Слез твоих теченьми пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенней,/ сияя чудесы, Прокопие отче наш./ Моли Христа Бога спастися душам нашим.

Денницу днесь Церковь имущи,/ всякую злославия мглу разгоняет,/ почитающи Тя, Небеснотаинниче, Прокопие преславне.

Воинство тленное оставль,/ в нетленном ввоенился еси Христови,/ и оружием его крестным победив подземных ефиопов,/ победы венец от Христа, Тите, славно приял еси,/ Емуже молися даровати нам мир и велию милость.

Воина Христова храбраго,/ щитом преподобия обложшагося/ и воев невидимых крепко победивша,/ приидите, вернии, восхвалим,/ Тита крепкодушнаго и возопиим:/ прииди, святе, к нам и никтоже озлобит ны.

Братолюбне тя живуща видев любве ненавистник,/ победил тя во гнев,/ но, ведый твоя прежния труды любве источник - Господь,/ преложи тя паки на братолюбие,/ в немже ты прочее пожив Богоугодне,/ молися о нас, яко да поживем братолюбне.

Смирению Господню подобней,/ смирился еси, священник сый пред лицем гордаго диакона Евагрия,/ беззлобие Тите,/ за что приял еси не токмо временныя жизни неотпадение,/ Ангелу тя воздвигшу,/ но и вечныя наслаждение,/ в нейже ликуя, избавляй нас лютаго гнева и памятозлобия.