Тропари преподобным. Часть 5.

Тропарь. Марону, пустыннику Сирийскому, глас 8:.

Марон Сирийский, пустынник

Яко незаходимое солнце возсия нам днесь / светозарными твоими молитвами, преподобне отче наш Мароне, / иже некия горы достигл / и тамо на ней живущими нечестивыми чтом бысть, / за пре­восходящую твою к Богу добродетель, / и тамо обрет требище идольское. Богу освятив, в нем пребывал еси, / и видев Человеколюбец Бог твой подвиг и труды, / дарова тебе дар Свой, / имже пронесеся имя твое в человецех, / целити скор­би, огневицу и трясавицу прибегающим к тебе с верою. / Темже и зовем ти: / радуйся, целителю наш скорый; / радуйся, заступниче наш теплый, / предстоиши бо у Пресвятыя Троицы, / молися Той о призывающих имя твое святое, / да избавит от сих тяжких скорбей и спасет души наша.

Тропарь. Мартину Туровскому, глас 1:.

Мартин Туровский, прп.

Тяжким недугом страждущий и людьми забытый, / молил еси жажду утолити, преподобне Мартине, / темже Христос посла с Небесе благоверных Бориса и Глеба / тебе послужити и недуг исцелити.

Тропарь. Мартиниану Палестинскому, глас 8:.

Мартиниан Кесарийский (Палестинский), прп.

Пламень искушений слез теченьми погасил еси, блаженне, / и, морская вол­нения, и зверей стремления обуздавый, взывал еси:/ препрославлен еси, Всесильне, огня и бури спасый мя.

Тропарь. Мартиниану Белоезерскому, глас 2:.

Мартиниан Белозерский, игумен

Богу от юности, отче, избравшу и возлюбившу тя / и провидящу твое доб­рое произволение, / наставляет тя приити к преподобному Своему угоднику — / Кириллу всеблаженному, / от негоже наставлен бысть на путь спасения, / стра­хом Божиим, и чистотою душевною, и благоговением, / и непрестанными к Богу молитвами / во мнозе подвизе жизнь свою препроводил еси / и заповеди Божия непорочно соблюл еси, / пастырь и наставник иноком предивен был еси, / и ныне Престолу Христову со дерзновени­ем предстоиши на Небесех, / со Ангелы светлоликовствуя, / отче преподобне, Мартиниане всеблаженне, / не престай молися Христу Богу / спасти и помиловати души наша.

Тропарь. Мартирию Зеленецкому, глас 2:.

Мартирий Зеленецкий, прп.

От юности, Богоблаженне, Христа возлюбив,/ отечество оставил еси / и, всех мирских мятежей уклонився, / в тихое пристанище пречестныя обители Богоматерни достигл еси: / отнюдуже уведев непроходную пустыню, / крестовидною зарею показанную, / желательне ю обрел еси, / и, в ней вселився, / иночествующих собрал еси, / и сих ученьми своими, яко лествицею восходною на Небо, / трудолюбно тщался еси возводити к Богу, / Емуже молися, Богомудре Мартирие, / даровати душам нашим велию милость.

Тропарь. Мартирию, диакону Печерскому, в Дальних пещерах, глас 1:.

Мартирий Печерский, диакон

Служивый в чину диаконства Господеви добре,/ честный иеродиаконе Мартирие, / и тамо яко слуга Господень обретыйся, / идеже и Господь твой, / молися Ему и о нас, / да подаст нам велию милость.

Тропарь. Марфе Антиохийской, Едесской, глас 4:.

Марфа Антиохийская, Едесская

Житием чистым и любовию, яже ко Пречистей Божией Матери, / стяжала еси дар чадородия преславный, / светильника миру, дивнаго Симеона, / тем тя, Марфо, / яко матерь, о чаде веселящую­ся, песньми ублажаем.

Тропарь. Матроне Константинопольской, глас 8:.

Матрона Константинопольская, прп.

Мужескомудрено утаившися вражиих лукавых путей, Матроно, / к жизни воистину шествовавши несумненною во­лею / и неуклонное течение Богомудро скончавши, / от Христа прияла еси бла­годать духовную, / тем и воду цельбам источаеши / любовию притекающим в па­мять твою славную, / мнихом похвала, / моли Христа Бога спастися душам нашим.

Тропарь. Меркурию Печерскому, в Дальних пещерах, глас 5:.

Меркурий Печерский, постник

Присносущныя, блаженне, желая сподобитися жизни, / праведне и непорочне / жизнь свою препроводил еси в нынешнем веце, / темже, Меркурие, желаемаго ты достиг, / моли и нам вечныя сподобитися жизни.

Тропарь. Меркурию Печерскому, еп. Смоленскому, в Ближних пещерах, глас 8:.

Меркурий Смоленский, Печерский, сщмч., еп.

Постом душу твою просветил еси, / молитвами непрестанными сердце твое сосуд Духа Святаго соделал еси, / преподобне отче наш Меркурие; / темже вся вражия ополчения крепко посрамил еси / и, яко победоносец истинный, / воздая­ние получил еси от Христа Бога. / Тому помолися о душах наших.

Тропарь. Мефодию, игумену Пешношскому, глас 8:.

Мефодий Пешношский, игумен

Божественною любовию от юности распаляемь, / вся, яже в мире красная, возненавидев, / Христа Единаго возлю­бил еси, / и, сего ради в пустыню вселився, / в ней обитель сотворил еси, / и, соб­рав инок множество, / приял еси от Бога чудес дар, отче Мефодие, / и был еси о Христе собеседник и спостник преподобному Сергию, / с нимже у Христа Бога испроси православным Христианом здравие, и спасение, / и душам нашим велию милость.

Тропарь. Михаилу Клопскому, Новгородскому, глас 8:.

Михаил Клопский, Новгородский, Христа ради юродивый

Иже на земли Христа ради волею в буйство преложився, / мира сего красо­ты отнюд возненавидел еси / и, плотская играния увядив постом и жаждею и на земли леганием, / от зноя же и студени, от дождя и снега / и от прочия воздушныя тягости никогда же уклонился еси, / душу же очистил еси добродетельми, яко злато в горниле, / отче преподобне Богоносне Михаиле, / и ныне на Небесех предстоиши престолу Пресвятыя Троицы. / Но яко имея дерзновение многое, / моли Христа Бога спастися душам нашим.

Тропарь. Михаилу Малеину, глас 8:.

Михаил Малеин, игумен

Крилами мысленными к Боговедению возлетев разумно, / мятеж мира ос­тавил еси, блаженне, / презрев плоти мудрования, / мудрость Вышнюю взыс­кал еси, еже жити с Богом, / и всем образ дав собою, глаголя: / добро есть с Богом жити, Михаиле преподобне.

Тропарь. Михею Радонежскому, глас 4:.

Михей Радонежский, прп.

Иго Господне на рамо взем, / после­довал еси Христови со учителем своим преподобным Сергием, / с нимже и спо­добился еси видети Пресвятую Богоро­дицу. / И слышал еси пресладкий глас Ея, / яко обещася неотступна быти места сего, / но, о преподобне Михее, / молися о чтущих святую память твою.

Тропарь. Моисею Мурину, глас 1:.

Моисей Мурин, Эфиопский, сщмч., иеромонах

Пустынный житель, и в телеси Ан­гел, / и чудотворец явился еси, Богоносе отче наш Моисее: / постом, бдением, молитвою Небесная дарования приим, / исцеляеши недужныя и души верою при­ходящих ти. / Слава Давшему ти крепость, / слава Венчавшему тя, / слава Действующему тобою всем исцеления.

Тропарь. Моисею, чудотворцу Печерскому, в Дальних пещерах, глас 1:.

Моисей Печерский, чудотворец

Велия исправления и крепкия подви­ги / во псалмопениих же и коленопреклонениих безчисленных показавый / и многими труды и чудодействии, / Богоносе Моисее, просиявый, / моли Христа Бога / во еже спастися нам.

Тропарь. Моисею Угрину, Печерскому, в Ближних пещерах, глас 4:.

Моисей Ургин (венгр), Печерский

Труды и подвиги со страстьми по чистоте твоей видя, святе, / кто не уди­вится? / Глад бо, темницу и раны приемля, / не поработился еси сластем ляховицы, / но, яко царь, страстьми обладаяй, / ныне и тогда воспрославился еси от Всевидящаго человеческая сердца, / от Него­же во искушениих всем пособствовати бла­годать прием, / пособствуй и нам, твою память чтущим, / Моисее преподобне.

Тропарь. Нестору Летописцу, Печерскому, в Ближних пещерах, глас 4:.

Нестор Летописец, Печерский

Великих князей русских деяния / и преподобных отец Печерских жития и чудеса написавый, / свое же, Богомудре Несторе, многих ти ради добродетелей имя / написано на небеси стяжавый, / мо­ли и нам написатися в Книги Животныя.

Тропарь. Нестору Некнижному, Печерскому, в Дальних пещерах, глас 2:.

Нестор * Печерский. Некнижный

Чист и прав сый сердцем, / и свят, преподобне Несторе, душею, / прост же паки и не умея сам чести книг, / сего ради чтущим я прилежне внимал еси / и, оная в себе соблюдая, спешно тщался еси исправляти, / яже яко разумен исполнив, обрел еси Царствие Небесное.

Тропарь. Никандру пустынножителю, Псковскому чдтв., глас 6:.

Никандр Псковский, пустынник

Светило незаходимаго света стране нашей явился еси, Богоблаженне, / доблественне претерпев вражия озлобления, / биение и раны яко одежда нетления вменишася тебе, / со зверьми бо брався, и от человек злых прободения прияв, / о тех молился еси, не постави им греха сего, глаголя; / темже Владыце Христу уподобился еси, достохвальне Никандре, отче наш, / молися о душах наших.

Тропарь. Никите, столпнику Переславльскому, глас 4:.

Никита Столпник, Переяславский, прп.

Православным смыслом юношская возжеления возненавидев / и доблественныя нравы восприим, врага победил еси, / и во благоразумии Богу угодил еси, / и свыше от Него прием дар чудес, / бесы прогоняти, недуги исцеляти, / Никито преславне, / моли Христа Бога, да спасет души наша.

Тропарь. Никодиму Кожеезерскому, глас 8:.

Никодим Кожеезерский, Хозьюгский, прп.

От царствующаго града пресельник явися / и яже в нем великия обители / и, промышлением Божественнаго разума окормляемь, / к морским странам устремися, / вселися же в пустыню, уклоняяся мирския молвы, / и силою Святаго Духа вооружился еси, / крестным оружием вра­ги своя прогоняя, / постом и непрестанною молитвою жизнь свою совершая, / сревнуя великим отцем Антонию, и Ону­фрию, и Павлу Фивейскому, / с нимиже Господеви молися, отче Никодиме, / спастися душам нашим.

Тропарь. Никодиму Святогорцу, глас 3:.

Никодим Святогорец, прп.

Мудрости благодатию, отче, укра­шенный, / труба богогласная показался еси Духа / и добродетелей наставник, Никодиме Богоглаголивый, / всем бо подаеши спасительная учения,/ жития чистаго показуя сияние / богатством Бо­жественных твоих словес, / имиже, яко свет, мирови возсиял еси.

Тропарь. Спиридону и Никодиму, просфорникам Печерским, в Ближних пещерах, глас 4:.

Спиридон Печерский, просфорник

Никодим Печерский, просфорник

Хлебы приносныя руками своими творя, / псалмопение непрестанное усты своими / яко жертву хвалы приношаше Господеви, / со честным Никодимом, бла­женне Спиридоне, / с нимже молися Христу Богу о душах наших.

Тропарь. Николе Святоше, князю Черниговскому, Печерскому чудотворцу, в Ближних пещерах, глас 2:.

Никола Святоша, Черниговский, Печерский, инок, князь

Отечество и славу княжения твоего оставил, / Князю смирения, Христови, усердно последовал еси, / преподобне отче наш Николо; / тем приял еси от Него вечное царство и славу на Небеси, / идеже ликуя, поминай нас чтущих память твою верно.

Тропарь. Сергию и Никону, Радонежским, глас 8:.

Сергий Радонежский, игумен

Никон Радонежский, игумен

Яко трисветлаго солнца светозарныя звезды, / Тройческим светом озаряете сердца верных, / сосуды Света Пресвятыя Троицы явльшеся, / и предивным вашим житием иноком бысте твердии законоположителие, / и церквам благолепие, и благоверным, и святителем, и всем людем, / вся бо демонския скверны отгнавше отсюду / вашими чистыми учении и делы, / добре упасосте стадо, собранное вами, / но и ныне молим вас: посещайте чад своих, / яко имущие дерзновение ко Святей Троице/, Богомудре, Сергие с чудным учеником своим Никоном, / и молите Христа Бога да спасет души наша.

Тропарь. Никону, игумену Киево-Печерскому, в Ближних пещерах, глас 5:.

Никон Печерский

Христова винограда лоза явился еси, Богоблаженне Никоне, / гроздие прино­ся Ему — добродетели твоя, / и прочиих, к темже наставляя, / приводил еси Христу Богу, / Емуже, молим тя, молися за души наша.

Тропарь. Никону, игумену Радонежскому, глас 1:.

Никон Радонежский, игумен

Послушания добрый рачитель быв, / преподобне Никоне приснопамятне, / Церковь бо прекрасну Святыя Троицы / в похвалу отцу твоему воздвигл еси. / Тем­ же и мы, чада твоя, любовию вопием ти: / слава Давшему ти крепость, / слава Вен­чавшему тя, / слава Действующему тобою всем исцеления.

Тропарь. Никону Сухому, Печерскому, в Ближних пещерах, глас 8:.

Никон Сухой, Печерский

Бога Благаго возлюбив, / иноческое приял еси житие / и, добре в нем подвизався, / пленен был еси половцы, / имиже много мучим, крепкодушне Никоне, / благодатию Христовою свободился еси от них невидимо, / и ныне во Свете пре­бывая неприступном, / моли спастися нам, твою память почитающим.

Тропарь. Нилу Постнику, Синайскому, глас 8:.

Нил Постник, Синайский, отшельник, пресвитер

Слез твоих теченьми пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенней, сияя чудесы, Ниле, отче наш, / моли Христа Бога спастися душам нашим.

Тропарь. Нилу Мироточивому, Афонскому, глас 1:.

Нил Мироточивый, Афонский, прп.

Монашествовав Богоугодно в Горе Афонстей, / в молитвах и постах Бога взыскал еси / и стал еси приятелище чис­тое Духа, / облиставая верным доброде­телей лучи, / имиже осияваеши, Ниле, вопиющих тебе: / слава прославльшему тя Богу, / слава Венчавшему тя, / слава Действующему тобою всем исцеления.

Тропарь. Нилу Столобенскому, глас 4:.

Нил Столобенский, прп.

Яко светильник всесветел, / явился еси во острове Селигера езера, / преподобне отче Ниле, / ты бо, крест Христов от юности своея на рамо взем, / усердно Тому последовал еси, / чистотою Богови приближився, / отонудуже и чудес дарованием обогатился еси. / Тем и мы, притекающе к раце мощей твоих, умильно глаголем: / отче преподобне, / моли Хри­ста Бога / спастися душам нашим.

Тропарь. Нилу Сорскому, глас 4:.

Нил Сорский, прп.

Удалився бегая Давидски мира, / и вся яже в нем яко уметы вменив, / и в ме­сте безмолвне вселився, / духовныя радо­сти исполнился еси, отче наш Ниле: / и Единому Богу изволив служити, / процвел еси яко финикс, / и яко лоза благоплодна умножил еси чада пустыни. / Темже благодарственно вопием: / слава Укре­пившему тя в подвизе пустынножитель­ства, / слава Избравшему тя в России отшельником уставоположника изряд­на, / слава молитвами твоими и нас Спа­сающему.

Тропарь. Олегу Брянскому, блгв. кн., глас 8:.

Олег(в иночестве Василий), Романович Брянский, прп., князь

От юности возлюбив Христа всем сердцем, преподобне / славу земную, яко преходящу, оставил еси / и царство земное в ничтоже вменивше, / лику инок радостно причелся еси / и труды многими град Брянск, аки солнце пресветло, озарил еси: / тем, быв Троицы украшение, моли, княже Олеже, Христа Бога, спастися душам нашим.

Величание. .

Олег(в иночестве Василий), Романович Брянский, прп., князь

Ублажаем тя, / благоверне княже Олеже, / и чтим святую память твою, / ты бо молиши за нас / Христа Бога нашего

Тропарь. Онуфрию молчаливому и Онисиму затворнику, Печерским, в Ближних пеще­рах, глас 3:.

Онуфрий Печерский, Молчаливый

Онисим Печерский, затворник

Преблаженнии и Богоноснии отцы наши Онуфрие и Онисиме, / яко стяжавшии дерзновение ко Господу / равноангельным своим житием, / егоже ради обо­гати Христос нетлением и чудесы мощи ваша, / молим вас прилежно: / испросите душам нашим очищение / и велию и бо­гатую милость.

Тропарь. Онуфрию Великому, глас 1:.

Онуфрий Великий, прп.

Желанием духовным пустыни достигл еси, богомудре Онуфрие, / и яко безплотен в ней многолетне подвизался еси трудолюбне, / соревнуя пророкам Илии и Крестителю: / и от руку ангельску таин божественных насладився, / ныне во све­те Святыя Троицы купно с ними веселишеся. / Моли спастися нам, твою память почитающим.

Тропарь. Павлу Латрийскому, глас 4:.

Павел Латрийский, прп.

Яко Безплотных единовсельника / и всем преподобным сообщника, / всеславне Павле, поем тя и молим тя: / молися всегда о нас, / яко да обрящем милость.

Тропарь. Павлу Послушливому, Печерскому, в Дальних пещерах, глас 3:.

Павел Печерский, Послушливый

Послушанию Христову подражавый, / и Имени Его ради во всяком послушании, терпеливне, даже до смерти, Павле всечестне, потрудивыйся, / мзду же ныне послушания своего трудолюбно от Господа прием, / к Нему всегда молися о нас, поющих тя.

Тропарь. Павлу Комельскому (Обнорскому), глас 1:.

Павел Комельский (Обнорский), прп.

Божественною любовию от юности распалаемь, Павле преподобне, / вся, яже в мире красная, возненавидев, / Христа единаго возлюбил еси / и сего ради во внутреннюю пустыню вселился еси, / со зверьми жити весь Христу. / Отонудуже и Всевидящее Око, твоя труды видев, / да­ром чудес и по преставлении обогати тя. / Темже вопием ти: / моли непрестанно о всех нас, / честную память твою присно в песнех почитающих.

См. также:

• Тропари преподобным. Часть 1. Авксентий-Афанасий
• Тропари преподобным. Часть 2. Афанасий-Евфимий
• Тропари преподобным. Часть 3. Евфимий-Ипатий
• Тропари преподобным. Часть 4. Иринарх-Марон
• Тропари преподобным. Часть 6. Паисий-Сильвестр
• Тропари преподобным. Часть 7. Симеон-Харитон. Анастасия-Гавриил
• Тропари преподобным. Часть 8. Григорий-Феодосий