Мученицы Твои, Господи,/ во страданиих своих венцы прияша нетленныя от Тебе, Бога нашего,/ имуще бо крепость Твою,/ мучителей низложиша,/ сокрушиша и демонов немощныя дерзости./ Тех молитвами/ спаси души наша.

Многообразныя язвы претерпевше/ и венцы от Бога приемше,/ о нас молитеся ко Господу,/ память всесвященную вашу совершающих,/ превеликий Тимофее и преславная Мавро,/ еже умирити град и люди,/ Той бо есть верных утверждение.

Возвысився на добродетель, измлада возлюбив монашеское житие,/ к желанию доблественне достиг, вселился еси в пещеру/ и, украсив житие твое пощением и светлостию,/ в молитвах, яко безплотен, пребывал еси,/ в Российстей земли, яко светлое светило, просияв, отче Феодосие,// моли Христа Бога спастися душам нашим.

Звезду Российскую днесь почтим,/ от востока возсиявшую и на запад пришедшую,/ всю бо страну сию чудесы и добротою обогатившу и вся ны/ содеянием и благодатию монашескаго устава,// блаженнаго Феодосия.

Днесь светло торжествует Печерская обитель/ и радуется явлением образа Богоматере/ безмерный лик Печерских отцев,/ с нимиже и мы непрестанно вопием:/ радуйся, Благодатная, Печерская похвало.

Дева днесь невидимо предстоит в церкви/ и с лики Печерских отцев молится о нас,/ благоговейно величающих Ей безмерную милость к роду нашему,/ явльшуюся в чудном образе Ея,/ обитель Печерскую украшающем.

Днесь светло торжествует Свенская обитель;/ и радуется явлением образа Богоматери;/ Безмерный лик Печерских отцев/ с ними же и мы непрестанно вопием:/ Радуйся Благодатная Свенская Похвало.