В четверток вечера,

на Господи воззвах: стихиры подобны праздника, 3: и Минеи 3.

Праздника, глас 5.
Подобен: Радуйся:

Явися светоявленное и красное, Спасова Воскресения днесь преполовение всесвятое, яко полудне светлое, уясняющее мир Божественными благодатьми Христова востания, осиявающее чудеса нетления, облиставает знамения, и показует на высоту Вознесение, являет многорачительное Духа пришествие, Пятьдесятницы всечестныя светлейшее торжество. Темже и подает душам нашим мир и велию милость.

Яко Божественныя славы река, празднику ныне преполовившуся, Господь струи благоутробия всем подавая, вопиет: жаждай да грядет ко Мне, и пиет тепле. Источник бо сострадания, и милости пучина Сам сый, источает мирови оставление, омывает прегрешения, и очищает недуги: спасает Воскресение Его празднующих, покрывает любовию почитающих еже со славою Вознесение Его, и подает душам нашим мир и велию милость.

Посреде святилища став, неописанный Бог же и Господь: Бог бо бяше естеством, аще и нас ради вочеловечився, описан явися телом, всем источаше животочныя глаголы, всем глаголя: души очистите, и зноя страстей охладите, да не како лишатся пития человецы. Божественную бо благодать дарую, безсмертнаго и лучшаго и вышняго Царствия, сопричаститися Мне Создателю, и прославитися.

Слава, и ныне: глас 6.

Празднику преполовляющуся Твоего Христе Воскресения, и Божественнаго пришествия Святаго Твоего Духа, сшедшеся чудес Твоих воспеваем таинства: воньже низпосли нам велию милость.

На стиховне стихиры Осмогласника, глас 3:

Древо преслушания мирови смерть возрасти, древо же Креста живот и нетление. Темже Тебе покланяемся распеншемуся Господу, да знаменается на нас свет лица Твоего Господи.

Стих: К Тебе возведох очи мои:

Твоим Крестом Христе Спасе, смерти держава разрушися, и диаволя прелесть упразднися: род же человеческий верою спасаемый, песнь Тебе всегда приносит.

Стих: Помилуй нас Господи, помилуй нас:

Мученичен: Велия Креста Твоего Господи сила: водрузи бо ся на месте, и действует в мире, и показа от рыбарей апостолы, и от язык мученики, да молятся о душах наших.

Слава, и ныне: глас 8. Иоанна монаха:

Преполовившуся празднику, прежде страсти и славнаго Воскресения Твоего Господи, был еси уча Блаже во святилищи непокоривыя иудеи, и фарисеи, и книжники, и вопия к ним: жаждай да грядет ко Мне и пиет, веруяй в Мя, воды жизни, Духа Божественнаго реки потекут от чрева его. О неизреченныя премудрости Твоего хваления! Иже вся исполняяй Боже наш, слава Тебе.

 

В пяток преполовения на Утрени,

по 1-м стихословии, глаголем настоящия седальны, глас 3.
Подобен: Красоте девства:

Крест и смерть пострадати изволивый, среди твари сей водрузил еси: егда благоволил еси Спасе, тело Твое пригвоздити, тогда и солнце лучи скры. Сия и разбойник зря, на Кресте Тя воспе: помяни мя, вопия, Спасе, и веровав прият рай.

Стих: Возносите Господа Бога нашего:

Непостижимое распятия, и несказанное востания богословим вернии таинство неизреченное: днесь бо смерть и ад упразднися, род же человеческий в нетление облечеся. Темже благодаряще вопием Ти: слава Христе востанию Твоему.

Стих: Дивен Бог во святых Своих, Бог Израилев.

Мученичен: Благодушное терпения вашего, победи козни злоначальнаго врага, страстотерпцы всехвальнии. Сего ради вечнаго сподобистеся блаженства: но молитеся Господеви, христолюбивых людей спасти стадо, мученицы суще истины.

Слава, и ныне, Крестобогородичен:

Жезл силы стяжавшии Крест Сына Твоего, Богородице, тем низлагаем врагов шатания, любовию Тя непрестанно величающе.

По 2-м стихословии седален, глас 8.
Подобен: Премудрости слова:

Премудрости воду и жизни источая мирови, всех Спасе призываеши, почерпсти спасения воды. Божественный бо закон Твой приим человек, в себе угашает прелести углие. Отонудуже во веки не вжаждет, ни престанет насыщения Твоего, Владыко Царю Пренебесный. Сего ради славим державу Твою Христе Боже, прегрешений оставление просяще, послати богатно рабом Твоим. [Дважды.]

Воскресение Христово: псалом 50. Канон праздника, со ирмосы на 8, и Минеи на 4. Кондак и ексапостиларий, праздника.

На хвалитех стихиры Осмогласника, повторяюще 1-ю, глас 3:

Завистию сладости изгнан бых, падением падый лютым: но не презрел еси Владыко, восприим мене ради еже по мне распятие, и спасаеши мя, в славу вводиши мя, Избавителю мой, слава Тебе.

Приидите вси языцы, уразумейте страшныя тайны силу: Христос бо Спас наш, еже в начале Слово, распятся нас ради, и волею погребеся, и воскресе из мертвых, еже спасти всяческая: Тому поклонимся.

Мученичен:

Святых страстотерпцев память, приидите людие вси почтим, яко позор бывше ангелом и человеком, победы венец от Христа прияша, и молятся о душах наших.

Слава, и ныне: глас 8:

Преполовившуся празднику Пасхи, в храм вшел еси святилищный Спасе наш, и став посреде народа, учил еси тех со дерзновением, и глаголал еси: Аз есмь свет мира, в след Мене идый не имать ходити во тме, но имети будет свет безсмертныя жизни.

На стиховне стихиры, глас 2.
Подобен: Доме Евфрафов:

Весь с Богом Слове Ты сый, погибающа мя хотя изъяти прегрешений, соединяешися мне Человеколюбче.

Стих: Помяни сонм Твой:

Преста сень: се бо Мессиа посреде праздника, благодать якоже другую денницу облиста.

Стих: Бог же Царь наш прежде века:

Приидите благопокориво, животныя воды пити возжелевшии, вопияше Спас мой, и пийте благодать, божественно веселящеся.

Слава, и ныне: глас 6:

Очистим помышлений сокровища, и душевная сияния уясним, и Жизнь узрим Христа во святилище пришедша премножеством благости, да врага победит, и спасет род наш, страстию Креста и Воскресения. К Немуже возопиим: непостижиме Господи, слава Тебе.

 

На Литургии

Апостол Деяний, зачало 27. [Деян. 10, 44 – 11, 10.]

Еще же глаголющу Петру глаголы сия, нападе Дух Святый на вся слышащия слово.	Когда Петр еще продолжал эту речь, Дух Святый сошел на всех, слушавших слово.
И ужасошася иже от обрезания вернии, елицы приидоша с Петром, яко и на языки дар Святаго Духа излияся:	И верующие из обрезанных, пришедшие с Петром, изумились, что дар Святаго Духа излился и на язычников,
Слышаху бо их глаголющих языки и величающих Бога. Тогда отвеща Петр:	Ибо слышали их говорящих языками и величающих Бога. Тогда Петр сказал:
Еда воду возбранити может кто, еже не креститися сим, иже Дух Святый прияша, якоже и мы?	Кто может запретить креститься водою тем, которые, как и мы, получили Святаго Духа?
Повеле же им креститися во имя Иисус Христово. Тогда молиша его пребыти у них дни некия.	И велел им креститься во имя Иисуса Христа. Потом они просили его пробыть у них несколько дней.
Слышаша же апостоли и братия сущии во Иудеи, яко и языцы прияша слово Божие.	Услышали апостолы и братия, бывшие в Иудее, что и язычники приняли слово Божие.
И егда взыде Петр во Иерусалим, препирахуся с ним иже от обрезания,	И когда Петр пришел в Иерусалим, обрезанные упрекали его,
Глаголюще, яко к мужем обрезания не имущим вшел еси и ял еси с ними.	Говоря: ты ходил к людям необрезанным и ел с ними.
Начен же Петр, сказоваше им поряду, глаголя:	Петр же начал пересказывать им по порядку, говоря:
Аз бех во граде Иоппийстем моляся и видех во ужасе видение, сходящ сосуд некий, яко плащаницу велию, от четырех краев низпущаему с небесе, и прииде даже до мене:	В городе Иоппии я молился, и в исступлении видел видение: сходил некоторый сосуд, как бы большое полотно, за четыре угла спускаемое с неба, и спустилось ко мне.
В нюже воззрев смотрях, и видех четвероногая земная и звери и гады и птицы небесныя.	Я посмотрел в него и, рассматривая, увидел четвероногих земных, зверей, пресмыкающихся и птиц небесных.
Слышах же глас глаголющ мне: востав, Петре, заколи и яждь.	И услышал я голос, говорящий мне: встань, Петр, заколи и ешь.
Рех же: никакоже, Господи, яко всяко скверно или нечисто николиже вниде во уста моя.	Я же сказал: нет, Господи, ничего скверного или нечистого никогда не входило в уста мои.
Отвеща же ми глас вторицею с небесе глаголющ: яже Бог очистил есть, ты не скверни.	И отвечал мне голос вторично с неба: что Бог очистил, того ты не почитай нечистым.
Сие же бысть трижды: и паки взяшася вся на небо.	Это было трижды, и опять поднялось всё на небо.

Евангелие Иоанна, зачало 30. [Ин. 8, 21 – 30.]

Рече Господь пришедшим к Нему иудеом: Аз иду, и взыщете Мене, и во гресе вашем умрете: аможе Аз иду, вы не можете приити.	Сказал Господь пришедшим к Нему иудеям: Я отхожу, и будете искать Меня, и умрете во грехе вашем. Куда Я иду, туда вы не можете прийти.
Глаголаху убо иудее: еда Ся Сам убиет, яко глаголет: аможе Аз иду, вы не можете приити?	Тут иудеи говорили: неужели Он убьет Сам Себя, что говорит: "куда Я иду, вы не можете прийти"?
И рече им: вы от нижних есте, Аз от вышних есмь: вы от мира сего есте, Аз несмь от мира сего:	Он сказал им: вы от нижних, Я от вышних; вы от мира сего, Я не от сего мира.
Рех убо вам, яко умрете во гресех ваших: аще бо не имете веры, яко Аз есмь, умрете во гресех ваших.	Потому Я и сказал вам, что вы умрете во грехах ваших; ибо если не уверуете, что это Я, то умрете во грехах ваших.
Глаголаху убо Ему: Ты кто еси? И рече им Иисус: Начаток, яко и глаголю вам:	Тогда сказали Ему: кто же Ты? Иисус сказал им: от начала Сущий, как и говорю вам.
Многа имам о вас глаголати и судити: но Пославый Мя истинен есть, и Аз яже слышах от Него, сия глаголю в мире.	Много имею говорить и судить о вас; но Пославший Меня есть истинен, и что Я слышал от Него, то и говорю миру.
Не разумеша (убо), яко Отца им глаголаше.	Не поняли, что Он говорил им об Отце.
Рече же им Иисус: егда вознесете Сына Человеческаго, тогда уразумеете, яко Аз есмь, и о Себе ничесоже творю, но, якоже научи Мя Отец Мой, сия глаголю:	Итак Иисус сказал им: когда вознесете Сына Человеческого, тогда узнаете, что это Я и что ничего не делаю от Себя, но как научил Меня Отец Мой, так и говорю.
И Пославый Мя со Мною есть: не остави Мене единаго Отец, яко Аз угодная Ему всегда творю.	Пославший Меня есть со Мною; Отец не оставил Меня одного, ибо Я всегда делаю то, что Ему угодно.
Сия Ему глаголющу, мнози вероваша в Него.	Когда Он говорил это, многие уверовали в Него.