Пророк, Предтеча и Креститель Господень Иоанн. Молитвы

Дни памяти:  Август 29,  Июнь 24,  Май 25,  Октябрь 12,  Сентябрь 23,  Февраль 24,  Январь 7

Иоанн Предтеча

Величание Иоанну Предтече (1-е и 2-е обретение главы)

Величаем тя, /
Крестителю Спасов Иоанне, /
и почитаем вси честныя твоея главы обретение.

Тропарь Иоанну Предтече (Рождество), глас 4:

Пророче и Предтече пришествия Христова, /
достойно восхвалити тя недоумеем мы, любовию чтущии тя: /
неплодство бо рождшия и отчее безгласие разрешися /
славным и честным твоим рождеством, /
и воплощение Сына Божия мирови проповедуется.

Тропарь Иоанну Предтече (Усекновение главы), глас 2:

Память праведнаго с похвалами, /
тебе же довлеет свидетельство Господне, Предтече: /
показал бо ся еси воистинну и пророков честнейший, /
яко и в струях крестити сподобился еси Проповеданнаго. /
Темже за истину пострадав, радуяся, /
благовестил еси и сущим во аде Бога, явльшагося плотию, /
вземлющаго грех мира /
и подающего нам велию милость.

Тропарь Иоанну Предтече (1-е и 2-е обретение главы), глас 4:

От земли возсиявши, Предтечева глава /
лучи испущает нетления верным исцелений, /
свыше собирает множество Ангел, /
доле же созывает человеческий род, /
единогласную возсылати славу Христу Богу.

Тропарь Иоанну Предтече (3-е обретение главы), глас 4:

Яко Божественное сокровище, сокровенное в земли, /
Христос откры главу твою нам, пророче и Предтече. /
Вси убо, сошедшеся в сея обретение, /
песньми богоглаголивыми Спаса воспоим, /
спасающа нас от тления молитвами твоими.

Тропарь Иоанну Предтече (Перенесение из Мальты в Гатчину десной руки Иоанна Крестителя), глас 4:

От запада возсиявши Предтечева рука, /
лучи испущает нетления верным исцелений, /
свыше собирает множество Ангел, /
доле же созывает человеческий род, /
единогласно возсылати славу Христу Богу.

[Жития] [Иконы] [Молитвы] [Храмы] [Святыни]