Собор преподобных отцев Киево-Печерских, в Ближних пещерах (прп. Антония) почивающих

Столп огнезрачный и светоносное солнце, возсиявшее на горе Печерской,/ великаго Антония со всем собором Богоносных отец приводим Тебе, Христе, в молитву,/ ихже ради молим, подаждь обители нашей благодать и душам нашим велию милость.

Егда снидосте во гробы и самех себе заключисте,/ тогда страсти умертвивше плотския,/ спогребостеся Христу, Богоноснии,/ и диавольския в подземных разрушисте ограды./ Сего ради Ангели венцы с Небес вам подают.

Лик постнический собрася умне,/ мысленныма зряще очима,/ приидите, людие, хвалами почтите,/ покланяющеся мощем их,/ любовныя принесите дары,/ тии бо суть к Богу ходатае и молитвенницы о душах наших.

Отцы всечестнии, личе Богокрасный,/ чудес многих источницы, миро источающии,/ сокровища краснобогатная Господня, земли сокровенная,/ не престайте, молим вы, о нас молитися ко Господу,/ да зовем вам:/ радуйтеся всему миру светильницы.