Тропари святителям. Часть 2.

Тропарь. Иоанну, митр. Тобольскому.

Иоанн (Максимович), митрополит, Тобольский и всея Сибири

Наставниче благочестия, / сиротствующих питателю, / скорбящих утешителю, недугующих врачу безмездный, / душею страждущих скорый помощниче, / теплый молитвенниче о всех ко Господу, / святителю отче Иоанне, / моли Христа Бога спастися душам нашим.

Тропарь. Иоанну, архиеп. Новгородскому.

Иоанн Новгородский, архиеп.

Днесь светло красуется славнейший великий Новград, / имея мощи твоя в себе, святителю Иоанне, / яко солнечныя лучи испущающия, / и подающия исцеления, притекающим с верою к тебе. / Молися Христу Богу, избавити град сей невредим от варварскаго пленения, / и междоусобныя брани, и огненнаго запаления, / святителю Богомудре и чудоносче, / небесный человече, и земный ангеле: / да сошедшеся любовию в память твою, / светло празднуем, в песнех и пениих радующеся, / и Христа славяще, тебе таковую благодать даровавшаго исцелений, / и великому Новуграду заступление и утверждение.

Тропарь. Иоанну Златоусту, архиеп. Константинопольскому.

Иоанн Златоуст, патриарх, Константинопольский

Уст твоих, яко же светлость огня возсиявши, благодать / вселенную просвети: / несребролюбия мирови сокровища сниска, / высоту нам смиренномудрия показа, / но, твоими словесы наказуя, отче Иоанне Златоусте, / моли Слова Христа Бога спастися душам нашим.

Тропарь. Иоанну, еп. Суздальскому.

Иоанн Суздальский и Нижегородский, еп.

Управляя Церковь Божию Собор­ную и Апостольскую, / соблюдая заповеди Божия, / вельми добре упас стадо словесных овец; / зломысленным церков­ником молитвою своею прозрети повеле, / и научи, якоже прежде святый Леонтий, / поспешник спасению Русския земли, учитель Ростовский, / прежде связа и паки благослови; / тако святый епископ Суждальский, / напастем, притекающим к тебе, избавниче, чудотворче Иоанне, / моли Христа Бога спастися душам нашим.

Тропарь. Иоасафу, еп. Белгородскому.

Иоасаф Белгородский, еп.

Святителю Христу Богу возлюбленне, / правило веры и образ милосердия людем был еси, / бдением же, постом и молитвою, / яко светильник пресветлый, просиял еси / и прославлен от Бога явился еси: телом убо в нетлении почивая, / духом же Престолу Божию предстоя, / чудеса преславная источаеши. / Моли Христа Бога, / да утвердит нас в Православии и благочестии / и спасет души наша

Тропарь. Иову, патриарху Московскому и всея Руси.

Иов Московский и всея Руси, патриарх

Да торжествует Церковь Христова / и да радуется град Москва, / яко возсия светильник земли Российския, / во исповедании истины непоколебимый Иов Патриарх, / егоже молитвами. Господи, / вся соблазны мира сего и ереси искорени, / люди во благочестии настави / и утверди в Православии.

Тропарь. Киприану, Фотию и Ионе, митр. Московским и всея Руси (Перенесение мощей).

Киприан Московский и всея Руси, митрополит

Фотий Киевский и всея Руси, митрополит

Иона митрополит, Московский и всея Руси

Яко Светлаго Солнца светозарныя звезды, / Троическим Светом озаряете сердца верных, / пренесением честных мощей ваших, / Троицы сосуди явистеся чистии вашим житием, / и научисте люди твердо вере Христове, / и скверну отгнасте вашими святыми заповедьми, / и упасосте добре Христово стадо, порученное вам, / Богомудре Киприане, со славным Фотием и со Ионою твердым, / молитеся Христу Богу, да спасет души наша.

Тропарь. Ионе, еп. Великопермскому.

Иона Великопермский, Устьвымский, еп.

Святителю Церкви Великопермстей, / истинный хранителю апостольских преданий, / столпе непоколебимый Православия, / благочестия учителю, / Ионо святителю блаженне, / Владыку всех моли / мир пастве твоей / и всей Русстей земли даровати / и всем нам спастися.

Тропарь. Ионе, митр. Московскому и всея России, чдтв..

Иона митрополит, Московский и всея Руси

Ярем Господень измлада восприим, / и Того стопам невозвратным желанием последовал еси, / и освященнаго подвига достигл, / святительства паству приим и чудес от Бога дары прият, / с верою приходящим к раце мощей твоих / подаеши различным недугом исцеление неоскудно, / отче наш Ионо, святителю Христов, /моли Христа Бога даровати нам велию милость.

Тропарь. Ионе, архиеп. Новгородскому.

Иона архиеп., Новгородский

Исправление веры, и образ кротости, / и якоже сад посреде рая, / преподобными делы твоими мир просвещаеши, и сего ради к мощем твоим любовию прикасаемся и верно вопием: / предстани в помощь воспевающим память твою светоносную, отче Ионо, / и моли спастися душам нашим.

Тропарь. Исаии, еп. Ростовскому, чдтв..

Исаия * Ростовский, еп.

В иноцех святыя лавры Печерския / благоискусен показавыися / и во архиерейстем сане добр пастырь / своему стаду, Боголюбезне Исаие, бывый, / моли о нас Пастыреначальника Христа Бога / да помилует и спасет души наша.

Тропарь. Иувеналию, патриарху Иерусалимскому.

Иувеналий(Ювеналий), Иерусалимский, патриарх

Брата Божия на престоле архиерейства преемниче, / святаго града Иерусалима иерарше достохвальне, / с богомудрыми отцы в Халкидоне изъяснил еси воплощение Сына Божия, / пришедшаго мир обновити и обожити вся человеки, / в Церкви Его с Ним сочетавшаяся, / святителю отче Иувеналие, / предстоя ныне во Царствии Отца светов, / о почитающих тя любовию молися, / да мир и милость Спасова будет с нами.

Тропарь. Киприану, митр. Московскому, всея России чудотворцу.

Киприан Московский и всея Руси, митрополит

Иже от Бога свыше Божественною благодатию совершен / и благими нравы украшен, / Духом Святым просвещен, / совершив святыню в страсе Божий, / сподоблен бысть благодати Божественнаго Духа, / пасый Церковь Божию Русския митрополии, / постом вся поборая, волнение претерпе, / гонение преминув, святаго Петра митрополита всегда себе в помощь призывая, / и сего помощника имея, / и того стопам последуя. / Служитель благоприятный, / заповеди Божия соблюдая, / Духом Божиим наставляемь, / просвещая верныя люди учением словес твоих, / пощением украси житие свое, / ярем Господень измлада восприимь, / и паче всех Христа возлюби. / Того ради и архиерейским седалищем поч­тен, / и, яко светозарное солнце, от Сербския земли происшед, / и по вся концы Русския земли добродетелию просияв, / светило явися мирови, / и преставися ко Господу от сея жизни в вечный покой, / великий архиерею Божий, Киприане митрополите, / учителю и наставниче Русския земли, / всегда предстоя Престолу Пресвятыя Троицы, / моли Господа прилежно об архиереех и о всех христианах, / да спасет тебе ради души наша.

Тропарь. Кириллу, архиеп. Александрийскому.

Кирилл Александрийский, патриарх

Православия наставниче, / благочестия учителю и чистоты, / вселенныя светильниче, / архиереев Богодухновенное удобрение, / Кирилле премудре, / ученьми твоими вся просветил еси, / цевнице духовная, / моли Христа Бога спастися душам нашим.

Тропарь. Кириллу, еп. Туровскому.

Кирилл Туровский, еп.

Благочестия ревнителю и рачителю, / иноков и столпников похвале, / святителю Туровския паствы, преславне,/ златословесный учителю, / светлым учением богоразумия своего просветивый концы русския, / в молитве к Богу благодатный грешников споспешниче, / Кирилле Богомудре, моли Христа Бога / утвердитися нам, соотечественником твоим, / во Православии, благочестии и единомыслии.

Тропарь. Константину, митр. Киевскому и всея России, блж..

Константин * митрополит, Киевский и всея России

Апостолов преемниче,/ архиереев сопрестольниче, / России всея пастырю и учителю, / всеблаженне отче Константине, / Владыце всех молися / мир пастве твоей даровати / и спасение душам нашим и велию милость.

Тропарь. Льву, папе Римскому.

Лев I Римский, папа

Православия наставниче, / благоче­стия учителю и чистоты, / вселенныя светтльниче, архиереев Богодухновенное удобрение, / Льве премудре, / ученьми твоими вся просветил есй, цевнице духовная. / Моли Христа Бога спастися душам нашим.

Тропарь. Леонтию, еп. Ростовскому.

Леонтий * Ростовский, сщмч., еп.

Апостолом сопричастник / и к Богу молебник верен, / добродетельми возшед на Небесная, / и любовь возложил еси к Любящему тя, / и неверныя люди обратил еси в веру. / Тем ныне, со Ангелы ликуя, / предстоиши престолу славы всех, Царя Христа Бога: / молися, святителю Леонтие, / да спасет души наша.

Тропарь. Луке (Войно-Ясенецкому), архиеп. Крымскому, исп..

Лука (Войно- Ясенецкий), исп., архиепископ, Симферопольский

Возвестителю пути спасительного, / исповедниче и архипастырю Крымския земли, / истинный хранителю отеческих преданий, / столпе непоколебимый, Православия наставниче, / врачу богомудрый, святителю Луко, / Христа Спаса непрестанно моли / веру непоколебиму православным даровати / и спасение, и велию милость.

Тропарь. Макарию, митр. Московскому.

Макарий * митр., Московский и Коломенский

Яко великим пастырем единонравна, / и учителем вселенныя единомысленна, / Божий Премудрости служителя изрядна, / иже блаженству тезоимениту, днесь, вернии, вси воспоим: / Христа Бога моли, / святителю Макарие, / умирити мир и спасти души наша.

Тропарь. Марку, архиеп. Ефесскому.

Марк Евгеник, митрополит, Ефесский

Православия наставниче, новшеств противоборниче, / степень веры, Церкве светильниче, / учителей Богодухновенная печате, Марко всемудре, / писании твоими вся просветил еси, цевнице духовная, / моли Христа Бога спастися душам нашим.

Тропарь. Мартину Исповеднику, папе Римскому.

Мартин I Римский, исповедник, папа

Истинных повелений устне распространил еси, / зловерие низложил еси, Богомудре Мартине, / святителю всечестне, / поминай нас, угодниче Христов, / еже к Нему ходатайствы твоими, / да в мире устроиши живот наш.

Тропарь. Мелетию, архиеп. Харьковскому.

Мелетий (Леонтович), архиеп., Харьковский и Ахтырский

Мира сего временная, яко преходящая уразумел еси, / от юности постни­ческое и многотрудное житие возлюбил еси, всеблаженне, / иерархов славо и преподобных похвале, / Предвечнаго Слова усердный благовестниче, / сирых и неимущих крове и прибежище. / Темже в молитвах пребывая, Христу утреневати прилежал еси / и, Сего взыскуя, венец неувядаемый со всеми святыми стяжал еси, / отче наш, святителю Мелетие, / моли Христа Бога спастися душам нашим.

Тропарь. Митрофану, еп. Воронежскому.

Митрофан еп., Воронежский

Правило веры и образ кротости / словом и житием пастве твоей, отче смиренномудро Митрофане, был еси. / Темже и во светлостех святых / солнца светлейше возсиял еси, / венцем нетления и славы украшаемь, / моли Христа Бога / стране нашей и граду твоему в мире спастися.

Тропарь. Модесту, архиеп. Иерусалимскому.

Модест Иерусалимский, патриарх

Преподобно пожив, Богомудрие Модесте, / и святительскою одеждою украшен, / пастырю Иерусалима блаженнейший, / в веселии ныне Христу предстоиши / и концы озаряеши чудесы, / помощник убо буди тя призывающим, / моляся, отче, о всех нас.

Тропарь. Моисею, архиеп. Новгородскому.

Моисей Новгородский и Псковский, архиеп.

Чистоты ради жития твоего, / пощения же, и молитв, и трудов, / сосуд благопотребен был еси Владыце Христу, / Иже дарова тя стаду твоему, / яко сокровище неотъемлемо, чудесы всех обогащающа. / Тем и мы, сошедшеся в память твою, / верою и любовию вопием: / моли о нас, пречестный архиерею Моисее, отче наш.

Тропарь. Никите, Затворнику Печерскому, еп. Новгородскому.

Никита Печерский, затворник, еп., Новгородский

Насладився, богомудре, воздержания / и желание плоти твоея обуздав, / на престоле святительства сел еси, / и яко звезда многосветлая, просвещая верных .сердца / зарями чудес твоих, отче наш, святителю Никито, / и ныне моли Христа Бога, / да спасет души наша.

Тропарь. Николаю, архиеп. Мир Ликийских, чудотворцу.

Николай Мирликийский, архиеп.

Правило веры и образ кротости, / воздержания учителя / яви тя стаду твоему, / яже вещей истина: / сего ради стяжал еси смирением высокая, / нищетою богатая, / Отче священноначальниче Николае / моли Христа Бога / спастися душам нашим

Тропарь. Нифонту, еп. Новгородскому.

Нифонт * Печерский, Новгородский, еп.

Яко сый нравом православных / Восточныя Церкве преданий истинный защитник, / сподобился еси великаго во отцех Феодосия / видети по смерти яко жива, / возвещающа тебе Царствия Небеснаго наследие, / егоже неизреченных доброт / ныне с ним неразлучно наслаждаяся, / моли и о нас, чадех своих, Нифонте прехвальне.

Тропарь. Петру, митр. Московскому, всея России чудотворцу.

Петр митрополит, Московский и всея Руси

Яже прежде безплодная, земле, ныне веселися: / се бо Христос светильника в тебе показа, / яве сияюща в мире / и исцелевающа недуги и болезни наша. / Сего ради ликуй и веселися со дерзновением: / святитель бо есть Вышняго, / сия соделоваяй.

Тропарь. Питириму, еп. Великопермскому.

Питирим Великопермский, Устьвымский, сщмч., еп.

Православия наставниче, / благочестия учителю и милости сокровище, / архиереев украшение, / людей зырянских наставниче, / святителю Питириме, / ду­шу свою за Христа положивый, / моли Единаго Человеколюбца о пастве твоей и о всех / любовию чтущих память твою.

Тропарь. Питириму, еп. Тамбовскому.

Питирим Тамбовский, еп.

Веры и благочестия наставниче, / Церкве светильниче, монашествующих об­разе, / святителю Питириме премудре, / стадо твое благочестно упасл еси / и ко Христу привел еси, / темже в Вышних венцем славы украшен, / с нами на земли духом пребываеши, сияя чудесы. / Моли Христа Бога / спастися душам нашим.

Тропарь. Порфирию, архиеп. Газскому.

Порфирий Газский, архиеп.

Труды и болезни твоя, яже по благочестию, / кто исповесть, отче? / день бо и ночь не престал еси трудяся, / дондеже от нечестия Газу очистив, благочестие насадил еси, / тем яко всегда еси предстатель о стаде твоем, / тако, святе Порфирие, / моли Христа Бога да спасет души наша.

Тропарь. Проклу, архиеп. Константинопольскому.

Прокл Константинопольский, патриарх

Иже Божественным началом премудрости, / страхом Господним утверждся, / оттуду священными восхождении возшел еси / во ученичество Златоуста, / и архиерейскаго того престола достоин быв чистоты добротами, / апостольским правилом себе вообразив, / не себе живый, но Христу и стаду твоему. / Тем в нетленный живот апостольски вселился еси, / иерарше Прокле, / моли Христа Бо­га / спастися душам нашим.

Тропарь. Савве I, архиеп. Сербскому.

Савва I Сербский, архиеп.

Пути, вводящаго в жизнь, / наставник, и первопрестольник, и учитель был еси: / первее бо пришед, святителю Савво, / отечество твое просветил еси / и, породив тое Духом Святым, / яко древа маслинная, / в мысленном рай насадил еси всеосвященная твоя чада. / Тем, яко апостолом и святителем сопрестольна / чтуще тя, молим: / моли Христа Бога / даровати нам велию милость.

Тропарь. Савве II, архиеп. Сербскому.

Савва * II Сербский, архиеп.

Исправление веры и образ кротости, / и якоже сад посреде рая, / преподобными делы твоими мир просвещаеши, / сего ради к честней раце мощей твоих любовию прикасаемся, / лобызаем их и верно вопием: / предстани в помощь воспевающим память святую твою и светоносную, / святителю отче Савво пребогате, молимся, / Христу Богу молися / спастися душам нашим.

Тропарь. Серапиону, архиеп. Новгородскому.

Серапион Новгородский, архиеп.

Твердый адамант воистинну, отче, показался еси, / во всем подобяся Владыце своему и Господу, / неправедная изгнания, радуяся, претерпел еси, / темже и Христос святителем и мучеником сликовна тя сотвори / и дарова тя стаду твоему, яко сокровище неотъемлемо, / чудесы всех обогащающее, / яко да и мы, сошедшеся к раце мощей твоих, / любовию вопием ти: / о великий во святителех и дивный во страдальцех / пречестный архиерею, Серапионе отче наш, / моли о нас всеблагаго Бога, / да спасет души наша.

Тропарь. Симону, еп. Владимирскому и Суздальскому.

Симон Печерский, Владимирский и Суздальский, еп.

Житий преподобных отец Печерских описателю известный, / святителю Христов Симоне всеблаженне, / молися прилежно с ними Христу Богу, / да управит в мире живот наш /и в книги животныя да напишет ны, / спасая души наша.

Тропарь. Софронию, еп. Врачанскому (Болг.).

Софроний * Врачанский, Болгарский, еп.

Щитом веры вооружився, / мечем словесе безбожныя агаряны посекая, / стадо твое упасл еси на земли. / В Небесней же обители вселився, / Христа моли даровати народу нашему / мир и велию милость.

Тропарь. Софронию, еп. Иркутскому.

Софроний Иркутский, еп.

От юности Христа возлюбил еси, блаженне Софроние, / добре управил еси иноческия обители / и, архиерейства саном почтен быв, / упасл еси Иркутскую паству, / темже и по преставлении дарования чудес от Бога приял еси / и молиши Христа Бога / избавити нас от бед и спасти души наша.

См. также:

• Тропари святителям. Часть 1
• Тропари святителям. Часть 3