Зраки изобразуя святых на дщицах,/ сих благодеяния спешно,/ яко искусен художник, всехвальне Алипие,/ нарисовал еси на скрижалех твоего сердца/ и сего ради, аки образ, благолепне украшен,/ священства благодатию, аки златом, обложился еси/ от Христа Бога и Спаса душ наших.

От юности Божественное в себе имея начертание,/ вдан был еси в научение иконнаго писания;/ и внегда небеси подобная Богородицы писашеся церковь,/ ты таможде пособствовал/ и видел еси Духа Святаго осияние,/ от Негоже приял еси чудес действо,/ яко иконы твоя чудотворяху,/ тем тя чтим и ублажаем, чудне Алипие.

Измлада Христа возлюбив, преславне,/ и Того соблюдая Божественныя заповеди,/ к Тому притекл еси весь цел,/ Мироне всечестне,/ и со Ангелы молишися прилежно./ Проси всем почитающим память твою// оставления грехов.

Днесь светло торжествует Печерская обитель/ и радуется явлением образа Богоматере/ безмерный лик Печерских отцев,/ с нимиже и мы непрестанно вопием:/ радуйся, Благодатная, Печерская похвало.

Дева днесь невидимо предстоит в церкви/ и с лики Печерских отцев молится о нас,/ благоговейно величающих Ей безмерную милость к роду нашему,/ явльшуюся в чудном образе Ея,/ обитель Печерскую украшающем.