Терпения столп был еси,/ ревновавый праотцем, преподобне,/ Иову во страстех, Иосифу во искушениих,/ и безплотных жительству, сый в телеси,/ Симеоне отче наш,/ моли Христа Бога спастися душам нашим.

Вышних ищай, нижним совокупляяйся,/ и колесницу огненную столп соделавый:/ тем собеседник ангелом был еси преподобне,/ с ними Христу Богу моляся/ непрестанно о всех нас.

Торжество днесь празднуем светлое,/ се бо предлежит, о Всеблаженная, икона Твоя Всечестная,/ к ней же любовию сердца вси приходяще, Владычице,/ поклоняемся и тепло Тебе вопием:/ избави нас от бед и обстояний.

Во праздник Твой сошедшеся, вернии,/ священное ко славе Божией торжество Твое, Владычице, днесь всеблагоговейно совершаем,/ любовию же чтуще честную икону Твою,/ Тебе песнословим вси в радости:/ радуйся, Дево Честная Всеблаженная.

Пречистая Владычице Богородице, упование всех христиан,/ понеже инаго упования не имамы разве Тебе,/ Всенепорочная Владычице моя, Госпоже Богородице,/ Мати Христа Бога моего./ Темже помилуй и избави мя от всех зол моих/ и умоли Милостиваго Сына Своего и Бога моего,/ да помилует окаянную душу мою,/ и да избавит мя от вечныя муки, и сподобит мя Царствия Своего.

Всея твари Содетелю,/ времена и лета во Своей власти положивый,/ благослови венец лета благости Твоея, Господи,/ сохраняя в мире люди и град Твой/ молитвами Богородицы и спаси ны.

В вышних живый, Христе Царю,/ всех видимых и невидимых Творче и Зиждителю,/ Иже дни и нощи, времена и лета сотворивый,/ благослови ныне венец лета,/ соблюди и сохрани в мире/ град и люди Твоя, Многомилостиве.