Священномученик Макарий, митрополит Киевский

Божественныя Безкровныя совершая Жертвы,/ кровь твою, от безбожных агарян излиянную,/ в жертву непорочную принесл еси Владыце твоему, Пастыреначальнику Христу./ Егоже моли, молим тя,/ пролити гнев на языки, хотящия браней;/ христолюбивое воинство наше на враги укрепи/ и стадо твое от всяких бед неврежденно соблюди,/ тебе бо крепкаго заступника почитаем,/ новый свяшенномучениче российский,/ святителю блаженный Макарие.

Веселится град Киев,/ великое сокровище стяжав,/ твое тлению непричастное тело,/ святителю блаженный Макарие,/ твой бо престол даже до крове от лютых врагов нашествия хранил еси./ И ныне Небесному предстоиши Престолу,/ идеже молитвенно пред Творцем поминай нас, отче наш,/ да во всех бедах имеем тя прибежище и тобою хвалимся, зовуще:/ радуйся, Макарие, архиереом честное украшение.

О великий угодниче Христов, святителю отче Макарие, в житии твоем чад твоих любовию, смерти крепчайшею, возлюбивый и за них душу твою предавый, призри от Горних обителей на нас, вонми воздыханием нашим сердечным и помози нам, недостойным и смиренным. Молися, святителю милостивый, да речет Он мир на люди Своя, и на преподобныя Своя, и на обращающия сердца к Нему. Даруй нам, отче наш, любве твоей ко Святей Матери нашей Церкви Христовой, укрепи ны, разслабленныя духом, отеческия предания хранити, и о мимошедших напастех память спасительную имети, и всегда благодарственная Благодетелю Богу воспевати научи. Предстательством твоим у Престола Господа сил испроси Церкви Христовой от ересей и расколов ограждение, к честным мощем твоим притекающим и чтущим святую память твою исполнение благих их прошений дати и всем христианом вся ко временней и вечной жизни потребная даровати, да прославляется о тебе Пречестное Имя Отца, и Сына, и Святаго Духа, ныне, и присно, и во веки веков. Аминь.