Многочудный Крит почтим,/ процветший честныя цветы, Христовы бисеры,/ мучеников сорасленых,/ десять бо суть числом, блаженнии,/ иже весь идольский народ посрамиша,// темже и венцы прияша, добледушнии.

Денница возсия мучеников честное страдальчество,/ предозаряющее нам в вертепе Раждаемаго,// Егоже Дева безсеменно роди.

Мир оставил еси, прилепився Христу,/ плоть распял еси, пожив Духу,/ Науме всеблаженне,/ потщался еси апостольским подвизатися течением/ и уловил еси к вере Болгарская неисчетная множества./ Темже молитвами твоими/ избави нас от искушений.

Мир оставил еси, прилепився Христу,/ плоть распял еси, пожив Духу,/ Науме всеблаженне,/ потщался еси апостольским подвизатися течением/ и уловил еси к вере Болгарская неисчетная множества./ Темже молитвами твоими/ избави нас от искушений.

Светлых твоих подвигов пречестная память,/ яко велие солнце, всем возсиявает,/ лица воспевающих тя просвещает,/ демоны и всяку болезнь отгоняет,/ сего ради, сошедшеся, любовию сию верно восхвалим.

Светлых твоих подвигов пречестная память, яко велие солнце, всем возсиявает,/ лица воспевающих тя просвещает,/ демоны и всяку болезнь отгоняет:/ сего ради, сошедшеся, любовию сию верно восхвалим.

Божия Слова Премудрости изрядный служитель,/ Ангельскаго жительства истинный подражатель,/ Божественныя чистоты рачитель,/ архиереом сопрестольниче, преподобным сожительниче,/ пастырская красота,/ Великому Новуграду похвала,/ святителю пречестный Феоктисте, отче наш,/ Емуже, Слову Божию, в житий сем послужил еси,/ моли спастйся душам нашим.

Архиерейское украшение,/ Великому Новуграду Богодухновенное удобрение,/ сущия бо в нем люди на пажитех живоноснаго закона Господня упасл еси,/ и сего ради в лице святых водворятися сподобися,/ и святую твою память многими леты сотвори неоскверненну,/ в нейже, тя почитающе,— радуйся,— от души вопием ти,/ святителю отче Феоктисте,/ Великому Новуграду похвала и утверждение.