Иже земных, чести и славы отвергшеся,/ доблии и честнии страдальцы,/ веры ради крепко и мужественно муки претерпесте,/ на смерть себе вдавше за Живот всех — Владыку./ Темже и Христос преславно столпом облачным/ с Небесе вас озари/ и почестьми и венцы от Престола славы венча./ Со Ангелы Тому предстояще,/ молите спастися душам нашим.

От корене неплодна, преблаженнии,/ возрастивше Православный веры ветви,/ первомучеником тезоименитии явистеся:/ злаго бо и нечестиваго князя ярости не убоястеся,/ повелевающа Христа отрещися./ Сего ради мученическия венцы приемше/ и со Ангелы Престолу Владычню предстояще,/ о нас молитеся, преблаженнии,/ православно чтущих святую память вашу.

Отеческую прелесть оставльше, святии,/ приведостеся Христови,/ всем души усердием стаете мужемудренно до смерти./ Темже и взясте победы почесть воистинну,/ о всех Владыку нашего непрестанно моляще.

Истинных повелений устне распространил еси, / зловерие низложил еси, Богомудре Мартине, / святителю всечестне, / поминай нас, угодниче Христов, / еже к Нему ходатайствы твоими, / да в мире устроиши живот наш.