Мученик Твой, Господи, Емилиан/ во страдании своем венец прият нетленный от Тебе, Бога нашего,/ имеяй бо крепость Твою,/ мучителей низложи,/ сокруши и демонов немощныя дерзости./ Того молитвами// спаси души наша.

Божественною ревностию распалаем,/ огня сослужащаго не устрашился еси,/ но возшед небоязненно волею,/ возгнещающим огнем всесожжегся,/ и Владыце, яко жертва, принеслся еси,/ мучениче славне Емилиане,/ Христа Бога моли// даровати нам велию милость.

Терпения столп воистину непоколебимый/ и забрало от вражиих стреляний необоримо,/ равноангельне и многострадальне отче наш Иоанне,/ имуще тя, мы, недостойнии, молимся,/ припадающе к честным твоим мощем тепле:/ избави нас душетленных страстей плотских и спаси твоими молитвами.

Столп целомудрия, вражиими бореньми непобедимь сый,/ аки столп, многострадальное водруженно оставил еси нам тело твое,/ всечестне Иоанне,/ емуже в немощех душевных и телесных покланяющеся,/ молим тя, преподобне:/ моли Христа Бога непрестанно о всех нас.

В пустыни живый в толстинных и многошвенных твоих ризах,/ и без тщеславия и мятежа внутрь поя Богови,/ и человеча деяния собою прообразовав в наказание, отче Памво,/ моли Христа Бога,/ да спасет души наша.

Мира сего учение отрину,/ и, в сердцы смирением сподобився Богу угодити,/ кичения ненавидение стяжа,/ тем и ученика своего о страсе Божий обличи,/ и наказа без ликования умоляти Бога,/ истиннаго смирения, Христовы нищеты подражателю,/ пустынная красото, отче наш Памво,/ не престай моля о чтущих тя.

Неленостным послушанием/ и отвержением воли своей/ крепко себе обуздав,/ вдался еси за Христа Бога на муки и раны,/ от Негоже сугубо, всечестне отче Памво, венчався,/ молися о душах наших.

Послушание иноческое кровию мучения обагривша,/ ублажаем тя любезне,/ преподобномучениче Памво,/ и, покланяющеся честным мощем, верно молим:/ молися Господеви непрестанно о всех нас.