Святитель Иоанн, архиепископ Новгородский

Днесь светло красуется славнейший великий Новград,/ имея мощи твоя в себе, святителю Иоанне,/ яко солнечныя лучи испущающия,/ и подающия исцеления, притекающим с верою к тебе./ Молися Христу Богу, избавити град сей невредим от варварскаго пленения,/ и междоусобныя брани, и огненнаго запаления,/ святителю Богомудре и чудоносче,/ небесный человече, и земный ангеле:/ да сошедшеся любовию в память твою,/ светло празднуем, в песнех и пениих радующеся,/ и Христа славяще, тебе таковую благодать даровавшаго исцелений,/ и великому Новуграду заступление и утверждение.

Господи Боже наш,/ творяй присно с нами по Твоему смотрению,/ не отстави милости Твоея от нас,/ но молитвами святителя Твоего Иоанна/ в мире устрой живот наш.

Возвеселися явленно Честная Церковь Христова,/ в память днесь приснословущаго святителя Иоанна,/ от великаго Новаграда возсиявшаго:/ и всю страну удивившаго преславными чудодеянии,/ и всеми добродетельми украсившагося./ И по преставлении бо честное тело его обретеся нетленно,/ источающее велия чудеса./ Темже зовем ему:/ о всеблаженне!/ Моли Христа Бога непрестанно о всех нас.