемша смерть. Како погребу Тя, Боже мой, или какою плащаницею обвию? Коима ли рукама прикоснуся нетленному Твоему Телу? Или кия песни воспою Твоему исходу, Щедре? Величаю Страсти Твоя, песнословлю и погребение Твое со Воскресением, зовый: Господи, слава Тебе.

Таже Ныне отпущаеши: Трисвятое. По Отче наш:

Благообразный Иосиф с древа снем Пречистое Тело Твое, плащаницею чистою обвив и вонями, во гробе нове покрыв положи.

Мироносицам женам при гробе представ Ангел, вопияше: мира мертвым суть прилична. Христос же нетления явися чуждь.

Премудрость, и отпуст.

Повечерие же поем в келлиах, на немже поем канон о распятии Господни и на плач Пресвятыя Богородицы. Ирмос по дважды, тропари на 4: последи же ирмос оба лика вкупе. Творение Симеона Логофета. Глас 6.

Ирмос: Яко по суху пешешествовав Израиль по бездне стопами, гонителя фараона видя потопляема. Богу победную песнь поим, вопияше.

Запев: Слава Тебе, Боже наш, слава Тебе.

Обешена яко виде на Кресте, Сына и Господа, Девая Чистая, терзающися, вопияше горце, со другими женами, стенящи, глаголаше.

Вижу Тя ныне, возлюбленное Мое Чадо и любимое, на Кресте висяща, и уязвляюся горце сердцем, рече Чистая: но даждь слово, Благий, Рабе Твоей.

Слава: Волею, Сыне Мой и Творче, терпиши на древе лютую смерть, Дева глаголаше, предстоящи у Креста со возлюбленным учеником.

И ныне: Ныне Моего чаяния, радости и веселия, Сына Моего и Господа лишена бых: увы Мне, болезную сердцем, Чистая, плачущи, глаголаше.

Ирмос: Несть свят якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Страха ради иудейска Петр скрыся, и вси отбегоша вернии, оставльше Христа, Дева, рыдающи, глаголаше.

О страшном Твоем рождестве и странном, Сыне Мой, паче всех матерей возвеличена бых Аз: но увы Мне, ныне Тя видящи на древе, распалаюся утробою.

Слава: Вижу утробу Мою на руках, в нихже Младенца держах, с древа прияти, вещаше Чистая: но никтоже, увы Мне, Сего даде.

И ныне: Се Свет Мой, сладкий, Надежда и Живот Мой Благий, Бог Мой угасе на Кресте, распалаюся утробою, Дева, стенющи, глаголаше.

Ирмос: Христос моя сила, Бог и Господь, честная Церковь боголепно поет взывающи, от смысла чиста о Господе празднующи.

Солнце не заходяй, Боже Превечный и Творче всех тварей Господи, како терпиши страсть на Кресте? Чистая, плачущи, глаголаше.

Плачущи, глаголаше Браконеискусная ко благообразному: потщися, Иосифе, к Пилату приступити и испроси сняти со древа Учителя Твоего.

Слава: Видев Пречистую горце слезящу, Иосиф смутися и, плачася, приступи к Пилату: даждь ми, вопия с плачем, Тело Бога моего.

И ныне: Уязвена Тя видящи, и без славы, нага на древе, Чадо Мое, утробою распалаюся, рыдающи яко Мати, Дева провещаваше.

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, Истиннаго Бога, от мрака греховнаго взывающа.

Растерзаяся и рыдая, и дивяся вкупе с Никодимом, снят Иосиф, и уцеловав Пречистое Тело, рыдаше и стеняше, и поя Его яко Бога.

Приимши Его с плачем Мати неискусомужная, положи на колену, молящи Его со слезами и облобызающи, горце же рыдающи и восклицающи.

Слава: Едину Надежду и Живот, Владыко, Сыне Мой и Боже, во очию свет Раба Твоя имех, ныне же лишена бых Тебе, сладкое Мое Чадо и любимое.

И ныне: Болезни и скорби, и воздыхания обретоша Мя, увы Мне, Чистая, горце рыдающи, глаголаше, видящи Тя, Чадо Мое возлюбленное, нага и уединена, и вонями помазана мертвеца.

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Мертва Тя зрю, Человеколюбче, оживившаго мертвыя, и содержаща вся, уязвляюся люто утробою. Хотела бых с Тобою умрети, Пречистая глаголаше: не терплю бо без дыхания мертва Тя видети.

Дивлюся, зрящи Тя, Преблагий Боже и Прещедрый Господи, без славы, и без дыхания, и безобразна: и плачуся, держащи Тя, яко не надеяхся, увы Мне, видети Тя, Сыне Мой и Боже.

Слава: Не изглаголеши ли Рабе Твоей слова, Слове Божий? Не ущедриши ли, Владыко, Тебе Рождшую? Глаголаше Чистая, рыдающи и плачущи, облобызающи Тело Господа Своего.

И ныне: Помышляю, Владыко, яко ктому сладкаго Твоего не услышу гласа, ни доброты Лица Твоего узрю, якоже прежде Раба Твоя: ибо зашел еси, Сыне Мой, от очию Моею.

Нас ради Распятаго, приидите, вси воспоим, Того бо виде Мариа на древе и глаголаше: аще и распятие терпиши, Ты еси Сын и Бог Мой.

Икос: Своего Агнца Агница зрящи к заколению влекома, последоваше Мариа простертыми власы со инеми женами, сия вопиющи: камо идеши, Чадо? Чесо ради скорое течение совершаеши? Еда другий брак паки есть в Кане, и тамо ныне тщишися, да от воды им вино сотвориши? Иду ли с Тобою, Чадо, или паче пожду Тебе? Даждь Ми слово, Слове, не молча мимо иди Мене, Чисту соблюдый Мя: Ты бо еси Сын и Бог Мой.

Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.

Где, Сыне Мой и Боже, благовещение древнее, еже Ми Гавриил глаголаше? Царя Тя, Сына и Бога Вышняго нарицаше: ныне же вижу Тя, Свете Мой сладкий, нага и уязвлена мертвеца.

Избавляяй болезни, ныне приими Мя с Собою, Сыне Мой и Боже, да сниду, Владыко, во ад с Тобою и Аз: не остави Мене едину, уже бо жити не терплю, не видящи Тебе сладкаго Моего Света.

Слава: С другими женами мироносицами, рыдающи Непорочная горце, износима видящи Христа, глаголаше: увы Мне, что вижу! Камо идеши ныне, Сыне Мой, а Мене едину оставляеши?

И ныне: Изнемогающи и рыдающи Непорочная, мироносицам глаголаше: срыдайте Ми и сплачитеся горце: се бо Свет Мой сладкий и Учитель ваш гробу предается.

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

Деву рыдающу Иосиф видев, растерзашеся весь и вопияше горько: како Тя, о Боже мой, ныне погребу раб Твой? Какими плащаницами обвию Тело Твое?

Паче ума превзыде странное Твое видение, носящаго тварь всю Господа: сего ради Иосиф яко мертва Тя на руку своею и с Никодимом носит и погребает.

Слава: Странную вижу и преславную тайну, Дева вопияше Сыну и Господу: како в худом гробе полагаешися, мертвыя повелением возставляяй во гробех?

И ныне: Ни от гроба Твоего востану, Чадо Мое, ни слезы точащи престану Раба Твоя, дондеже и Аз сниду во ад: не могу бо терпети разлучения Твоего, Сыне Мой.

Ирмос: Бога человеком не возможно видети, на Негоже не смеют чини Ангельстии взирати: Тобою бо, Всечистая, явися человеком Слово воплощенно: Егоже величающе, с небесными вои Тя ублажаем.

Радость Мне николиже отселе прикоснется, рыдающи, глаголаше Непорочная: Свет Мой и Радость Моя во гроб зайде: но не оставлю Его единаго, зде же умру и спогребуся Ему.

Душевную Мою язву ныне исцели, Чадо Мое, Пречистая вопияше слезящи: воскресни и утоли Мою болезнь и печаль, можеши бо, Владыко, елико хощеши и твориши, аще и погреблся еси волею.

Слава: О како утаилася Тебе есть бездна щедрот, Матери в тайне изрече Господь? Тварь бо Мою хотя спасти, изволих умрети, но и воскресну и Тебе возвеличу, яко Бог небесе и земли.

И ныне: Воспою милосердие Твое, Человеколюбче, и покланяюся богатству милости Твоея, Владыко: создание бо Твое хотя спасти, смерть подъял еси, рече Пречистая: но Воскресением Твоим, Спасе, помилуй всех нас.

Таже за Достойно: ирмос: Бога человеком не возможно видети: Трисвятое. По Отче наш: Кондак: Нас ради Распятаго: Господи, помилуй, 40. Иже на всякое время: Господи, помилуй, трижды. Слава, и ныне: Честнейшую Херувим: Именем Господним благослови, отче. Иерей: Молитвами святых отец наших: И молитва: Нескверная, Неблазная: И отпуст. Полунощницу же поем в келлиах.

Адрес страницы: http://days.pravoslavie.ru/rubrics/canon409.htm

Великий Пяток. Песнопения Триоди Постной.

Великий Пяток.
Песнопения Триоди Постной.