Тропари священномученикам

Тропарь. Александру (Хотовицкому), протопресвитеру.

Александр (Хотовицкий), сщмч., протопресвитер

Кротость и смирение стяжавый, / любовь Христову пастве своей показал еси / в годину огненных искушений Церкве Российския / и, яко пастырь добрый, душу свою за Него положил еси. / Молися о нас, священномучениче Александре, / просветити души наша.

Тропарь. Антипе, еп. Пергама Асийского.

Антипа Пергамский, сщмч., еп.

Идольския лести упразднил еси, Антипо, / и диавольскую поправ силу, / пред богоборцы дерзновенно Христа исповедал еси: / темже со ангельскими чины в вышних водворяяся, / Владыце всех славословие принося, / и о нас молебное благодарение предлагаеши, благодать цельбы даруя. / Сего ради тя чтим, священномучениче Антипо: / моли Христа Бога, / да спасет души наша.

Тропарь. Афиногену, еп., и десяти ученикам его.

Афиноген Пидахфойский, Севастийский, сщмч., еп.

Священный Богу Афиноген, в жертве служитель, / священное ученик своих принесе Христу заколение, / пастырь со словесными овцами иде в Небесную ограду. / победив сверепеющия неверием языки. / Мученик Твоих молитвами, Христе Боже, / спаси стадо Твое от волков, губящих е.

Тропарь. Вениамину, митр. Петроградскому и Гдовскому.

Вениамин (Казанский), сщмч., митрополит, Петроградский и Гдовский

Светильник всесветлый во граде святаго Петра явился еси, / пастырю добрый, священномучениче отче Вениамине. / Любовь и милосердие в сердцах верных насаждая, / благотворити призывал еси терпящим глад и нищету. / Сего ради и мы к тебе прибегаем / и с верою вопием ти: / моли Милостиваго Бога, / отечество наше в Православии и благочестии утвердити, / мир Церкви даровати / и ду­шам нашим велию милость.

Тропарь. Владимиру, митр. Киевскому и Галицкому.

Владимир (Богоявленский), сщмч., митрополит, Киевский и Галицкий

Веры православныя непорочный блюстителю / и заповедей Христовых усердный исполнителю, священномучениче Владимире, / Христа всем сердцем возлюбив, паству твою добре упасл еси, / незлобиво мученическую смерть приял еси. / Сего ради в вечной славе пребы­вая, / моли спастися душам нашим.

Тропарь. Григорию V, патриарху Константинопольскому.

Григорий V, сщмч., патриарх, Константинопольский

Святителю и мучениче Григорие, / за люди твоя душу положивый / и в светоносный день Христова Воскресения пострадавый, / молися Страдавшему за ны и Воскресшему / Церковь Православную незыблему всегда хранити, / пастве же твоей и Русстей земле, святыя мощи твоя с любовию лета многа хранившей, / даровати мир и велию милость.

Тропарь. Дионисию Ареопагиту, еп. Афинскому.

Дионисий Ареопагит, апостол от 70-ти, еп., Афинский, сщмч.

Благости научився и трезвяся во всех, / благою совестию священнолепно оболкся, / почерпл еси от сосуда избраннаго неизреченная / и, веру соблюд, равное течение совершил еси, / священномучениче Дионисие, / моли Христа Бога / спастися душам нашим.

Тропарь. Дорофею, еп. Тирскому.

Дорофей Тирский, сщмч., еп.

Нищелюбием обогатився / и милость воздержания источив, / наслаждения Царствия Небеснаго сподобися, / страдальчески беды приим по стаде своем, / и апостолом обретеся ссельник, / отче священномучениче Дорофее, / моли Христа Бога / спастися душам нашим.

Тропарь. Ермолаю, Ермиппу и Ермократу, иереям Никомидийским.

Ермолай Никомидийский, сщмч., иерей

Ермипп Никомидийский, сщмч., иерей

Ермократ Никомидийский, сщмч., иерей

Троицы провозвестницы, / троице мучеников честная, / идольское нечестие обличившии / и тьмочисленнаго врага сокрушившии, / ныне, со Христом царствующе, молите, / священный Ермолае со Ермиппом и Ермократом славным, / яко да и наша враги победим / и приимем от Царя всех, Бога, вечный живот / и венец нетленный.

Тропарь. Ермогену, патриарху Московскому и всея Руси, чдтв.

Ермоген сщмч., патриарх, Московский и всея Руси

Российския земли первопрестольниче / и неусыпный о ней к Богу молитвенниче! / За веру Христову и паству твою душу свою положив, / царей наших державу утвердил еси / страну нашу от нече­стия избавил еси. / Темже вопием ти: / спасай нас молитвами твоими, священномучениче Ермогене, отче наш.

Тропарь. Ермолаю, иерею Никомидийскому.

Ермолай Никомидийский, сщмч., иерей

Миром благодати помазан, / пребла­женне отче Ермолае / иерей Бога Вышняго явился еси / и благочестия светлый проповедник, / мученик же твердый и безмездный врач притекающих к тебе. / Слава Давшему тебе крепость, / слава Венчавшему тя, / слава Действующему тобою всем исцеления.

Тропарь. Игнатию Богоносцу.

Игнатий Богоносец, Антиохийский, сщмч., еп.

Апостольских нравов подражателю / и престола их снаследниче, / архиереев удобрение / и мучеников славо, Богодухновенне, / на огнь, и меч, и звери дерзнул еси веры ради / и, слово истины исправляя, / до крове пострадал еси, священномучениче Игнатие, / моли Христа Бога / спастися душам нашим.

Тропарь. Иерофею, еп. Афинскому.

Иерофей Афинский, сщмч., еп.

Благости научився и трезвяся во всех / благою совестию священнолепно оболкся, / почерпл еси от сосуда избраннаго неизреченная / и, веру соблюд, равное течение совершил еси, / священномучениче Иерофее. / Моли Христа Бога / спастися душам нашим.

Тропарь. Иоанну Петроградскому, протоиерею.

Иоанн (Ковшаров) Петроградский, мч.

Любовию к Богу распаляемь, / жизнь свою мученически за Христа и ближних положил еси, / сего ради венец правды от Него приял еси. / Моли Всеблагаго Бога, священномучениче Иоанне, Церковь Святую сохранити в мире / и спасти души наша.

Тропарь. Иосифу Астраханскому.

Иосиф Астраханский, митрополит

Подвигом добрым подвизався, / жизнь твою страданиями за правду увенчав, / преселился еси в Небесныя обители, / идеже предстоя Престолу Святыя Троицы, / моли, святителю Иосифе, / граду Астрахани и отечеству нашему в мире спастися.

Тропарь. Ипатию, еп. Гангрскому.

Ипатий Гангрский, сщмч., еп.

Изволением Божественнаго разума / вперив ум свой в Небесныя обители / и равно Ангелом житие пожив на земли, / сего ради мучения красоты венец на своем версе утвердив, / священномучениче Ипатие, / моли Христа Бога / спастися душам нашим.

Тропарь. Иринею Сремскому.

Ириней Сирмийский (Сремский), Сербский, сщмч., еп.

Жизнь твою целомудренно совер­шил еси, / ничтоже на земли паче Христа предпочет, / радуяся, вшел еси на мученическое благославие, / противяся мучителя повелению, / явился еси венценосец священный, / ибо Христос возмездие тебе дарова / и всели тя в Царство Небесное.

Тропарь. Исидору, пресвитеру, и иже с ним 72-м в Юрьеве Лифляндском пострадавшим.

Исидор Юрьевский (Дерптский), сщмч., пресвитер

Страстотерпцы Господни блаженнии, / Православную веру Христову со дерзновением проповедаете / и на судищи учения врагов неправая обличисте, / того ради и ввержени бысте, святии, / во глубину речную, / души же ваша вселишася в Небесныя кровы, / идеже со святыми предстояще Престолу Царя всех Бога, / молитеся Ему за вся православныя люди, / подвиги ваша честно почитающия.

Тропарь. Иувеналию Рязанскому.

Иувеналий (Масловский), сщмч., архиепископ, Рязанский

Любимиче паствы Рязанския, / юже от нечестия и безверия ограждая, / пост­радал еси даже до крове, / священномучениче Иувеналие, / молися о нас Владыце Христу, / да сохранит державу Российскую в мире и благоденствии / и спа­сет души наша.

Тропарь. Клименту, папе Римскому.

Климент сщмч., папа, Римский

Иже от Бога чудодействы / преславно удивляя вселенныя концы мира, / священный страдальче, / паче естества морю составы водам содеваеши разделение / в честней памяти твоей / всегда притекающим усердно в Богозданную ти церковь / чудесным твоим мощем, / и по всенародном хождении / море во едино течение чудодетельне твориши, / Клименте предивный, / моли Христа Бога спастися душам нашим.

Тропарь. Клименту, еп. Анкирскому.

Климент Анкирский, Многострадальный, сщмч., еп.

Лоза преподобства и стебль страдальчества, / цвет священнейший и плод Богоданный, / верным, всесвященне, присноцветущ, даровался еси, / но яко мучеников сострадалец / и священноначальников сопрестольник, / моли Христа Бога / спастися душам нашим.

Тропарь. Константину (Голубеву), протоие­рею.

Константин * Голубев, сщмч., Протоиерей

Украшение священников явился еси Константине, восприем бо крест яко оружие, / проповедию славною устраняя рас­кол и ереси, / благовествовал еси Иисуса Христа глаголя: / спасайтеся от рода сего развращеннаго. / Сего ради мученическою кровию обагрися славне, / и ныне радуяся с лики ангельскими, / моли Христа Бога Церковь Всероссийскую / от ересей и расколов сохранити / и спасти души наша.

Тропарь. Лукиану, пресвитеру Антиохийскому.

Лукиан Антиохийский, сщмч., пресвитер

Воздержанием постничества и мучения кровию / ты, стяжав венец неувядаемый, священномучениче Лукиане, / Антиохийская похвало, / о нас моли Христа Бога, / творящих святую память твою.

Тропарь. Лукиану Печерскому, в Дальних пещерах.

Лукиан * Печерский, сщмч., пресвитер

И нравом причастник, / и престолом наместник апостолом быв, / деяние обрел еси, Богодухновенне, / в видения восход. / Сего ради, Слово Истины исправляя, / и веры ради пострадал еси даже до крове, / священномучениче Лукиане, / моли Христа Бога / спастися душам нашим.

Тропарь. Макарию, митр. Киевскому.

Макарий Киевский, сщмч., митрополит

Божественныя Бескровныя совершая Жертвы, / кровь твою, от безбожных ага­рян излиянную, / в жертву непорочную принесл еси Владыце твоему, Пастыреначальнику Христу. / Егоже моли, молим тя, / пролити гнев на языки, хотящия браней; / христолюбивое воинство наше на враги укрепи / и стадо твое от всяких бед неврежденно соблюди, / тебе бо крепкаго заступника почитаем, / новый священномучениче российский, / святителю блаженный Макарие

Тропарь. Мефодию, еп. Патарскому.

Мефодий Патарский, Олимпийский, сщмч., еп.

Кровь твоя, мудре, тайно вопиет от земли, / якоже Авелева к Богу, / Богомудре святителю Мефодие, / ясно проповедавый Божие вочеловечение. / Темже и посрамил еси Оригенову лесть, / и преставился еси в Небесный чертог./ Моли Христа Бога,/ да спасет души наша.

Тропарь. Никите Славянину.

Никита Славянин, сщмч.

Постнически подвизався / и плоть покорив духу, / вшел еси в тишину безстрастия, / иерейством же украшен, / за Христа пострадал еси твердейши, / Емуже молися о чтущих тя, / священномучениче Никито приснопамятне.

Тропарь. Панкратию, еп. Тавроменийскому.

Панкратий Тавроменийский, Антиохийский, сщмч., еп.

Яко стрела огнезрачная, / от Верховнаго послан был еси Тавроменийско­му престолу / уязвляти безбожных злочестие, / верных же сердца просвещати, / яже боговещанными твоими словесы в вере утвердив / и течение совершив, пострадал еси до крове, / священномучениче Панкратие, / моли за вся, поющия память твою.

Тропарь. Петру, архиеп. Александрийскому.

Петр I Александрийский, сщмч., патриарх

От вышняго суда Христова предстательствова стаду, / на пажитех благожизненных упасл еси всемудрыми твоими догматы, / отгнав Ария, яко волка некроткаго, / вшедшаго в них безбожными учении. / Темже и душу твою положил еси за них, / пастырь нареклся еси, яко рече Господь, / иерарше Петре блаженне, / моли Христа Бога грехов оставление даровати / чтущим любовию ствятую па­мять твою.

Тропарь. Петру (Полянскому), митр. Крутиц­кому.

Петр (Полянский), сщмч., митрополит, Крутицкий

Божиим смотрением к святительско­му служению / святым Патриархом Тихоном призванный, / стаду Христову явился еси / страж неусыпный и защитник небоязненный, / священномучениче Петре. / Жестокая заточения и дальная изгнания, / страдания и смерть от богоборцев претерпел еси. / Венец мученический прияв, / на Небеси ныне радуешися. / Моли милостиваго Бога, / да сохранит Церковь нашу от нестроений, / единомыслие и мир людем Своим дарует / и спасет души наша.

Тропарь. Серафиму (Чичагову), митр. Петроградскому.

Серафим (Чичагов), сщмч., митрополит

Воинство Царя Небеснаго / паче земнаго возлюбив, / служитель пламенный Святыя Троицы явился еси./ Наставления Кронштадтскаго пастыря / в сердце своем слагая, / данная ти от Бога многообразная дарования / к пользе народа Божия преумножил еси. / Учитель благочестия / и поборник единства церковнаго быв, / пострадати даже до крове сподобился еси. / Священномучениче Серафиме, / моли Христа Бога / спастися душам нашим.

Тропарь. Фаддею (Успенскому), архиеп. Тверскому.

Фаддей * (Успенский), сщмч, архиеп, Тверской

Хвала Богу и жертва живая / житие твое, священномучениче Фаддее, явися. / Постом, бдением и молитвою Небесная дарования приим, / многим добрый помощник и утешитель бысть. / Пастырскою мудростию и тихостию нрава украшен,/ лукавства врагов Христовых препобедил еси./ Слава Давшему тебе во страданиих крепость, / слава, яко мученика, Венчавшему тя, / слава Действующему тобою всем исцеления.

Тропарь. Харалампию.

Харалампий Магнезийский, сщмч., еп.

Яко столп избранный Церкве Христовой / и светильник присносветлый всея вселенныя, / премудре показася, Харалампие, / возсия в мире мучением, / разруши идольское мракобесие, блаженне, / сего ради явися предстатель Христу, / молися спастися нам.

Тропарь. Еразму Охридскому.

Преподобно житие твое прошед, мудре, / светлым украсился еси хитоном священства. / Проливая же кровь мученичества, Еразме, / сподобился еси свыше мздов нелестных / и, предстоя Трои­це, молишися о нас, воспевающих тя.

Тропарь. Кириллу, еп. Гортинскому.

Гласом божественным от темницы изведен, / в Риме братию в божественней вере утвердил еси, / и, от Ангела глаголы приим о святительстей пастве, / во страдании своем паки гласу с Небесе сподобися, / богоповеленный святителю и страдальче Кирилле, / моли за души наша.