В пяток 4-я седмицы по Пасце, вечера, обычная кафисма.

На Господи воззвах, стихиры праздника 3. Глас 1.
Подобен: Небесных чинов:

Творец всех и жизни Податель, Отцу Божественному соприсносущное Слово, волею от Девы плоть приим, быв Человек, неизреченныя премудрости, яко Благ всем источи учения.

Празднику преполовившуся иудейскому Христе, во святилищи предстал еси, закону Владыка, уча властию, и книжники обличая, якоже писано есть, и устрашая премудростию словес Твоих, и чудес показаньми.

Податель премудрости, и добрых излиятель, изливаяй Божественныя струи от источника приснотекущаго, приидите ко Мне, зовет, воду жизни жаждущии почерпите, и реки из чрева вашего, глаголет, дарований Божественных потекут.

И Минеи 3. Слава: глас 1. Иоанна монаха:

Пятдесятницы наста дней преполовение, в немже Христос обнажив маловидно Божественную силу, разслабленнаго стягну словом, того от одра возставив, и боголепно чудотворя в зданном теле, человеком дарова вечный живот, и велию милость.

И ныне: Богородичен, глас 3:

Како не дивимся Богомужному Рождеству Твоему, Пречестная? Искушения бо мужескаго не приемши Всенепорочная, родила еси без отца Сына плотию прежде век от Отца рожденнаго без матере, никакоже претерпевшаго изменения, или смешения, или разделения, но обою существу свойство цело сохраншаго. Темже Мати Дево Владычице, Того моли спастися душам, православно Богородицу исповедающих Тя.

На стиховне стихиры Осмогласника. глас 3:

Твоим Крестом Христе Спасе, смерти держава разрушися, и диаволя прелесть упразднися: род же человеческий верою спасаемый, песнь Тебе всегда приносит.

Стих: Господь воцарися, в лепоту облечеся.

Просветишася всяческая, Воскресением Твоим Господи, и рай паки отверзеся, вся же тварь восхваляющи Тя, песнь Тебе всегда приносит.

Стих: Ибо утверди вселенную:

Славлю Отца и Сына силу, и Духа Святаго пою власть, нераздельное, несозданное Божество, Троицу Единосущную, царствующую в век века.

Стих: Дому Твоему подобает святыня:

Страстию Твоею Христе, омрачивый солнце, и светом Твоего Воскресения, просветивый всяческая, приими нашу вечернюю песнь Человеколюбче.

Слава, и ныне: глас 1:

Во святилище пришел еси Премудросте Божия, преполовляющуся празднику, уча и обличая непокоривыя иудеи, фарисеи и книжники, и вопия со дерзновением к ним: жаждай да грядет ко Мне, и пиет воду животную. И не вжаждет в век. Веруяй Моей благости, реки потекут из чрева его жизни вечныя. О благости и благоутробия Твоего Христе Боже наш, слава Тебе.

Тропарь праздника. И отпуст.

В субботу 4-я седмицы по Пасце, на Утрени.

По 1-м стихословии седальны воскресны, глас 3:

Христос от мертвых воста, начаток усопших, перворожден твари, и Содетель всех бывших, истлевшее естество рода нашего в Себе Самом обнови: не ктому смерте обладаеши, ибо всех Владыка державу твою разруши.

Стих: Воскресни Господи Боже мой:

Плотию смерти вкусивый Господи, горесть смерти пресекл еси востанием Твоим, и человека на ню укрепивый, первыя клятвы одоление призывая: защитниче жизни нашея, Христе Боже, слава Тебе.

Слава, и ныне: Богородичен:

Тя ходатайствовавшую спасение рода нашего воспеваем Богородице Дево: плотию бо от Тебе восприятою Сын Твой, и Бог наш, Крестом восприим страсть, избави нас от тли, яко Человеколюбец.

По 2-м стихословии, седален глас 8.
Подобен: Премудрости:

Празднику преполовившуся законному, был еси уча Спасе мой во святилищи, и обличая безумие неверных евреев, и вопия к народом Божественным гласом, яко Человеколюбец: жаждай, взывал еси, да грядет ко Мне и пиет. Темже обещал еси верующим подати веселия воды от источника нетленнаго. Сего ради вопием Ти: низпосли Христе Боже Духа Твоего Святаго, и спаси нас, яко един еси Многомилостивый. [Дважды.]

Воскресение Христово: псалом 50. Каноны праздника, со ирмосы на 6, и святаго обители на 4, и Минеи на 4. Кондак, и ексапостиларий праздника.

На хвалитех поставим стихи 4, и поем стихиры воскресны, глас 3:

Приидите вси языцы, уразумейте страшныя тайны силу: Христос бо Спас наш, еже в начале Слово, распятся нас ради, и волею погребеся, и воскресе из мертвых, еже спасти всяческая, Тому поклонимся.

Поведаша вся чудеса стражие Твои Господи: но собор суеты исполни мздою десницу их, скрыти мняше Воскресение Твое, еже мир славит: помилуй нас.

Радости вся исполнишася, Воскресения искус приимша. Мариа бо Магдалина ко гробу прииде, и обрете ангела на камени седяща, ризами блистающася, и глаголюща: что ищете Живаго с мертвыми? Несть зде, но воста, якоже рече, предваряя вы в Галилеи.

Во свете Твоем Владыко, узрим свет Человеколюбче: воскресл бо еси из мертвых, спасение роду человеческому даруяй, да Тя вся тварь славословит единаго безгрешнаго: помилуй нас.

Слава, и ныне: глас 4. Анатолиа:

Просветившеся братие Воскресением Спаса Христа, и достигше преполовения праздника Владычня, приискренно сохраним заповеди Божия, да достойни будем и Вознесение праздновати, и пришествие получити Святаго Духа.

На стиховне стихиры подобны, глас 2:
Подобен: Доме Евфрафов:

Текущий источник Твоея премудрости, воду духовную источает, юже пиюще, догмат Божественных исполняемся.

Стих: Помяни сонм Твой:

Уязвляшеся лютый еврейский род воистинну, слыша Тя Слове, научающа народы спасительным учением.

Стих: Бог же Царь наш, прежде века:

Пришел еси Содетелю на Сион, и стал еси посреде людей Твоих, и людем дал еси благодать спасительную.

Слава, и ныне: глас 4:

Господи, прежде честнаго Твоего Креста, празднику преполовившуся, во святилище вшел еси, иудеи со дерзновением уча, Моисеем и в законе Тобою законоположенным. Ужасающеся же Христе Твоея премудрости неизреченному таинству, еже на Тя роптанию в себе завистию поучахуся. Како Сей весть писмена не учився? Не ведяще Тебе Спаса душ наших.

На Литургии

блаженна, песнь 5. И прокимен праздника.

Апостол Деяний, зачало 29. [Деян. 12, 1 – 11.]

Возложи Ирод царь руце озлобити некия иже от церкве,	Царь Ирод поднял руки на некоторых из принадлежащих к церкви, чтобы сделать им зло,
Уби же Иакова, брата Иоаннова, мечем:	И убил Иакова, брата Иоаннова, мечом.
И видев, яко годе есть иудеем, приложи яти и Петра: бяху же дние опресночнии:	Видя же, что это приятно иудеям, вслед за тем взял и Петра, — тогда были дни опресноков, —
Егоже и емь всади в темницу, предав четырем четверицам воинов стрещи его, хотя по Пасце извести его к людем.	И, задержав его, посадил в темницу, и приказал четырем четверицам воинов стеречь его, намереваясь после Пасхи вывести его к народу.
И убо Петра стрежаху в темнице: молитва же бе прилежна бываемая от церкве к Богу о нем.	Итак Петра стерегли в темнице, между тем церковь прилежно молилась о нем Богу.
Егда же хотяше его извести Ирод, в нощи той бе Петр спя между двема воинома, связан (железнома) ужема двема, стражие же пред дверьми стрежаху темницы.	Когда же Ирод хотел вывести его, в ту ночь Петр спал между двумя воинами, скованный двумя цепями, и стражи у дверей стерегли темницу.
И се, ангел Господень предста, и свет возсия в храмине: толкнув же в ребра Петра, воздвиже его, глаголя: востани вскоре. И спадоша ему ужа (железная) с руку.	И вот, ангел Господень предстал, и свет осиял темницу. Ангел, толкнув Петра в бок, пробудил его и сказал: встань скорее. И цепи упали с рук его.
Рече же ангел к нему: препояшися и вступи в плесницы твоя. Сотвори же тако. И глагола ему: облецыся в ризу твою и последствуй ми.	И сказал ему ангел: опояшься и обуйся. Он сделал так. Потом говорит ему: надень одежду твою и иди за мною.
И изшед вслед его идяше и не ведаше, яко истина есть бывшее от ангела, мняше же видение зрети.	Петр вышел и следовал за ним, не зная, что делаемое ангелом было действительно, а думая, что видит видение.
Прошедша же первую стражу и вторую, приидоста ко вратом железным, вводящим во град, яже о себе отверзошася има: и изшедша преидоста стогну едину, и абие отступи ангел от него.	Пройдя первую и вторую стражу, они пришли к железным воротам, ведущим в город, которые сами собою отворились им: они вышли, и прошли одну улицу, и вдруг ангела не стало с ним.
И Петр быв в себе, рече: ныне вем воистинну, яко посла Бог ангела Своего и изъят мя из руки Иродовы и от всего чаяния людий Иудейских.	Тогда Петр, придя в себя, сказал: теперь я вижу воистину, что Господь послал ангела Своего и избавил меня из руки Ирода и от всего, чего ждал народ Иудейский.

Аллилуиа, праздника.

Евангелие Иоанна, зачало 31. [Ин. 8, 31 – 42.]

Рече Господь к веровавшим Ему иудеом: аще вы пребудете во словеси Моем, воистинну ученицы Мои будете:	Сказал Господь к уверовавшим в Него иудеям: если пребудете в слове Моем, то вы истинно Мои ученики,
И уразумеете истину, и истина свободит вы.	И познаете истину, и истина сделает вас свободными.
Отвещаша (и реша) Ему: семя Авраамле есмы, и никомуже работахом николиже: како Ты глаголеши, яко свободни будете?	Ему отвечали: мы семя Авраамово и не были рабами никому никогда; как же Ты говоришь: сделаетесь свободными?
Отвеща им Иисус: аминь, аминь глаголю вам, яко всяк творяй грех раб есть греха:	Иисус отвечал им: истинно, истинно говорю вам: всякий, делающий грех, есть раб греха.
Раб же не пребывает в дому во век: сын пребывает во век:	Но раб не пребывает в доме вечно; сын пребывает вечно.
Аще убо Сын вы свободит, воистинну свободни будете:	Итак, если Сын освободит вас, то истинно свободны будете.
Вем, яко семя Авраамле есте: но ищете Мене убити, яко слово Мое не вмещается в вы:	Знаю, что вы семя Авраамово; однако ищете убить Меня, потому что слово Мое не вмещается в вас.
Аз, еже видех у Отца Моего, глаголю: и вы убо, еже видесте у отца вашего, творите.	Я говорю то, что видел у Отца Моего; а вы делаете то, что видели у отца вашего.
Отвещаша и реша Ему: отец наш Авраам есть. Глагола им Иисус: аще чада Авраамля бысте были, дела Авраамля бысте творили:	Сказали Ему в ответ: отец наш есть Авраам. Иисус сказал им: если бы вы были дети Авраама, то дела Авраамовы делали бы.
Ныне же ищете Мене убити, Человека, Иже истину вам глаголах, юже слышах от Бога: сего Авраам несть сотворил:	А теперь ищете убить Меня, Человека, сказавшего вам истину, которую слышал от Бога: Авраам этого не делал.
Вы творите дела отца вашего. Реша же Ему: мы от любодеяния несмы рождени: единаго Отца имамы, Бога.	Вы делаете дела отца вашего. На это сказали Ему: мы не от любодеяния рождены; одного Отца имеем, Бога.
Рече же им Иисус: аще Бог Отец ваш (бы) был, любили бысте (убо) Мене: Аз бо от Бога изыдох и приидох: не о Себе бо приидох, но Той Мя посла.	Иисус сказал им: если бы Бог был Отец ваш, то вы любили бы Меня, потому что Я от Бога исшел и пришел; ибо Я не Сам от Себя пришел, но Он послал Меня.

Причастный праздника.